Noda Gauna ni Vosa kei na Vakarorogo

Mai vei Rosemary M. Wixom

Peresitedi Raraba ni Lalai

Mai na dua na vosa kaburaki ena setilaiti ni koniferedi ni iteki e Salt Lake City ena ika 24 ni Okotova, 2010.

Ena vakalougataka tawamudu na noda matavuvale ni da gadreva dina meda veirogorogoci vakavinaka nikua.

iVakatakilakila

Rosemary M. Wixom

Ena dua na vuravura vinaka era na lesu i vale na gone yadua mai koronivuli mera kidavaki mai ena keke jokeliti buta katakata vinaka, dua na bilo sucu batabata, ka tu vakarau o tina me vosa ka vakarorogo ki na nona siga o gone. Eda sega ni bula tiko ena dua na vuravura e vinaka vakaoti, ia sa rawa me kau laivi na keke kei na sucu, kevaka o vinakata, ia kakua ga ni kauta laivi na “gauna mo vosa ka vakarorogo kina.”

Ena ruasagavulu ka ciwa na yabaki sa oti, a rarawataka kina o Peresitedi James E. Faust (1920–2007), na iKarua ni Daunivakasala ena mataveiliutaki Taumada, ni sa lailai tiko na nodra gauna vata na matavuvale. Vakasamataka mada o ya ena—29 na yabaki sa oti—a kaya ena koniferedi raraba: E dua vei ira na leqa bibi ni matavuvale nikua ni sa lailai tikoga mai na noda gauna vata. … Na gauna vata oqo sa gauna talei duadua—na gauna me ia kina na veivosaki, na vakarorogo, na veivakayaloqaqataki, kei na kena vakaraitaki na sala me vakayacori kina na veika eso.”¹

Ni da lako vata mai ka vosa vei ira na luveda, eda na kilai ira ka ra na kilai keda. Meda vakaliuca, na noda dui gagadre dina ni yaloda, ni na yaco me tiki ni noda veivosaki kei ira na luveda yadua.

Na cava beka na itukutuku bibi duadua mai na yalomu ko na digia mo wasea vei luvemu?

E vakavulica vei keda o parofita Mosese ena Vakarua:

“Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kecega.

“Ia na vosa oqo, kau sa vakarota vei kemuni ena siga oqo, me tiko ga ena lomamuni:

“Ia mo ni gumatua mo ni vakavulica vei ira na luvemuni, ka dau vosataka ni kemuni sa tiko ena nomuni vale, ni kemuni sa lako voli talega ena sala, ka ni kemuni sa koto sobu, ni kemuni sa duri cake talega” (Vakarua 6:5–7; vakamatatataki).

Meu kuria tale e dua: “Ena gauna talega dou sa kana vata tiko kina.”

Kevaka eda sa gadreva dina me laki duavata tawamudu na noda matavuvale, meda sa tekivutaka sara ga nikua na kena cakacaka. Na noda vakayagataka na gauna meda veivosaki kina kei ira na luveda sa iyau maroroi ki na noda matavuvale tawamudu ni da lakova vata tiko yani na salatu ki na bula tawamudu.

E dua na marama tina e Illinois, mai Amerika, e wasea na sala a vakayagataka kina na gauna me vosa vei ira na luvena:

“Ena gauna era se lalai kina na luvei keirau, au dau maqusa toka na sarava e vica na parokaramu taleitaki ena retio-yaloyalo. … E ka ni rarawa, ni parokaramu oqo e qai dau vakaraitaki mai ni ra sa laki moce na gone.

“… Ena dua na gauna au raica niu sa mai vakaliuca sara tiko na noqu parokaramu oqo ka biuti iratou sara toka e ra na luvequ. Vakalailai ga au saga meu wili italanoa ni ivakamoce ni waqa tiko na TV, ia au sa kila tu e yaloqu ni sega ni sala vinaka oqo. Niu vakasamataka vakatitobu na siga kei na macawa au vakalusia ena sara TV, au sa kila niu cala ka saga meu sa na veisau. E a taura toka e dua na gauna meu vakadeitaki au ni sa rawa meu bokoca dina na TV.

“Ni oti e rua na macawa na noqu bokoca tu na retio-yaloyalo, au vakila ni sa takali tani e dua na icolacola levu. Au vakila niu sa vinaka mai, ka savasava cake mai, kau kila niu sa digidigi donu.”²

E gauna vinaka ni veivosaki na gauna ni moce.

E kaya kina o Ilamani baleti ira na sotia qaqa, “Era a tukuna vei au na nodra vosa na tinadra, ka ra kaya tale: Keimami sega ni vakatitiqataka na nodra ivakavuvuli na tinai keimami” (Alama 56:48).

A vakavulici ira na nodra “vosa na tinadra.” E na nodra vosa vei ira na luvedra, era sa vakavulica tiko na tina o ya na vosa ni Kalou.

Maroroi na Veivosaki Vaka-Tamata Yadudua

E vuqa sara na veika vinaka e lako mai na veivosaki, ka sa kila vakavinaka tiko o vunimeca na kaukauwa ni vosa. E dau taleitaka o koya me vakarusa na yalo e yaco mai ki na noda itikotiko ni da dau veivosaki, veivakayaloqaqataki vakai keda, ka cakacaka vata.

A takiveiyaga na nona saga o Setani me tarova na vakalesuimai ni kosipeli i Jisu Karisito ena itabagauna oqo ena gauna a saga kina me tarova na nodratou veivosaki bibi o Josefa Simici kei na Kalou na Tamada vata kei na Luvena, o Jisu Karisito.

Ena nona vosa o Josefa, “Sega ni dede sa vaka e vesuki au e dua na kaukauwa ka vakamalumalumutaki au sara; ia sa curumi au sara ka vesuka na wa ni yamequ, meu sega kina ni vosa rawa” (Josefa Simici—Ai Tukutuku 1:15).

Sa dau vinakata tu o vuni ca me vesuka na yameda—me na tarova na noda rawa ni vakaraitaka vakavosa na lomada e matanavotu. E taleitaka o koya na veiyawaki kei na veivakataotaki; e taleitaka na rorogo; e taleitaka na veivosaki vakatani—me tarovi keda mai na katakata vinaka ni dua na domo kei na yalo taleitaki e yaco mai na veivosaki ena veiraici mata ki na mata.

Vakarorogo ki na Yalodra na Luveda

Na vakarorogo sa ka bibi talega me vaka na vosa. E kaya kina o Elder Jeffrey R. Holland ena Kuoramu ni iApositolo Le Tinikarua: “Kevaka meda vakarorogo ena loloma, e sega ni gadrevi meda leqataka na veika meda tukuna. Ena solia vei keda … na Yalotabu.”³

Ni da vakarorogo, eda raica na yalodra era tiko wavoliti keda tiko. Sa tiko na ituvatuva nei Tamada Vakalomalagi me baleti ira yadua na Luvena. Vakasamataka mada kevaka meda ilova rawa na ituvatuva yadudua baleti ira na luveda yadudua. Vakacava beka kevaka meda kila na sala me vakalevutaki kina na nodra isolisoli vakayalo? Vakacava beka keda kila na sala mera vakauqeti kina e dua na luveda me yacova na nona rawa-ka? Vakacava beka keda kila na sala mera vukei kina na luveda yadudua mera veisau mai na vakabauta vakagone ki na ivakadinadina?

Eda na kila vakacava?

Eda na kila ke da vakarorogo.

E kaya e dua na tama Yalododonu Edaidai: “Au dau cakavinaka vakalevu cake niu dau vakarorogo vei iratou na luvequ mai na noqu vosa vei iratou. … Au sa vulica rawa mai ni ratou sega ni vinakata na luvequ na noqu ituvatuva tudei, ivakasala makawa, kei na isau ni taro vuku. … Vei ira, ni ra taroga na nodra taro ka veivosakitaka na nodra leqa sa ka bibi cake mai na nodra ciqoma na noqu isau ni taro. E dau yaco ni sa oti na nodra vosa, kevaka au a vakarorogo vakabalavu ka vakavinaka, era na sega sara ni gadreva na noqu isau ni taro. Era sa kila oti na isau ni taro.”⁴

E taura na gauna me raici vakatabakidua na veika e bibi cake. Na veivosaki, na vakarorogo, kei na veivakayaloqaqataki e sega ni yaco ga vakasauri. E sega ni rawa mera vakusakusataki se tuvanaki—era yaco ga ni toso na gauna. Era yaco oqo ena gauna eda vakayacora vata na veika eso: na cakacaka vata, bulibuli vata, ka qito vata. Era yaco oqo ena gauna eda vakatikitikitaka kina na itukutuku raraba, kauta laivi na veivakataotaki kei vuravura, ka vakatabakiduataki vakai keda.

Ia oqo, e ka dredre me vakayacori. Ni da tagutuva ka bokoca na veika kecega, meda na tu vakarau ki na veika ena tarava mai. Ena tekivu na vakanomodi ena dredre; ka na yaco me vakilai na takali ni ituvaki eso. Mo vosota, wawa me vica na sekodi, ko na qai marautaka. Mo vakarorogo vagumatua sara vei ira era tiko wavoliti iko ena nomu vakatarogi ira ka mo qai vakarorogo. Kemuni na itubutubu, ni veivosakitaka na nodra ka talei na gone. Dredrevaka na veika sa sivi—ka mo qai tatadrataka na veisiga ni mataka. Na veivosaki vakaveiwali ena rawa talega ni laki dua na veivosaki vakaibalebale cake.

Vakaliuci ni Noda iNaki Tawamudu

Ena vula itubutubu sa oti, au a laki sikova e dua na kalasi ni goneyalewa, a kerea kina o qasenivuli mera vola na kalasi e 10 na veika me vakaliuci. Au sa tekivu sara meu vola. Meu tukuna eke, na imatai ni noqu vakanananu a tekivu ena “Naba 1: samaka na drowa ni penikau e valenikuro.” Ni sa volai oti na lisi, a kerei keimami na iliuliu ni Goneyalewa me keimami wasea na veika keimami sa vola. O Abby, ka se qai yabaki 12 tiko, a dabe toka e yasaqu. Oqo na lisi nei Abby:

Gole ki na koliji.
Meu dua na daudroini ni loma ni vale.
Laki kaulotu ki Idia.
Laki vakamau e valetabu vua e dua sa kaulotu oti.
Me lima na luvequ ka dua na noqu itikotiko.
Vakauti ira na luvequ mera kaulotu kei na vuli ena koliji.
Meu dua na bubu “dausoli keke.”
Vakasasameni ira na makubuqu.
Vulica vakalevu na kosipeli ka marautaka na bula.
Lesu ka laki bula vata tale kei Tamaqu mai Lomalagi.

Au a kaya, “Vinaka vakalevu, Abby. O sa vakavulica vei au na veika e baleta na noqu raica na ituvatuva ni Tamada Vakalomalagi baleti keda. Ena gauna o kila ni ko sa taubaletaka tiko e dua na salatu, se cava ga na kena veigoleyaki e yaco, ko na vinaka tikoga. Ni sa vakatabakidua tiko na nomu salatu ki na inaki cecere—o ya na bula vakalou kei na lesu vua na Tamada Vakalomalagi, ko na yaco kina.”

Na vanua cava a kauta mai kina o Abby na kila na inaki tawamudu? E tekivu ena noda itikotiko. E tekivu ena noda matavuvale. Au a tarogi koya, “Na cava o cakava e nomu matavuvale mo vakaliuca kina na veika oqo?”

Oqo na isau ni nona taro: “Keitou wilika na ivolanikalou, vata kei na vulici na Vunautaka na Noqu Kosipeli.” A tomana tale o koya, “Keitou dau veivosaki vakalevu—ena lotu vakamatavuvale, ena gauna ni kana vata, kei na gauna ni vodo motoka.”

A vola o Nifai: “Ia eda sa tukuni Karisito, ka rekitaki Karisito, ka vunautaki Karisito.” Cava na vuna? “Me ra kila kina na noda kawa na sala me bokoci kina na nodra ivalavala ca” (2 Nifai 25:26).

Na veivosaki, vakarorogo, veivakayaloqaqataki, ka cakacaka vata vakamatavuvale ena kauti keda vakavoleka vua na noda iVakabula, sa daulomani keda. Na noda gagadre dina meda veirogorogoci vakavinaka nikua—edaidai sara ga—ena vakalougatataka na noda matavuvale. Au sa vakadinadinataka ni gauna eda tukuni Karisito kina, eda sa rekitaki Karisto talega vata kei na isolisoli ni Veisorovaki. Ena yaco mera kila na luveda “na ivurevure cava mera na rai kina me bokoci kina na nodra ivalavala ca.”