Ou Te Filifili le Mea Sa’o e ala i le Ola ai i Mataupu Faavae o le Talalelei

E mafai ona e vaai faalemafaufau e alu i se misiona ma le le iloaina o le taimi o le a e toefoi mai ai i lou aiga? O le a sou lagona? O le a se mea e te faia e saunia ai?

Sa malaga atalii e toafa o le Tupu o Mosaea—Amona, Arona, Ominea, ma Himinae—ma la latou uo o Alema i se misiona e 14 tausaga. Sa ono mafai lava ona avea atalii taitasi o Mosaea ma tupu o o latou lava atunuu, ae nai lo lena, sa latou mulimuli i o latou loto. Sa latou liua ma Alema i le talalelei a Iesu Keriso, ma sa latou mananao ai e faasoa atu le talalelei ia sa Lamana, o latou fili.

Sa iloa e alii talavou sa le mafai ona latou faataunuuina a latou misiona e aunoa ma le mana mai le Atua. Ua faamalamalama mai i le Alema 17:2–3 le auala na latou maua ai lenei mana: “Sa latou suesue i tusitusiga paia ma le filiga, ina ia latou iloa le afioga a le Atua. … Sa latou tuu atu i latou lava i le tatalo tele, ma le anapogi; o lea na i ai ai ia i latou le agaga o faaaliga, ma a latou aoao atu, sa latou aoao atu ma le mana ma le pule mai le Atua.”

O le anapogi ma le tatalo sa fesoasoani ai i nei alii talavou e maua ia faamanuiaga mai le Atua. E pei lava o Alema ma atalii o Mosaea, e mafai foi ona e anapogi ma tatalo ia saunia ai e maua ia faamanuiaga ua i ai i le Tama Faalelagi mo oe.