Loloma, Veitaqomaki, kei na Veivaqaqacotaki

Wilika ka masulaka na itukutuku oqo, ke gadrevi, mo veivosakitaka kei ira na marama o sikova. Vakayagataka na taro me vukei iko mo vaqaqacotaki ira na marama oqo me yaco na iSoqosoqo ni Veivukei me dua na tiki bulabula ni nomu bula vakai iko.

Vakabauta, Matavuvale, Veivukei

Me vakataka na iVakabula, na siko vuvale ena veiqaravi ki na tamata yadudua (raica na 3 Nifai 11:15). Eda na qai kila ni sa mana na noda cakacaka vakalotu ni dausiko vuvale ni ra kaya mai na marama: (1) a vukea na noqu tubu vakayalo na noqu dausiko vuvale; (2) niu sa kila ni noqu dausiko vuvale e kauwaitaki au vakalevu sara kei na noqu matavuvale; vakakina (3) kevaka e tu na noqu leqa, au kila ni na vakayacora e dua na ka o noqu dausiko vuvale ka sega tale ni wawa me sureti mai.¹

Eda na lomana, taqomaka, ka vaqaqacotaka rawa vakacava e dua na marama tacida oi keda na dausiko vuvale? Oqo e ciwa na vakatutu e ra tiko ena wase 7 ni Luvequ Yalewa ena Noqu Matanitu: Na iTukutuku kei na Cakacaka ni iSoqosoqo ni Veivukei mera vukei kina na dausiko vuvale mera veiqaravi yani vei ira na marama tacidra:

Masulaki koya kei na nona matavuvale ena veisiga.
Vakasaqara na veivakauqeti vakayalo mo kilai koya kei na nona matavuvale.
Sikovi koya vakawasoma mo kila na veika e yaco tiko vua ka mo laki vakaceguya ka vaqaqacotaki koya.
Mo drau veitaratara tikoga ena nomu sikovi koya, talevoni, ivola, i-meli, tex, kei na itovo vinaka eso ni loloma.
Kidavaki koya ena soqoni ni Lotu.
Vukei koya ena leqa tubukoso, tauvimate, se veivuke e gadreva vakatotolo.
Vakavulici koya ena kosipeli mai na ivolanikalou kei na iVaqa ni Veisiko.
Vakauqeti koya vakayalo ena nomu ivakaraitaki vinaka.
Soli ripote vua e dua na iliuliu ni iSoqosoqo ni Veivukei me baleta na nodra veiqaravi kei na ituvaki vakayalo kei na nona bula raraba na marama o ya.

Mai na iVolanikalou

Luke 10:38–39; 3 Nifai 11:23–26; 27:21

Mai na Keda iTukutuku Makawa

“Sa yaco na siko vuvale me dua na iwalewale me ra cakacakataka kina na marama Yalododonu Edaidai e vuravura raraba na loloma, na veivakamareqeti, kei na veiqaravi—me ra ‘vakayagataka kina na yalo ni loloma sa teivaka koto na Kalou e lomaseremuni,’ me vaka e vakavuvulitaka o Josefa Simici.”²

A vakavinavinaka e dua na marama ka se qai mate wale na watina ena vukudra na dausiko vuvale: “E rau a rogoci au. E rau vakacegui au. E rau tagi vata kei au. Ka rau mokoti au. … [Ka rau] vukei au mai na yaluma titobu kei na rarawa ena vica na vula taumada ni galili.”³

Na veivukei ki na veiqaravi ni bula oqo sa oka talega me dua na ituvaki ni veiqaravi vakalotu. Ena koniferedi raraba ni Okotova 1856, a vakaraitaka kina o Peresitedi Brigham Young ni ra sa laki tao tu na painia ni qiqi dreti ena vavaku ni uca cevata rauta ni 270–370 na maile (435–595 kilomita) na kena yawa. A kacivi ira kina na Yalododonu Edaidai e Salt Lake City mera laki vueti ira mai ka “mera vakayacora vakadodonu sara na veika o ya eda vakatoka me ka vakayago.”⁴

E vola o Lucy Meserve Smith ni ra a luvata sara ga e kea e valenilotu na marama na nodra likueloma katakata kei na sitokini ka vakavodoka ki na qiqi me kau yani vei ira na painia era sa batabata sivia sara tiko. Era sa qai vakasokomuni iyaya ni moce kei na isulu me baleti ira era na lako mai ka lailai ga na nodra isulu. Ni gauna era yacoyaco mai kina na kabani ni qiqidreti, sa vakasinaiti tu e dua na vale e taoni ena “iyaya me baleti ira.”⁵

Vakayadudua, mai vei Walter Rane, lolomataka mai na Church History Museum