Tasi le Laa i le Taimi

O le mauaina o le taitaiga faaleagaga o se laasaga taua lea i le auauna atu i le Alii, ma ua iloa e Davide C., e 15 tausaga, o le a le tupu e aunoa ma se taumafaiga i lana pitolaau. “E manaomia ona avea a’u ma se meafaigaluega i aao o le Atua,” o lana tala lea. “E tatau ona ou saunia e maua ma mulimuli i uunaiga a le Agaga. Ina ia faia lena mea, e manaomia ona siomia a’u e le aunoa i mea a le Alii.”

O Davide ma lona aiga o ni tagata liliu mai i le Ekalesia. A o lei papatisoina o ia, sa iloa e Davide le taua o le suesue i tusitusiga paia. O lona uso o le tagata muamua lea na papatiso, sa lei umi ae sosoo atu ai ma ona matua. Na iloa e Davide na ia manaomia lana lava molimau. A o ia suesueina le Tusi a Mamona, sa ia lagonaina le Agaga. O lagona lelei sa ia lagonaina sa fesoasoani i lona faia o le faaiuga e auai i le Ekalesia.

E fa tausaga mulimuli ane, o faalagolago pea Davide i le taitaiga mai le Agaga. “E tatau ona tatou faaauau ai pea lava. E le mafai ona tatou faatalale i a tatou suesuega o tusitusiga paia ma tatalo,” o lana tala lea.

Ua faailoa mai e Marco D., 17, le taua o le usiusitai i poloaiga, aemaise lava o le tulafono o le ola mama. “E faaosooso i tatou e le fili i soo se auala lava, ma taumafai ia tatou faia mea sese,” o le tala lea a Marco. “E mafai foi ona avea uo ma se faatosinaga leaga.” I ni nai tausaga ua mavae sa tatau ai ia Marco ona sui ni uo e tafao ai ona sa ia iloaina ni faatosinaga lē lelei sa latou faia i ana filifiliga. “Na tatau ona ou sailia ni uo na taliaina au mo le ituaiga tagata ua ou i ai, ae le o le ituaiga tagata ua faamoemoe le lalolagi ia ou avea ai.”

O nisi taimi i la tatou feaeiga i luga o le mauga, tatou te tautevateva ai. Pe a tupu lenei mea, “alu e vaai le epikopo ma talanoa sa’o ia te ia,” o le faamalosiau mai lea a Marco. “O le epikopo o lo tatou uso. E mafai ona tatou faatuatuaina o ia.”

O ana taumafaiga ia usiusitai ma tumau i le mama na tuuina atu ai ia Marco ni avanoa e auauna atu ai i le Atua i le taimi nei, ma ua latou saunia ai foi o ia ia agavaa e auauna atu o se faifeautalai faamisiona i se aso.

Ua iloa e Manuel M., 17, e le o taimi uma e faigofie ai ona auauna atu i le Atua. “E masani ona tofotofoina i tatou,” o le tala lea a Manuel. “O nisi taimi e pei e sili ai lo tatou faia o isi mea. O nisi taimi e sili ai ona ou moe, alu i se taaloga soka, po o le tafafao ma au uo. Ae ua aoaoina a’u e lo’u tina i taimi uma e tatau ona tatou filifili e auauna atu i le Alii. E le afaina foi le fai o isi mea, ae o le auauna atu i le Alii e tatau ona ave i ai la tatou faamuamua.”

Ua iloa e Miriam D., 14, na pau lava le mea e mautinoa e tupu ai le suesueina o tusitusiga paia ma tatalo i aso taitasi, o le faataatia ese lea o se taimi faapitoa e fai ai. “Ou te lagona e pei lava ua mafai ona ou ausia ni mea se tele pe a ou faataatia ese le taimi lena,” na fai mai ai Miriam. “Ma le isi, a tele se taimi tatou te tuuto atu i le Alii, e tau le tele foi le faaosoosoina o i tatou—tatou te atili malolosi ai.”

Mo Sabrina D., 15, o le auauna atu ma lona loto, manatu, mafaufau, ma le malosi atoa, o lona uiga o le auauna atu ma le buona volontà. O le uiga o lena mea, o le faia o mea ma se uiga faaalia o le lotomalie ma le fiafia.

E ioe foi i ai Alessio I., 12: “E leai se uiga o le tau ina fai, ona ua fai atu ai le epikopo po o ou matua. E le tatau ona e lagonaina le faamalosia [o oe] e auauna atu. E finagalo le Alii ia tatou auauna atu mo ni mafuaaga tonu.”

E mafai faapefea ona tatou maua atili le buona volontà a o tatou auauna atu? “E fesoasoani le faitauina o tusitusiga paia ia te au, aua e aoao mai ia i tatou o le auauna atu o le mea sa’o lena e fai,” o le tala lea a Sabrina.

O le suesue ma malamalama lelei i le Togiola, e mafai foi ona fesoasoani ia i tatou e auauna atu ai ma le lotomalie ma le fiafia. Fai mai Elvisa D., 17, “E pei lava ona auina mai e le Tama Faalelagi Lona Alo, o lē na ositaulagaina mea uma mo i tatou, e tatau foi ona tatou lotomalilie e tuuto atu mea uma tatou te mafaia e auauna atu ai i le Alii.”

Na iloa e tuafafine o Giulia, 16, ma Veronica D., 14, le taua o le taulai atu i isi. “O le auauna atu e fesoasoani, tatou te vaai atu ai i tagata i se vaaiga e ese mai. Pe a e auauna atu i se tasi, e faamanuiaina uma oulua,” o le tala lea a Giulia.

Fai mai Veronica, “I se tasi taimi sa ou manao lava e faasoa atu le talalelei, ae sa ou lagona le le saunia. Sa ou fefe. Ae ina ua ou taulai atu i tagata na ou auauna atu i ai, sa ou lagona atili ai le to’a aua sa ou iloa o le a fesoasoani mai le Alii ia te au.”

Na mafai e Giulia ma Veronica ona auauna atu i le la uo o Virginia i se auala na suia ai olaga. Sa amata ona la valaaulia o ia latou te o atu i gaoioiga a le Ekalesia. Sa la valaauliaina foi le aiga o Virginia e faia ni gaoioiga ma lo latou aiga. E lei umi ae amata ona feiloai le aiga o Virginia ma faifeautalai. O le tausaga mulimuli ane, na papatisoina ai Virginia ma lona uso laitiiti.

O lea la ua avea o ia ma se tagata o le Ekalesia, ua vaavaai foi Virginia mo ni auala e auauna atu ai i tagata o siomia o ia. E manao lava e faasoa atu le talalelei i isi. O nisi taimi e taufaalilili ai ana uo i le aoga ia te ia ona o ona talitonuga fou, o lea na tatalo ai ia iloa po o ai e tatau ona talanoa atu ai. I se tasi aso na uunaia ai o ia e le Agaga e talanoa atu i se teineitiiti sa ia iloaina. “Sa ou tuuina atu ia te ia se Tusi a Mamona ma valaaulia o ia e sau ma te o i le lotu. Sa sau o ia! Ma o le taimi nei o loo ia faitauina le Tusi a Mamona.”

E vaavaai Samuele D., 14, mo ni avanoa e faamalolosia ai tagata o lana korama: “Ou te taumafai e fesoasoani i isi tama o la’u korama e ala i le uunaia o i latou i le vasega. O nisi taimi latou te lagona ai le matamumuli po o le popole e auai.” Fai mai Samuele o le fesoasoani atu i isi ia lagonaina le to’a o se tasi lea o auala e mafai ona ia auauna atu ai i le Atua ma saunia ai mo tiutetauave i le lumanai.

Ia, o le a la lau mea a fai? Fai mai Alessio I., “Ou te le tau faatali seia ou matua e faia ai se eseesega. E tatau ona ou faia i le taimi nei.”

O nei laasaga o le a fesoasoani foi ia te oe, pe a oo ina e iloa o oe o se vaega taua o le galuega a le Alii. Ia fai ia tasi se laa i le taimi. O le a e faia se eseesega taua a o e aoao e tuu atu atoa lou tagata i le galuega a le Alii.