O Le Tusiga Lenei e FaaEperu

Ina ua maea ona ou faitauina le Feagaiga Tuai i ni tausaga ua mavae, sa ou maua se fiafia i ona aoaoga, aemaise lava i tusitusiga a Isaia, ma faaauau ai lava ona ou suesueina. I le 2010, sa ou nofo ai i talaane o se aoao Iutaia i se malaga a se vaalele. Sa ou amataina se talatalanoaga i le fesili atu ia te ia e uiga i ni mau i totonu o le Isaia. A o faagasolo le ma talatalanoaga, sa ma talanoaina le taua o le pule o le perisitua e pei ona malamalama i ai i le Feagaiga Tuai.

Sa fesili mai le aoao ia te au pe o fea e aumai ai e tagata o la’u ekalesia le latou pule o le perisitua. Sa vave ona ou maua le avanoa e tau atu ai ia te ia le Uluai Faaaliga a Iosefa Samita ma le toefuataiga o le Perisitua Arona ma le Perisitua Mekisateko. Sa ma talanoaina le faaliliuga o le Tusi a Mamona ma lona faamoemoega i le avea ai “O Se Tasi o Molimau ia Iesu Keriso.”

Sa pulunaunau mai le aoao. Sa ia fesili mai pe o le a le matua o Iosefa i le taimi na ia maua ai le Uluai Faaaliga. Ina ua ou tau atu ia te ia sa 14 tausaga o Iosefa, e talitutusa ma le matua o Samuelu o le Feagaiga Tuai, sa ia tali mai e tele perofeta na valaauina i lo latou talavou. Sa ia fai mai o se faiga tumau na valaauina ai e le Atua ia Iosefa Samita i lona talavou.

Sa ou susue a’u tusitusiga paia, ma ma faitau faatasi ai i molimau a le Toatolu ma le Toavalu. Sa ou tau atu ia te ia o nisi o molimau ua tuua le Ekalesia ae e leai ma se tasi na faafitia sa vaai i papatusi auro.

“Na faapefea ona latou tuua le Ekalesia ina ua maea ona latou vaai i se agelu ma papatusi?” sa ia fesili mai ai.

“Ou te manatua na fau e le fanauga a Isaraelu se tamaipovi auro ae faatoa uma lava ona latou molimauina le vaeluaina o le Sami Ulaula,” sa ou tali atu ai.

Sa ia sue i le 1 Nifae ma amata ona faitau. Sa ia taofi ma faapea mai, “O le tusiga lenei e faaEperu.”

Ona ia faamatala mai lea o le mafuaaga ua maua ai le tusiga i se faaliliuga faaPeretania o le faaEperu. Sa ou tau atu ia te ia na tusia le tusi e se ituaiga o Isaraelu. Sa ou ta’ua le Esekielu 37:15–20, lea e talanoa e uiga i le laau a Iuta ma le laau a Iosefa. Sa ma ioe uma o le laau a Iuta o le faatusa lea o le Tusi Paia, ma sa ou faamatala atu i ai o le laau a Iosefa o le Tusi a Mamona lea.

Ina ua uma le ma talatalanoaga e tolu itula sa faailoa mai e le aoao se naunau e fia maua se kopi o le Tusi a Mamona. Ina ua ou toe foi atu i le fale, sa ou lafoina ia te ia se kopi ua faapatinoina i la’u molimau tusitusia. Ou te faafetai i au taumafaiga e suesue le Feagaiga Tuai lea sa saunia ai au e talanoaina ia tusitusiga paia ma faasoa atu la’u molimau i la’u uo fou, se aoao.