Le Pisipisia mai le Lalolagi

O nai tausaga ua mavae, sa ou taunuu ai i le Malumalu o Bountiful i Iuta e faataunuu se galuega atofaina o le faamamaina i le leva o le po. Sa faagaeetia ona o le toatele na o mai i le galuega atofaina, ma sa ou mafaufau mo sina taimi pe o le a toe faafoi nisi i le fale. Sa ou sauni lava e ofo atu e toe vave alu. Ona ou mafaufau lea ma le faaulaula ia te au, “Ioe latou te le tuua nei matou e vave o. O le a latou suea ni mea e fai e faapasi ai le taimi mo i matou uma, ma le manatu ona o lo latou tiute le taofia o i matou iinei mo itula atoa e lua.” Sa ou manatuaina se galuega atofaina na muamua atu lea na ou tafi pefu ai mo le silia ma se itula, ae toefaafoi atu le fasi ieie sa ou faaaogaina o loo mama lava e pei ona sa i ai i le taimi na tuu mai ai ia te au. Sa ou saunia au lava ia e faaalu ia itula e lua e faamama ai mea e le o manaomia ona faamamaina. E manino lava, na ou sau i le malumalu i lena po e aunoa ma se lagona o se tiute e sili atu nai lo o se manao e auauna atu.

Sa taitai atu la matou vaega i se tamai falelotu mo se faigalotu. Sa fai mai e le teufale sa taitaia le faigalotu se tala o le a suia ai pea e faavavau le auala ou te vaai ai i galuega atofaina o le faamamaina o le malumalu. Ina ua uma ona faafeiloai i matou, sa ia faasolo loa ma faamalamalama mai e faapea matou te le o i ai iina e faamama ni mea e le o manaomia ona faamamaina ae ia faatumauina le maota o le Alii mai le faapalapalāina. I le avea ai ma tausimea o se tasi o nofoaga e sili ona paia i le lalolagi, ua ia i tatou se tiutetauave e faatumauina lona lē pisipisia.

Sa tuia lou loto i lana savali, ma ou alu atu ai i le nofoaga na tofi i ai au ma se naunautaiga fou e puipui le maota o le Alii. Sa faaalu lou taimi i se pulumu vaivai lava, ma tafiese ai pefu mai vaega ninii o faavaa o faitotoa, laupapa fola, ma vae o laulau ma nofoa. Ana faapea e aumai lenei galuega atofaina i se asiasiga muamua atu, semanu ou te manatu e faavalevalea ma fufulu ai ma le le faaeteete ia vaega i se taumafaiga e foliga mai o loo pisi. Ae o le taimi lenei, na ou faamautinoaina e oo atu nifo o le pulumu i pupu ninii.

Ona o lenei galuega sa le i manaomiaina faaletino pe faalemafaufau, o lea sa faamanuiaina ai au i le taimi e mafaufau loloto ai a o ou galue. Na muamua lava ou iloaina ou te le i gauai atu i na auiliiliga o minute i lou lava aiga ae faamama na vaega o le a muamua ona vaai i ai isi, ma lafoaia ai vaega na e na o au ma tagata o lou aiga e iloaina.

Sa sosoo ai ona ou iloaina e i ai taimi sa ou ola ai i le talalelei i se vaaiga tali tutusa—o le ola ai i mataupu faavae ma faataunuuina na tofiga e sili ona iloagofie e tagata sa siomia ai au, ae le amanaiaina mea ia e foliga mai e na o lo’u aiga patino po o au e iloaina. Sa ou auai i le lotu, umia ni valaauga, faataunuu ni tofiga, ma alu i asiasiga a faiaoga asiasi—sa mo na o le vaaiga atoa faaletagata mo lo matou uarota—ae lē auai soo i le malumalu, leai ni suesuega o tusitusiga paia ma tatalo faaletagata lava ia ma faaleaiga, ma lē faia ni afiafi faaleaiga. Sa ou aoao atu ni lesona ma lauga i le lotu ae o nisi taimi sa leai se alofa mama moni i lou loto pe a fegalegaleai ma isi.

O lena po i le malumalu, sa ou suesue ai le pulumu vali sa i lou lima ma fesili ifo ia te au lava ia, “O a ni faaletonu laiti i lou olaga o manaomia le gauai sili atu i ai?” Sa tonu ia te au, nai lo le fuafua e faamama soo vaega o lou olaga o loo manaomia ona gauai atu i ai, o le a ou taumafai malosi foi ia aua lava nei palapala.

Ou te manatua pea la’u lesona o le faamamaina o le malumalu i taimi taitasi e faamanatu mai ai ia i tatou ina ia tausia i tatou lava “ina ne’i pisia mai … le lalolagi” (Iakopo 1:27).