Faafetaiaia o le Lumanai ma se Faamoemoe

Sa avea Uso Arnaldo Teles Grilo ma se tasi o a’u uo mamae ina ua 20 ma ona tupu ou tausaga. I le 62 o ona tausaga, sa valaauina ai Uso Grilo, o le taimi lena ua avea ma se enisinia litaea, e avea ma se tasi o o’u fesoasoani i le au peresitene o le mea sa ta’ua i lena taimi o le Itu o Oeiras Potukale, lea na ma galulue faatasi ai mo le tele o tausaga.

O lona atamai ma le poto masani na ou maua ai, o se taitai perisitua talavou, le tele o fautuaga taua ma malamalamaaga. I lona natura o ia o se tagata e talitonu i mea lelei; na te vaai pea i le itu lelei o tulaga uma ma e i ai sona uiga agamalie lelei. O ona uiga faaalia o se puna lea o musumusuga sili i le toatele e siomiaina o ia ma e patino lava ia te au ona ou te iloaina ni luitau faigata sa fetaia’i ma ia.

Ina ua uma ona faauu mai o ia o se enisinia, sa auai Uso Grilo i le National Agronomic Agency o se tagata suesue i Potukale ma mulimuli ane malaga i se tasi o nuu i Aferika o loo nofoia e tagata Potukale, e taitaia se galuega faatino o le suesuega o le vavae. Na taitai atu e le galuega faatino o ia i se galuega faamanuiaina i le avea ai ma se pule sinia i se faletupe faavaomalo tele i lena atunuu. I le taimi lea toeitiiti atoa le 30 tausaga i Aferika, sa ia tausia ai se aiga matagofie ma olioli ai i se olaga lelei seia oo ina faafuasei ona toe faafoi faamalosi atu lona aiga i Potukale ona o faalavelave o fetauaiga ma taua.

Sa tuua e Uso Grilo ma lona aiga mea uma sa latou galulue ai—o a latou meatotino ma mea na umia patino—ina ua molimauina e i latou lava ia aafiaga faataumaoia o taua i se atunuu sa latou fiafia ai.

E ui i le le mautonu ma fevesiaiga na tupu mai se taua lea na faasolo ina aveesea atoa ai le filemu ma le tulaga mautu i le taimi o lona i ai i le masina mulimuli i Aferika, ae sa laveaia e Uso Grilo se tasi o ana uo e ala i le tuuina atu ia te ia o se taavale taugata sa ia faatauina i Siamani. Na mafai ona sosola ese lana uo ma lona tina i le taavale mai le taua.

O le anoanoai o meatotino faalelalolagi ia na maua e Uso Grilo i lona olaga galue malosi sa lei faapogisaina ai mea sa ia faamuamua. Sa ia taula ma le tumau i mataupu faavae mautu ma le alofa mo lona aiga.

I le toe foi atu i Potukale i le 52 o ona tausaga, sa ia fetaia’i ai ma le tulaga moni o le toe amataina o mea uma mai le selo. Faatasi ai ma nei faigata ma faalavelave uma, o le a le mea sa faia le eseesega i lona olaga? Aisea na ia manatu tele ai i le lelei i le taimi nei ma le lumanai? Aisea na ia matua talitonu ai?

Sa liliu mai ia Uso Grilo i le popofou o le Ekalesia i Potukale ma avea ai ma se poutu malosi ma se paionia i lena atunuu. E tele ni taimi sa ia taitai atu ai lona aiga i le malumalu i Suitiselani, ma malaga ai i le 2,800 maila (4,500km) i le alu ma le toe foi mai i se faailoaga o le faatuatua ma le tuuto. I le aluga o tausaga o lana auaunaga, sa aumai ai e Uso Grilo ma lona faletua le olioli i le la fanau ma le toatele o isi.

Sa faatotonugalemu le faatuatua o Uso Grilo ia Iesu Keriso ma le malamalama e faapea i le faaiuga, o le a nofotupu ia Iesu Keriso. O le mea lea sa ia maua ai le faamoemoe i le taimi nei ma le lumanai.

Sa faaiuina le Feagaiga Fou i se savali o le faamoemoe sili.¹ O Perofeta e pei o Ioane le Talifaaaliga na vaai i mea o le a oo mai ma ta’u mai ia i tatou ia faamanuiaga tatou te mauaina pe afai tatou te tumau ma le amiotonu ma onosai e oo i le iuga.

Sa vaaia e Ioane se tusi o loo i ai ni faailoga se fitu, po o ni vaitaimi, ma sa ia faamatalaina le auala o le a faasagatau ai pea Satani i e amiotonu (tagai i le Faaaliga 5:1–5; 6). Ae sa vaai foi Ioane o le a saisaitia Satani ma o le a nofotupu Keriso i le manumalo (tagai i le Faaaliga 19:1–9; 20:1–11). Mulimuli sa ia vaaia o le a nonofo faatasi e amiotonu ma le Atua pe a maea le Faamasinoga Mulimuli (tagai i le Faaaliga 20:12–15).

O se tasi o luitau sili o aso nei o le aoaoina lea ia faatoilalo le fefe ma le faanoanoa ina ia mafai ai ona faatoilalo tofotofoga ma faaosoosoga. E na o sina taimi lava tatou te faaaluina e susue ai se nusipepa, faasolosolo i le uepi, pe faalogo i se talafou o faasalalau mai i luga o le leitio po o le televise ina ia faailoa mai ai tala faavaivailoto o solitulafono ma mala faanatura o loo tutupu i aso uma.

O le malamalama i folafolaga o i tusitusiga paia e faatatau i le auala o le a faatoilalo ai e le Alii le tiapolo ma le auala o le a faatoilalo ai e le upumoni ia mea sese o le a mafai ona fesoasoani ia i tatou e fetaia’i ai ma le lumanai ma se faamoemoe ma le manatu i tulaga lelei. I le lalolagi i nei aso tatou te vaai ai i taua, mala faanatura, ma faafitauli tau le tamaoaiga. O nisi taimi o nei mea e tutupu ua le na o ni mea tatou te matauina mai se mea mamao ae o mea ua aafia patino ai lava i tatou.

E le o i ai se manaomia mo i tatou ia faanoanoa i le maumau o meatotino faalelalolagi pe ia uumau ai i mea faaletino, aua o na mea e mafai ona gaoia lo tatou olioli i mea faigofie ma le musuia o le olaga.

Ou te faafetai mo le faataitaiga a Uso Arnaldo Teles Grilo. Sa ia tausia muamua mea faaleagaga, o mea e “taua tele … ia te i [tatou] i aso e gata ai” (2 Nifae 25:8), e aofia ai mafutaga faaleaiga ma auaunaga i isi.

E tatau ona tatou fetaia’i uma i le lumanai ma se faamoemoe ona tatou te iloa o le a faatoilaloina ia malosiaga o le tiapolo. E tatau ona tatou faatumauina uma se vaaiga lelei a o tatou fetaiai ma luitau ona ua ia te i tatou i aso nei ia tusitusiga paia, o aoaoga a perofeta soifua, pule o le perisitua, malumalu, ma le lagolagosua o isi tagata taitoatasi o le Ekalesia. E tatau ona tatou “[o mai ai o ē] ua manumalo” ona o le tatalo (MF&F 10:5). Ma o le mea aupito sili ona taua, e tatau ona i ai so tatou faamoemoe i le ola e faavavau ona o le taulaga togiola atoatoa a le Alii (tagai i le Moronae 7:41).

A sa’o mea tatou te faamuamua, o le a tatou ola i se olaga sili atu ona faamauoaina ma faamanuiaina. O le faamuamuaina o le Alii, Lona malo, ma o tatou aiga o le a tatou maua ai le faamoemoe tatou te manaomia e fetaia’i ai ma luitau o le taimi nei ma le lumanai.