Uunaia e Mea e Manaomia ia Tamaiti Aoga Seminare ina ia Siitia le Aoaoina
O mea fou e manaomia mo le faauuga o le seminare lea o le a fesoasoani i tamaiti aoga ina ia “siitia le aoaoina” o loo faagaoioia i le Ekalesia atoa. E aofia i mea e manaomia, lea o le a faaaoga i le amataga o suesuega o lenei tausaga o le Mataupu Faavae ma Feagaiga ma le talafaasolopito o le Ekalesia, ni elemene tetele se lua:
-
O le a manaomia ona faitauina e tamaiti aoga ia tusi o mau o loo latou suesueina mo le tausaga, e faaopoopo atu i le mauaina o ni togi e fua i le auai ma se faamaoniga faalelotu mai le latou epikopo po o le peresitene o paranesi. O le faitauina o mau na faamamafa mai i le taimi ua tuanai, ae ua avea nei ma se mea manaomia mo le faauuga.
-
O le a manaomia ona pasiina e tamaiti aoga ia sailiiliga faaleaoaoga e lua kosi i le aluga o le tausaga, ma se sikoa ia le itiiti ifo ma le 75 pasene. O le sailiiliga e tasi o le a faia i le afa o le tausaga ma le lona lua i le faaiuga o le tausaga faaakatemia. O sailiiliga o le a taulimaina muamua lava i le malamalama i mataupu faavae autu ma le faaaogaina o mataupu faavae o le talalelei i olaga o aso uma.
O mea fou e manaomia e le seminare—faatasi ai ma le Tala’i La’u Talalelei: O Se Taiala mo le Galuega Faafaifeautalai ma le mataupu aoaoina a le autalavou i Aso Sa, Sau, Mulimuli Mai ia te Au—o le a maua ai e le autalavou le avanoa ina ia ola tutoatasi i a latou molimau, faaloloto lo latou malamalama i le talalelei, ma faateleina lo latou tomai e faasoa atu lo latou malamalama ao latou saunia mo olaga faaleauaunaga ma faalesoo.
O le a maua e tamaiti aoga i le faaiuga o tausaga uma, a le o se tusi faamaonia e tau atu ai ua latou faamaeaina mea e manaomia talafeagai (e aofia ai faitauga ma iloiloga) po o se tusi faamaonia o le aloaiaina e tau atu ai ua latou ausia tulaga manaomia o le auai.