O se Pateta mo le Faiaoga

Ata

a red potato

Ata na pueina e Feng Yu/iStock/Thinkstock

I le avea ai ma se faiaoga i le aoga tulagalua mo le sili atu i le 25 tausaga, na ou maua ai le tele o mea malie mai a’u tamaiti aoga laiti. O faamatalaga le uigā, o ata tusi, ma galuega taulima fatufatua’i o meaalofa masani ia. Ae peitai, o le tausaga na te’a nei, o le taimi muamua lea na ou mauaina ai se pateta.

“O se pateta mo le faiaoga,” o le fai mai lea o Ema laitiiti ma le mitamita ina ua sau i la’u kesi, “ona e le’i i ai sa’u apu.” O se pateta e le telē tele, na fufulu mamā, ma manaia e fua atu i mea tau pateta. Sa ou faafetai atu ia te ia ma tuu i luga o la’u kesi. Sa ou vaaia le susulu o mata lapopoa lanumoana o Ema i le mitamita i soo se taimi e tilotilo i ai i le aluga o le aso.

Ina ua tuua le aoga, a o ou galue i la’u kesi, sa le mafai ona tatali lo’u manatu i le pateta ma se ataata alofa. E ese le faigofie o le vaai a tamaiti i mea, ma o lena pateta masani, na aoao mai ai e Ema se mea taua. Na silia ma se vaiaso na ou tuua ai i luga o la’u kesi ona sa avea ma se faamanatu ia te au.

I le avea ai ma se faiaoga asiasi ma se uso i la’u uarota, sa ou manao e auauna atu i isi, ae sa ou faatalitali i taimi uma mo se “apu” ona ou faatoa faaaluina lea o le taimi e fesoasoani ai. Afai sa ou pisi tele, ma lē mafai ai ona faia se sitiū faaopoopo, pe afai foi na ou manao e tuuina atu se fugalaau faapitoa ae ou te le’i alu i le faleoloa fugalaau, na ou le amanaiaina le leo malū ma le itiiti o musumusuga a le Agaga e uiga i se tasi o manaomia la’u auaunaga.

Sa ou faatalitonuina a’u lava e faapea, “O le a ou faia se mea i le faaiuga o le vaiaso lenei, pe a i ai so’u taimi.” “E leai se tagata e manaomia a’u i le asō.”

Ae faapefea pe afai o loo manaomia moni a’u e se tagata? Ae faapefea pe afai ou te lei le amanaiaina le uunaiga e asiasi atu i se tuaoi matua po o se tina talavou e lei leva ona maliu lana tane? Mata e mafai ona ou fesoasoani atu pe auauna atu foi, ma le mea e mafai ona ou ofoina atu i lena taimi—o se “pateta”?

Sa ou aoaoina se lesona telē mai ia Ema lea o loo ou taumafai malosi e faatinoina. Afai e le o i ai sa’u apu, ou te aveina atu se pateta, ma ua o’u faia nei. Ou te le faatali e fai se sikiū po o la’u pai kulimi tipolo faapitoa; nai lo o lena ou te faatauina se pusa kuki. E le masani ona ou alu atu i le faatau fugalaau, ae e mafai ona ou afe atu mo se talatalanoaga e aunoa ma se fugalaau. E manaia tele foi se kata e fai i le fale, ae e faapena foi se valaau puupuu atu i le telefoni. E le faapea e tatau lava ona faia se faailoaga maoae o se auaunaga i taimi uma lava. E tutusa lava ma le manaia o le faia o se faailoaga faatauvaa o le alofa.

Ua i ai nei i lo’u fale le pateta, ae ou te manatu o le a ou le aia lava. E avea o se faamanatu faifai pea e auauna atu pe a uunaia ai a’u. O le taimi nei, ou te tuuina atu le mea ou te maua nai lo o le faatali mo se taimi mulimuli mai. O se pateta mo le faiaoga sa o se meaalofa moni aupito sili ona manaia.