Gauna ni Veivosaki

Sa vinaka, kemudou. Qo na gauna ni veivosaki,” e kacivaka mai o Na.

Sa nanamaki tiko mai ena siga taucoko o Josie ki na gauna ni veivosaki. Ena veiyakavi taucoko eratou dau soqoni vata ena rumu ni gade o Josie kei rau na ganena lalai, o Ben kei Wes, kei rau o Ta kei Na me veivosakitaki na veika e dui yaco tiko ena nodratou bula.

Sa tukuna tu o Ta ni na vukei Josie ena bogi nikua me vakatovotovotaka na nona vosa ena gauna ni kacikacivaki ena mataka. E dua na ka dokai na kena dau wiliki na veika me kacivaki ena koronivuli nei Josie. Ni mataka ena lagata o Josie e dua na tiki lailai ni nona sere taleitaki ena gusu ni vosavosa ni koronivuli ka kacivaka na veika ena vakayacori ena siga ko ya kei na ivakasigalevu.

E cici yani ki na rumu ni gade o Josie, ena vakanuinui me vakatovotovotaka na nona tikina wiliki.

“Qori nodatou dau kacikacivaki rogolevu!” E kaya o Ta ni rika yani o Josie ena idabedabe e yasana. “E vakacava na nomu nanuma me baleta ni mataka?”

“Au sa nanamaki tiko ia au rere toka vakalailai. Au rerevaka deu na vakacala e dua na ka e matadra na koronivuli taucoko,” e kaya o Josie.

“Qori na vuna eda dau vakatovotovo kina,” e kaya o Ta.“Wilika na nomu tikina, kau na vakarogoca eso na vanua e rawa ni o vakavinakataka.”

“Vinaka, Ta,” e kaya o Josie.

Erau railesuva vakavica vata kei Ta na nona tikina sa sega ni wilika rawa o Josie. Qai tucake o Josie me vakaraitaka ena iotioti ni gauna na nona tikina vei iratou na nona matavuvale. Erau vakayaloqaqataki koya o Na kei Ta. E sota na ligadrau kei Ben, ka matadredredre qai vakasausau o Wes.

E laki moce o Josie ena marau kei na yalodei.

E toso vinaka na ka taucoko ena siga ka tarava. E dina ni a rere vakalailai, ia a matadredredre o Josie ni rogoca na nona ivakatagi ena gusunivosa ni koronivuli. A marau ni vakatovototaka na nona tikina kei Ta, ka wilika vakamalua matata ka sega ni dua na kena cala.

“Totoka na kena oya,” e kaya o Mrs. Blake, na ivukevuke ni qasenivuli liu.

Ni sa oti na siga ko ya, a tucake tu ena laini ni wawa basi o Josie. A vuki mai e dua na gonetagane qase cake, “O iko beka na goneyalewa ka wilika na veika kacivaki nikua?”

A matadredre o Josie “Io,” e kaya.

“Na cava o digitaka kina na sere oya?” e taroga na gonetagane. “Sa rui sere matemate. O sa vakacacana sara ga na kacikacivaki ena mataka.” Qai kacivi koya ena dua na yaca ca ra qai veidredrevaki kei ira na nona itokani.

A dabe taudua toka o Josie ena idabedabe e liu ni basi. E vaka me tauvimate na ketena.

Ni yaco yani ki vale o Josie, e raica ni rau qito tiko o Na kei Wes.

“Na, au kila ni se bera na gauna ni veivosaki, ia au nanuma de rawa ni daru sa veivosaki ena gauna oqo,” e kaya o Josie.

“Donu, Josie,” e kaya o Na. “Na cava e yaco? E dua beka na leqa ena kacikacivaki ena mataka?”

“Sega,” e kaya o Josie. “Daumaka na ka taucoko. Au a nanuma vakakina, me yacova ni qai tukuna vei au e dua na gonetagane niu digitaka e dua na sere matemate. E vakatoka talega vei au e dua na yaca ca.”

E tavia na vuloa e yasana o Na. E lako yani o Josie ka dabe. E mokoti koya o Na. Erau veitalanoataka o Josie kei Na na veika kece e yaco ena siga oya, oka kina na veivakacaucautaki nei Mrs. Blake.

“Isa vosota ni ratou vosa vakaca vei iko na gonetagane oya kei ira na nona ilawalawa,” e kaya o Na. “Ia e vaka ni ra a marautaka eso na tamata o dau rokova, me vakataki Mrs. Blake, na nomu wilika na veika me kacivaki. Keirau sa dokai iko dina kei Ta. O a cakacaka vakaukauwa, ka basika na vuana!”

A mokoti Na tale o Josie. “Vinaka Na,” e kaya o Josie. “Au sa logavinaka sara ga.” A marau o Josie ni rawa me gauna ni veivosaki na gauna kecega.