O Le Auupega Lilo

“Ae leai Ivy! O ia o se teine,” o le musumusu mai lea a Braden i tua atu o Atamu.

Ae o Atamu o le kapeteni o le aso mo le au togitogigā i’a, ma ua uma ona fai lana filifiliga. “Ou te filifilia Ivy, na ia toe fai leotele teisi a’e ai. Sa ataata aamu Taila, o le kapeteni a le isi au. E oo lava foi ia Faiaoga Garcia na foliga faateia i le filifiliga lona lua a Atamu.

Sa vaaia foi le te’i o Ivy ona laa atu lea i luma ma le matamuli. Na mapuea le fiafia Braden.

O Ivy sa le pei o isi teineiti. O ia o le teineitiiti sa sili ona tino laitiiti i le vasega. Sa le’i foliga mai na saoasaoa tele, ae o le polo sa foliga na telē atu foi nai lo o ia. “Atonu foi e le mafai ona ia siia i luga le polo,” na fai mai ai Braden a’o savali atu i ai Ivy.

“Atonu o le a avea o ia ma a tatou auupega lilo,” o le tala lea a Atamu, ma taumafai ia foliga mautinoa. Ae e le o le mafuaaga lena sa ia filifilia ai o ia. Sa i ai se taimi na fai atu ai Ivy ia Atamu e le fiafia pe a fai a latou taaloga ona e mulimuli lava filifili o ia. Sa ula isi tama ia Ivy, ae na ta’u atu e Tina ma Tama ia Atamu e tatau i tama ona faaali atu le faaaloalo i teine. O lea sa ia filifilia ai Ivy. A o ia vaai atu i le filifilia e Taila o tama e sili ona tino tetelē i le vasega, sa faamoemoe Atamu na ia faia le filifiliga sa’o.

Ina ua i ai tagata uma i se au, na ili e Faiaoga Garcia le faaili, ma sa taufetuli atu au i tulimanu faafeagai o le malae. Sa tuu atu e Faiaoga Garcia le polo ia Taila, ona siaki lea e Taila le au a Atamu a o le’i taulai atu ia Ivy. Sa tuu i tua lona lima ma togi loa le polo.

Pa! Na tau le polo i le eleele ma fiti e aunoa ma le tau i se tasi. Na le talitonu Atamu i le mea na ia vaaia. Na fetaui lelei lava ma le minoi o Ivy. Sa foliga mai na tete’i uma tagata sa siomia o ia, ae na ona ataata o Atamu. Atonu o le filifilia o Ivy sa o se manatu lelei lea.

Na faaauau le taaloga. Sa taumafai pea Taila ia lavea Ivy i le polo, ae sa fe’alofai solo ma puna solo o ia. Sa pisi lava Taila ma nisi o lana au i le taumafaiga ia pe Ivy, o lea sa latou le faaaluina ai se taimi tele e tulituli ai se isi tagata. Sa leai se tasi na mafai ona togiina o ia i se polo. Na ataata Atamu—o le tino laitiiti o Ivy na avea ai o ia ma tagata lelei atu i le togitogiga i’a aua o lona faatinoiti ma le saoasaoa na faafaigata ai ona lavea o ia.

Mulimuli ane sa manumalo le au a Atamu i le taaloga. “Na sa’o lava le auupega lilo,” o le tala lea a Braden. “E lelei mo’i lava Ivy.”

“Ioe,” o le tala lea a Taila. “O le isi la taimi, e i ai o ia i la’u au. E mautinoa lava o le a matou malo!” Sa ataata Ivy a o savali atu o ia i le vasega, a o siomia e tamaiti o lana au.

Sa le mafai ona taofiofi le ataata o Atamu a o mulimuli atu i le vaega. Sa agalelei o ia ia Ivy, ma sa ia fesoasoani i isi tama ia faaaloalo teisi atu i teine. O le auupega lilo maoae sa le avea o se mea lilo—o le agalelei lava.