Auaunaga Na Tuuina Mai o se Taui o Auaunaga na Tuuina Atu

Ata

illustration for lds voices

Ata na tusia e Bradley Clark

A o avea a’u ma se tagata aoga tausaga muamua i le kolisi, sa masani ona ma o ma la’u uo sa ma potu faatasi e asiasi atu i le toeaina matua o lona aiga, o lē sa ma valaauina ma le alofa ia Toeaina Sio. Sa nofo na o ia ma sa tuuatoatasi, o lea sa ma taumafai ai e asiasi atu ia te ia i ni taimi se tele na mafai ai. I le taimi o a matou asiasiga na te faamatala mai ia i ma’ua ni tala i le taimi sa nofo ai i Mekisiko ma nisi o aai e lata i tuaoi o Arisona, e aofia ai Nogales.

Ina ua toe malaga la’u uo mo se taimi le tumau i lona aiga, sa ou lagona le musuia o a’u e faaauau pea ona asiasi atu ia Toeaina Sio. Sa oo ina avea o ia ma se uo mamae, ma sa ou asiasi atu ia te ia seia oo ina maliu i se tausaga ma le afa mulimuli ane. Sa ou faanoanoa ina ua maliu la’u uo ae sa ou faafetai mo le taimi taua na ma faaaluina faatasi.

O le sefulu o tausaga talu ona maliu Toeaina Sio, sa ou faitau ai i le api talaaga a le tina o lo’u tinamatua. Na ta’u mai i le api talaaga e uiga i le leai o se tupe na tuua e lona toalua mo ia, $30 na tatau ona totogi mo le fale, ma ni tamaiti se toaiva e fafaga.

Ona ia tusia lea: “I Bisbee [Arisona] sa ese le lelei o tagata ia i matou. E tusa pe na matou nonofo mamao mai le taulaga i saute o Bisbee, sa latou momoli mai i matou i le fale [mai le lotu]. O Tuagane Joseph Kleinman, o lē sa nofo i Mekisiko, sa tele ni taimi sa ia momoliina mai ai i matou i le fale, ae na le gata i lena, sa ave foi i matou uma e [lona aiga] matou te faiaiga i le afiafi. Sa latou gaseseina se falai lapiti ma ni kuka eseese, ia na matou matuai fiafia ai. Sa siitia atu i latou i Nogales … ma sa latou tuua a latou lapiti mo i matou, nai lapiti papae aulelei, ma na matou maua ai ni meaai na mafai ona matou aai ai i lena taimi.”

A o ou faitauina lenei tusiga, sa ou iloaina o Joseph Kleinman lea na fesoasoani i le tina o lo’u tinamatua o Toeaina Sio lea! Sa ou lagonaina le musumusu mai o le Agaga e faapea sa musuia a’u e faaauau ona asiasi atu ia Toeaina Sio e avea ma se faafetai faatauvaa mo le agalelei sa ia faaalia i le tina o lo’u tinamatua ma lona aiga.

Sa ou fiafia i le avea ma se vaega o se tala o le alofa ma le auauna atu lea na toe tuuina atu. Ou te iloa ua silafia e le Alii Ana fanau. Afai tatou te faalogo i uunaiga a le Agaga Paia, e mafai ona tatou faamanuiaina olaga o isi ma faapea ai foi ona toe faamanuiaina ai i tatou lava.