Pe o Le A E Tuuina Atu ea Lau Molimau?

Talu ai nei lava sa ou maua ai le avanoa e auai ai i le sauniga faamanatuga i se isi setete faatasi ma tagata o le Ekalesia ou te le masani i ai. Ina ia faia se talatalanoaga ma se uso sa i o’u talaane, sa ou fesili i ai pe o fuafua e tuu atu sana molimau pe a oo mai le taimi. Sa ia fai mai ioe ona fesili mai lea, “Ae a oe?”

“Leai, pei lava e leai,” sa ou tali atu ai. Ona ou faaopoopo atu lea, “Ae e moni le Ekalesia, ma e moni le talalelei.”

Sa vave ona galo ia te au le ma talatalanoaga puupuu. Ina ua amata ona tuu mai le avanoa mo molimau, sa fautuaina i matou ina ia faapupuu ina ia mafai ai ona toatele tagata e maua le avanoa e faasoa ai a latou molimau. Ina ua tu i luga le uso lea sa ou talanoa i ai ma faasoa mai lana molimau, sa ia faailoa mai e le lava le taimi e faasoa uma mai ai mea o manao i ai e uiga i le talalelei ma le fiafia ua ia aumaia. Ae, na ia faasoa mai upu o le ma talatalanoaga, o se tasi faatoa ia feiloai i ai, ma le auala ua aotele ai e la’u faamatalaga faigofie ia mea uma lava: e moni le Ekalesia, ma e moni le talalelei. O le mea lena e taua.

I le toe mafaufau ai i lena aafiaga, sa ou malamalama ai e mafai ona tatou tuu atua a tatou molimau i le tele o auala, ma e mafai ona maua ai se faatosinaga lelei i isi i sina taimi puupuu lava. E le afaina pe o le a le puupuu o le taimi tatou te fegalegaleai ai ma se tasi, e mafai lava ona tatou tuua se uunaiga lelei o le talalelei ma i tatou lava.

Ou te le i tuu atua la’u molimau mai le pulelaa i lena aso, ae sa faasoaina la’u molimau puupuu ma lagonaina ai la’u faatosinaga e le uso lea na ou talanoa i ai faapea ai ma i latou sa faalogo i lana molimau.