Erau vakavulici ira na lewenilotu mai Argentina o Elder Christofferson kei Elder Jensen

Ena Vakarauwai, na ika 12 ni Noveba, 2011, erau a vosa kina vei ira na itabagone, itabagone qase cake, veiliutaki ni matabete, daukaulotu, kei ira na lewenilotu mai Salta e Argentina o Elder D. Todd Christofferson ena Kuoramu ni iApositolo Le Tinikarua kei Elder Jay E. Jensen ena Mataveiliutaki ni Le Vitusagavulu.

A tiko talega kina o Elder Mervyn B. Arnold, na peresitedi ni iWasewase na South America South; na watina o, Devonna; kei Elder Ruben Spitale, na Vitusagavulu ni iWasewase. Erau tiko talega o Kathy na wati Elder Christofferson, kei Lona na wati Elder Jensen.

E voleka ni 1,300 na itabagone kei ira na itubutubu era a tiko ena yasanibuka ka rau a vosa ruarua kina o Elder Christofferson kei Elder Jensen. E 10,000 tale na lewenilotu ena 70 na valenilotu ni iteki e lomai Argentina raraba era sarava ena kakaburaki.

E kaya kina o Elder Jensen, ka a veiqaravi vaka-Peresitedi ni iWasewase na South America South ena dua na gauna, “Kevaka o ni na sega ni nanuma rawa e dua na ka au cavuta, Au vinakata ga mo ni nanuma na nona malanivosa e dua na parofita, o Peresitedi Thomas S. Monson, o koya au vakadinadinataka ni parofita dina ni Kalou. Oqo na malanivosa: ‘Na lewa e tau ena vakatau kina na keda itinitini.’”

E tu vei keda na galala ni digidigi—na noda rawata kei na dodonu me da vakatau lewa—e kaya o Elder Jensen, ia ena veilewa oqori eda digitaka kina na keda itinitini.

A talanoataka na kena italanoa e dua na nona itokani ka a digitaka ena dua na bogi me gunu qai draiva, qai vakavuna e dua na vakacala ka erau mate kina e lewe rua. A vakatautavatataka kei na italanoa ni nodrau digidigi kei na watina me rau vakadaroya na vakawati me rawa ni laki kaulotu o koya ena nona gauna ni cauravou.

“Niu lesu mai keirau qai laki vakamau ena loma ni valetabu. Keirau a veiyalayalati, ka keirau dau vakavouya tiko e veimacawa ena neirau bula taucoko. Keirau a vakatauca e dua na lewa ka sa macala kina na keirau itinitini,” e kaya o koya.

A tarava o Sisita Christofferson, ka wasea na nona ivakadinadina me baleta na veivakalougatataki ni kena vakarokorokotaki na veiyalayalati, qai tinia na soqoni o Elder Christofferson.

“Na ka ga o gadreva dina oya na loloma kei na vakabauta,” e kaya o Elder Christofferson. “Sai koya na vakabauta ena vukei keda ena noda bula vakawati, matavuvale, cakacaka o kenadau, [kei na] nomu cakacaka.”

E vakabibitaka o koya ni ivakaro ena dusimaki kina na noda bula ka vukei keda me da rawata na veika e bibi dina.

E qai vakasalataki ira na itabagone kei ira na nodra itubutubu me ra yalataka me ra dau muria na ivakasala e kunei ena ivolalailai ni Me iSakisaki ni iTabagone.

E kaya o koya “oqori ena vaqaqacotaki ira vakalevu sara na luvemuni, ena gauna sara mada ga era raica ni ra tiko duadua kina—na nodra kila ni o ira talega na nodra itubutubu era vauci ira tu ena ivakavuvuli vata.”

E tinia o Elder Christofferson ena nona vakaraitaka na nona loloma vei ira na lewenilotu mai Argentina, na vanua a kaulotu kina rauta e voleka ni limasagavulu na yabaki sa oti.

Ni rau tiko voli mai Salta, erau a sota talega o Elder Christofferson kei Elder Jensen kei ira na daukaulotu mai kea kei ira na itabagone qase cake, ka rau vakadewataka vei ira na nodra iloloma na iTokani iLiuliu.