E Te Manao i Ni Fugalaau?

Ata

illustration of roses for lds voices

I se tasi aso i le ma’ea ai o se taimi faigaluega sa faapitoa le faigata i le falemai o tamaiti, sa ou lelava ma itaitagofie. A o ou savali atu i le laulau o le puipuiga, sa ou matauina ai ni fugalaau mananaia. Ina ua ou fai atu i le tagata sa i ai i le laulau e uiga i le mananaia o ia fugalaau ma le manaia o lo latou manogi, sa ia fai mai ia te a’u, e mafai ona ave ma a’u.

Sa matuai o’u fiafia lava! Sa ou mafaufau faapea, e mautinoa lava na finagalo le Tama Faalelagi e ave ma a’u fugalaau e faafiafiaina ai lo’u aso.

A o ou savali ese mai mai le falemai, sa ou oo mai i tua o se tamaitai sa nofo i se nofoa faataavalevale. Sa amata ona ou le to’a ae na iu ina mafai ona ou pasia o ia a’o ma ulufafo mai le fale. A o ou pasia o ia, sa ea a’e lona ulu ma fai mai, “Oi, ta’i manaia fugalaau.” Sa ou faafetai atu ia te ia ma faatopetope atu i lo’u toalua, o lē sa faatalitali mai i le matou taavale. Sa ou fiafia e faaali atu ia te ia a’u fugalaau.

Na faafuasei lava ona ou lagonaina le ta’u mai e le Agaga Paia ia te a’u, na sili atu ona manaomia e lena tamaitai ia fugalaau nai lo a’u. Sa ou tau musu e avatu ia te ia, ae sa ou mulimuli i le uunaiga. Ina ua ou fesili atu i ai pe manao i fugalaau, sa ou faamoemoe o le a fai mai e leai.

“Oi, ioe!” sa ia tali mai ai. “Ou te manao i ai. E ese le mananaia.”

Sa ou tuuina atu [fugalaau] ia te ia, ae a o ou liliu ou te aluese, sa amata ona tagi lotulotu o ia. Ina ua ou fesili atu pe ua i ai se mea ua tupu, ae fai mai na maliu lona toalua i ni nai tausaga ua mavae, ma na silia ma le tausaga e le’i toe asiasi mai se tasi o lana fanau ia te ia. Fai mai o ia, sa ia augani atu i le Atua e faaali mai ia te ia se faailoga o Lona alofa.

“O oe o se agelu na auina mai e le Atua e tuuina mai ia te au fugalaau e sili ona ou fiafia i ai,” o lana tala lea. “Ua ou iloa nei e alofa o Ia ia te au.”

Na nutimomoia lo’u loto. Sa matuai o’u manatu faapito lava. Sa manaomia e lenei tamaitai se upu agalelei, ae sa ou le fia talanoa ia te ia. Sa le o a’u o se agelu. A o ma faamavae, na amata foi ona ou tagi.

Ina ua ou taunuu atu i le taavale, na fesili mai lo’u toalua po o le a le mea na tupu ma aisea na ou foa’ia ai a’u fugalaau. Sa foliga mai sa le mautonu o ia ae sa toe to’a mai a o ou faamatalaina le tala.

“Sa ou auina atu ni rosa mo oe ananei. Sa ou manatu sa e manaomiaina,” o lana tala lea. “Sa ou popole ua e foa’ia ese atu. Afai la e le o fugalaau la na ou auina atu ia te oe, o fea la o i ai [rosa]?”

Na iloa mulimuli ane, na galo i le faleoloa fugalaau ona tiliva mai ia rosa, o lea na ma tietie atu ai i le faleoloa fugalaau. Sa alu i totonu lo’u toalua ma e le’i leva ae toe sau i fafo ma se teufugalaau matagofie.

Sa le mafai foi ona taofiofi lo’u tagi. Na fetalai mai le Tama Faalelagi ia te a’u e ositaulaga na fugalaau, ma le silafia lelei sa i ai se mea na sili atu sa faatalitali mai mo a’u, ma le isi, na manaomia e Lona afafine tuuatoatasi se faamanatu o Lona alofa.