E Sili Pe A E Tatalo Muamua

Toeitiiti lava a ou tuua le Ekalesia i se feeseeseaiga ma la’u peresitene o le siteki. Sa ou lagonaina na ia faia se mea sa le sa’o. Sa le i atagia mai i ana amioga le auala na ou manatu e tatau ona tutupu ai ni mea, o lea sa ou le toe alu ai i le lotu.

Sa fai mai lo’u toalua ia te au, “E le mafai ona e faia se faaiuga faapena e aunoa ma ni tatalo ma ni anapogi faatauanau.”

Sa sa’o o ia. Ina ua uma ona ou tatalo mo sina taimi, na manino ma tuusao le oo mai ia te au o upu nei: “O le auauna a le Atua e valaauina e le Atua.”

O lena po sa fai ai sa’u miti. I la’u miti sa aoa’i ai au e lo’u tamamatua i lo’u tetee i lo’u taitai. Ona ou ala lea mai la’u miti ma sa le toe mafai ona ou moe i le po atoa. Ina ua maea se po umi o le mafaufau loloto, sa ou iloa le mea e manaomia ona ou faia. Sa ou alu i la’u peresitene o le siteki ma faatoese i ai. Sa ia taliaina ma le fiafia la’u faatoesega, ma sa ma tatalo faatasi.

Sa vave ona ou toe foi i le lotu. I le lua vaiaso mulimuli ane sa siitia ai au e lo matou kamupani i Abuja, le taulaga o Nigeria. I le le mautonu, sa ou manatunatu ai pe aisea ua aveese ai au mai le siteki ina ua maea ai au taumafaiga e faaleleia au lava ia.

Na vave ona ou iloaina sa saunia au e le Alii. I lo’u masina lona lua i Abuja, sa valaauina ai au e avea ma se peresitene o se paranesi.

Ou te mautinoa lava sa finagalo le Tama Faalelagi e aoao au i le taua o le lagolagoina o taitai o le Ekalesia a o le i valaauina au e avea ma se taitai. O lenei aafiaga ua faamalosia ai la’u molimau. O lea la ua ou taumafai i le mea sili e gata ai e faalogo i fautuaga a o’u taitai ona ua ou iloa e valaauina i latou e le Atua. Ma o soo se tasi lava Na te valaauina, Na te faaagavaaina.¹

O o tatou taitai o tagata i latou. E ui e musuia i latou, ae e le atoatoa i latou. Sa ou aoaoina afai tatou te le malilie ia i latou, e manaomia ona tatou lagolagoina, faamalosiau, ma tatalo mo i latou ma i tatou ina ia mafai ai ona tatou faatuatuaina le Atua atoa ai ma auauna na Ia filifilia.