Ou Te Fia Nofo i Aao o Iesu

Sa na o le fa tausaga o le atalii o le ma tama ae piki e se leoleo mai tafatafa ala o le alatele lautele. Sa ia fai mai o loo alu i le fale o tinamatua, pe tusa e lima maila (8km) le mamao.

O le taimi lona lua lea ua sola ese ai mai le le fiafia i le aiga, ma taumafai ai ia oo mai ia te au. I ni nai masina e sosoo ai, sa oo ai ina ou iloa o le tiutetauave o le tausiaina o le tama a la’u fanau ma ona tuafafine laiti e toalua atonu o le a pau lea i luga o o’u tauau—o se manatu ou te le i sauni e taliaina.

Sa ma faia ma lo’u toalua le mea sili ma te mafaia e tausi ai le ma fanau i mataupu faavae o le talalelei, ae e uma ane lava latou te teenaina na matupu faavae. Sa ou oo i le vaitau o le 50 o o’u tausaga ma lagona ai ua i’u lava ina ou maua le aia tatau e saili ai mea ou te fiafia i ai au lava ia. Sa ou faamemelo i le ma sini ma lo’u toalua e auauna faatasi atu i se misiona pe a litaea o ia. O le manatu o le o e fai faatauga o meaai faatasi ma tamaiti laiti e le i oo i le taimi e aooga ai, faatulagaina o taimi o taumafataga, faia o le faitau afe o uta o tagamea, ma i se isi aso o le a toe faatina ai i ni talavou na ou tagi ai.

Peitai, i se tasi aoauli, sa i ai se mea na suia ai lo’u loto. O se mea itiiti na le fiafia ai le tama o la’u tama, o lea na ou sii ai o ia i o’u vae ma solo ese ona loimata. A o ou siiina o ia, sa ma talanoa e uiga i le alofa tele o Iesu ia te ia. Sa lata ane se kalena sa tautau i le puipui o loo i ai ni atavali o le Faaola, o lea na ma matamata ai taitasi i na ata matagofie.

Sa fiafia faapitoa le tama a la’u tama i se ata o le Faaola o loo nofo i luga o se maa i se faitotoa faatasi ai ma se teneitiiti laitiiti lauulu enaena i Ona aao. I le atavali, o loo atagia mai ai i le Faaola ma le teneitiiti le filemu. Sa faataupupula atu i ai le tama a la’u tama, tusi le lima i le teineitiiti, ma valaau o ia i le igoa o lona tuafafine.

“E mafai faapefea ona nofo ia Katie i vae o Iesu, Tinamatua?” na ia fesili mai ai. “Ou te fia nofo foi i Ona vae!”

“E le mafai ona e nofo i vae o Iesu i le taimi nei, pele, ae e mafai ona e nofo i o’u vae,” Sa ou fai atu ai. “Ua tuu mai e Iesu i tamaiti laiti ia tinamatutua e alolofa ia i latou ma tausi i latou i taimi latou te manaomia ai.”

Sa faafuasei ona opomau e lo’u loto se lumanai o le agaalofa—semanu e alofa ai le Faaola—i tamaiti pele e toatolu o e sa manaomiaina au. Sa le i toe avea i latou ma se avega ae o se faamanuiaga matagofie ma se avanoa e auauna atu ai i le Alii.

O le a ou faafetai pea e faavavau mo le alofa mutimutivale agamalu o le Alii na tuuina mai ia te au i lena aoauli. Sa suia ai lo’u olaga ma faaauau ai pea ona faamalosia ma faamanuia ai lo matou aiga.