Manatu mo Afiafi Faaleaiga
O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O nisi nei o faataitaiga.
“O Le Malosiaga o La Tatou Talatuu,” itulau 16: Faitau faatasi ma lou aiga le tusiga. Faamamafa atu le faamatalaga lenei sa saunia e Elder L. Tom Perry: “Faapei ona faia e le au paionia ina ia fua mai le toafa e pei o se rosa, o le a faapena foi ona fua mai o tatou olaga faapea o tatou aiga pe a tatou mulimuli i a latou faataitaiga ma opo mai a latou tu ma aga masani.” Mafaufau e fesili atu pe faapefea ona mulimulitaia lelei e lou aiga le faataitaiga na faatuina e le au paionia anamua. Atonu e te manao e faaiu i le usuina o le pese “O Mai, Outou o le Au Paia” (Viiga, nu. 17).
“Faafetaiaia o le Lumanai ma se Faamoemoe,” itulau 35: Atonu e te manao e toe otooto atu le tala ia Brother Grilo pe faamatala se tala patino i le auala na e faafetaiaia ai le lumanai ma se faamoemoe po o se isi foi e te iloa. Fesoasoani i tagata o le aiga e faaaoga le savali o o latou olaga e ala i le faia o ni fesili e pei o le “O a nisi o luitau o loo faafaigata ai lou mauaina o le faatuatua i le lumanai? O le a se mea e mafai ona e faia e tumau ai i se uiga lelei a o e feagai ai ma nei luitau?” Mafaufau e faaiu i le faitauina o parakalafa mulimuli e lua o le tusiga.
“O Le A Le Molimau Manino?”, itulau 54: Amata lau lesona i le faasoaina atu o mea na aoaoina mai e le tusiga e faatatau po o le a le molimau. Ona mafaufau lea e otooto mai ni fesili e faatatau i le tuuina atu o se molimau (tagai i itulau e 56–57). Afai e uunaia, valaaulia ia tagata o le aiga e faasoa mai i tagata taitasi se molimau i le taimi o le afiafi faaleaiga pe tusi foi a latou molimau i a latou api o talaaga.
“O Se Musumusu o le Agalelei,” itulau 59: Faitau le Luka 6:27. Ona faasoa mai lea o le tala ia James ma Carson, ma taofi ae fesili atu i tamaiti e tali i fesili o loo tuuina atu i le pito i lalo o le itulau muamua. Uunaia tagata o le aiga ina ia agalelei atu i isi.
O Afiafi Faaleaiga e faia i “Fafo”
Ina ua 10 ou tausaga, sa matou papatiso faatasi ma o’u matua, tuagane, ma uso. E ese lo’u fiafia i lo’u ola ae o fai e le aunoa a matou afiafi faaleaiga. O afiafi faaleaiga o le fatu lea o lo matou aiga.
Ua silia ma le 45 tausaga talu ona avea au ma se tagata o le Ekalesia. O loo faaauau pea lea tu masani ma la’u lava fanau e toalima. E faasao lava po o Aso Gafua mo le aiga.
O le Aso Gafua mulimuli o le masina, e fai ai se matou gaoioiga e umi atu e ta’ua o le afiafi faaleaiga e faia i “fafo”. Matou te o i se tifaga, pe asiasi i e mamai, pe taaalo i le paka, pe asiasi ia Lola ma Lolo (o o matou matua matutua), ma isi mea faapena.
O le aafiaga sa sili ona le faagaloina na faia i fafo o le taimi lea na matou auauna atu ai i tamaiti e leai ni mea e nonofo ai. E le mafai ona matou faaalia le olioli ma le fiafia na matou lagonaina i le fesoasoani atu i na ituaiga manaoga. Sa matou taumafai, i sina ala itiiti, ina ia faafiafia nai tamaiti ma ta’u atu ia i latou o loo alolofa nisi ia i latou ma ia iloa o i tatou uma o fanau a le Atua.
Tita Mabunga Obial, Filipaina