Auauna Atu ma Lou Loto Atoa
A o tatou aoao i le autu o le Mutuale mo le 2015, o se avanoa paia le auauna atu i le Atua. Matou te faamoemoe o le tausaga lenei, o le a iloa ai e i tatou taitoatasi ona auauna atu ma se tautinoga sili atu i le ala na aoao mai e le Faaola—ma o tatou loto atoa, mafaufau atoa, manatu atoa, ma le malosi atoa. E faapefea ona tatou faia lena mea? O ni nai manatu nei.
Muamua, tatou te auauna atu ma o tatou loto atoa. Ua tatou malamalama o le uiga o lenei mea, o lau auaunaga i le Atua e ao ona faaosofia e lou alofa ia te Ia ma Lana fanau. “O lo tatou alofa mo le Alii o le a pulea ai mea o loo manaomia mai lo tatou alofa, o mea o loo manaomia mai ai o tatou taimi, o mea tatou te fiafia i ai o loo tatou tulituliloaina, ma le faatulagaga o mea tatou te faamuamuaina.”1 E te faaali atu i le Alii lou alofa pe a e tausia Ana poloaiga (tagai i le MF&F 42:29). E te auauna atu i lou aiga ma faamalosia lou auaiga. E te faalauteleina lou valaauga ma aapa atu ia i latou e manaomia se uo. E te sueina igoa o le aiga e ave i le malumalu.
Lona lua, tatou te auauna atu ma o tatou mafaufau atoa. E manaomia ai galuega faatino ma taumafaiga filiga. O le galuega faafaifeautalai e manaomia ai le tumau ma le onosai. E te auauna atu ma le mafaufau atoa pe a e tali atu i manaoga o isi, “e pei o le fafagaina o e ua fia aai, faaoofuina o e ua lē lavalavā, asiasi atu i e mamai ma auauna atu mo lo latou mapusaga, faaleagaga ma faaletino” (Mosaea 4:26).
O le isi, tatou te auauna atu ma o tatou manatu atoa. O ou manatu e tatau ona mama ma lē ponā, ma taulai atu i le Faaola. Ua e osifeagaiga e manatua pea o Ia. E te sailia le taitaiga a le Agaga Paia e ala i le suesueina o tusitusiga paia ma le tatalo. A o e faaogatasia ou mafaufauga, upu, ma faatinoga ma le mafaufau ma le finagalo o le Atua, e te iloa manaoga o isi ma e agavaa ma saunia e auauna atu.
O le mea mulimuli, tatou te auauna atu i le Atua ma lo tatou malosi atoa. O se tasi o auala e maua ai le malosi o le faaaoga lea o le faatuatua i le Togiola a le Faaola. E te salamo ma faapaiaina oe lava e ala i le usiusitai i Ana poloaiga. E te lagona le mana gafatia o le Faaola ma molimauina vavega a o e auauna atu i le malosi o le Alii (tagai i le Alema 26:12).
A o e auauna atu i le Atua ma lou agaga atoa, ua Ia folafola mai o le a faamamaina oe mai agasala ma saunia e tu i Ona luma ma maua Lona mamalu e faavavau.