Nakomai, Iriirai: Angareirei n Aan Reirein te euangkerio n te Mweenga
Mwakoro 1
Taan kororongorongo a maeka i Utah, USA.
Te karikirum n te reirei n Taabati ibukiia kairake—Nakomai, Iriirai—reireiina temanna kakawakin aan reireiin te euangkerio ni katoa namakaina. Aikai tabeua kawai n reiakin bonganan tuua aikanne ma am utu.
Tekateka ma ana utu ni karaoa te bootaki n te utu n te tairiki, te tina e moana titirakinaia natina uoman, “Ningai ae kam tia n namakina iai kairakimii iroun te Tamnei?”
Natina te aine 17 te ririki e taetae, “I a tia ni kaman karekei teniua reirei iaon te Tamnei n te namwakaina aei.”
“E tamaroa, ngkanne e na mwaiti ae ko na tibwauai,” e kaeka ana karo. E mabu ngke te Tina ao te Tama a tataninga n rau ngke natiia a iangoa taekan te titiraki.
N tokina, natiia 14 te ririki e tibwaua ana atatai man ana reirei n te bong arei.
“Eng,” e kaeka tinana, “anne e kauringai taekan Nibwaai n ririmwiin te Tamnei ngke e aki ataia bwa e na kanga n karekei bwatua mairoun Raban.”
E taetae natina te aine, ni karakina arona ni karaoa tuangana ni kataetaea te ataeinaine ae tiku n ti ngaia iaon te bwati. Tamana e kamoamoa n ana babaire ao n reitia ma te bwai are e riki nakoina inanon ana tai ni mwakuri.
A kaina aia maroro n anenea “Let the Holy Spirit Guide” (Anene, nambwa. 143).
Bebeeten kawainte angareirei—tibwaauan atatai ibukin te reirei aei—e kanakoraoa te bootaki n utu n te tairiki aei.
Te waaki aei e anga te katooto ae koaua ae riki ni maiuia aomata n aroia n reiakina bonganan te karikirum n te reirei n Taabati ibukia kairake, are e baireaki n te namwakaina. Ngaia raoi, katooto aikai tiaki tii te kawai nakon reiakinan tuua aikai. Ko kona n ukora te kairi ibukin kainnanon am utu.
Tianuare Taian Atua
Kain taian Atua—Tamara are i Karawa, Iesu Kristo ao te Tamnei ae Raoiroi—ngaiia teniman n kaokoro aia mwakuri ma a katiteuanaaki n aroia ao mimitongiia.
Temanna te ataeinnaine e taekina are e reaiakina n taian Atua: “E kakawaki irou bwa Tamau are i Karawa, au Tia Kamaiu, ao te Tamnei ae Raoiroi a maenako n Aroia ae I kona n ataia n tatabemaniia ma a kaai ni katiteuanaaki. I ataia ma te kakaitau bwa I kona n riki n aron te Atua ibukina bwa taian Atua bon tiaki rabwata ae aki mataata ao ni kangaanga aron iangoakiia ma bon Aomata mai ieta aika a tangira, kakabwaia, kairi, ao ni kinaai.”
N reirei te tua aei, ko riai ni kataia ni maroroakina te titiraki n aron, “Tera ae ti kona n reiakinna man taian Atua iaon ikotakiia ni mwakuri inanon te katiteuanaaki.” ke “Ti na kanga n kakorakoraaki n ara reitaki ma taian Atua?”
Kabotaua Ioane 10:30 ao Doctrine ao Covenants 50:43 e na karekea te maroro ae tamaroa ao n anga te atatai n noori koauan bwaai aika nano n te katiteuanaaki.
Beberuare Te Babaire ni Kamaiu
Te babaire ni kamaiu e kaekai bwaai aika moan te kakawaki n ana titiraki te aomata, n aron, “Antai ngai?” ao “Tera bonganan maiura?” Titiraki n oin ara titiraki ao ukeuke ibukin kaekaaia e kona n riki bwa te kawai ae korakora n reiakinan taekan ana babaire ae kakukurei te Tama.
N aron aei, temanna te ataeinimwane e moana reiakinan booki aika tabu n titiraki, “E kanga anuan Atua ni kabotauaki nakon tein aroarora are na karekea n te maiu n tamnei? are I karekea ngkai? bwa I kantaningaia bwa n na karekea n te maiu are imwina?” E korei kaeka nakon titiraki aikai n aron ae kunei n booki aika tabu ao ni kamanenai n reiakiniia tabeman taekan te babaire ni kamaiu.
Tera aia tititraki am ataei ibukin te babaire ni kamaiu?
Maati Ana Mwakuri ni Kamaiu Iesu Kristo
Ti na kanga n reiakin tiaki tii Ana mwakuri ni Kamaiu Iesu Kristo ma ana nanoanga naba ara Tia Kamaiu n te kantaning bwa ti na kamanenaa Ana Mwakuri n Kamaiu inanon maiura?
Ibukina bwa ti a tia ni kabane ni maroaa, karaoi buure, ao ni kainanoa te korakora, ngaira ni kabane ti a tia ni kainanoa te atatai ae tamaroa ao kamanenaan te Mwakuri n Kamaiu. Te kauntira n Ataeinaine e kamanenaa te witeo ni buoka ana kiraati ni kaotaia riki iaon Ana Mwakuri ni Kamaiu te Tia Kamaiu.
Aio teuana ana taneiai te ataeinnaine temanna:
“Ti mataku ‘Akea Aika a Tiku ma Ngaia’ (witeo, LDS.org). Ngke te tia katanga te burute e katanga te kuna ae kananokawaki, bwanaan Unimwane Jeffrey R. Holland kaain te Kooram n te Tengaun ma Uoman e taku, “Teuana te bwai ae moan te karaunano n te Itita aei bwa bon ibukina Iesu e nakonako n te kawai ae a bwabwaki, ao ni kamaroaa, ae tiaki kona ngaira nini karaoia.’
“I tia n namakina te mamaa n aron kainanoan Ana Mwakuri n Kamaiu te Tia Kamaiu, ma I namakina te Tamnei ae korakora, I namakina te kantaninga n Ana Mwakuri ni Kamaiu ni kanako ni kabane au namakin n te bure. Te Uea E anga maiuna ibukiu, E aki tabe n nanokawaki iai, ao ngai N na karaoia naba.”
Ibukin te Mwakuri ni Kamaiu bon te mwakuri ae te kabane n reitata ibukin kamaiuan tamneira, ti riai n reireiia ao ni kamatebwaia taekana ma ana kairiiri te Tamnei ae Raoiroi. Tao ko na bon kairaki ni maroroakin booki aika tabu ke koauan reirei n aron “Te Kristo ae Maiu: Aia Koaua Abotoro” (Riaona, Eberi. 2000, 2). Iangoa maroroakinan titiraki n aron ae, “Ningai ae ko namakina iai te kamarurungaki, kakorakoraki, ke tamaroan mwaakan te Mwakuri ni Kamaiu?”
Eberi Boong, Kitanan te koaua, ao Kaokan Bwaai
Tamnein taian mwangko © moodboard/Thinkstock
Ataakin kitanan te koaua—kitanakin te euangkerio ae koaua—buokiira ni kamatataira n aron kainanoan kaokakin te euangkerio, te nakoanibonga, ao Ana Ekaretia Iesu Kristo.
Te bwai n reirei imwina e buokiia mitinare n reireiniia aia aomata taekan Kitanan te Koaua ao Kaokan bwaai.
“Ngai ma toau ti kamanenaa te mangko ae te buratiki ae korobokiaki ma makoron koaua n te Ekaretia, ni katea te biramita ma ngaiia inanon kabwarabwaraana bwa e kanga Iesu Kristo ni katea Ana Ekaretia.
“Imwina ti kabwarabwara kitanan te koaua n aron kamwaingan mangko ake a tei ibukiia Abotoro ao ni matakuakina kateitei akekei ni mrara. Ngke ti kabwarabwara Kaokakin te euangkerio rinanon te Burabuti Iotebwa Timiti, ti a manga katea te taua, ni kaotia bwa te Ekaretia ngkai e barongaaki n te kawai are e moan barongaia Kristo.
“N te moan tai, te mwaane aei e oota. Kaokan bwaai e a matata raoi irouna bwa bukin tera e kainanoaki.”
A mwaiti kawai tabeua n tei ibukin kaokakin bwaai, kitanan te koaua, ao kaokan bwaai. Ko kona n wareki booki aika tabu taekan rongorongo aikai ao n irii ana kairi te Tamnei ni karaoa oin am tamnei ni kamataata aron are ko reiakinna (taraa, katooto, Amota 8:11–12; 1 Nibwaai 13; D&C 136:36–38; Mote 5:55–59).
Meei Burabeti ao te Kaotioti
E tabeaianga nanon te Uea ni kanreitaki ma ngaira. Ti karekea Ana kairi inanon maiura rinanon te kaotioti are E angan Ana burabeti ao bon nakoira.
Ti kona n taainako ni katamaroa ootara n reirein te euangkerio ngkana ti kabotaua nakon bwaai ao taneiai inanon maiura n katoa bong. Te aine ae kairake e taekinna e kanga te kabotau ni buokiia ni kinaa te kaotioti.
“I reiakina taekan te kaotioti rinanon te burabeti ae maiu n taai aikai. Unimwaane David A. Bednar te Katengaun ma Uoman e taetae iaon tamnein te kaotioti ao e kabwarabwara rinanon te kabotau n te ota. N tabetai, te kaotioti e karina ao e itiaki kaanga kauraan te taura inanon te ruu ae roo. Ae tabangaki riki, e roko ni karaurau titebo ma moan otin taai n karikirakea matoan ootana. N taai tabetai, Unimwaane Bednar taku, kaotioti ai aron te oota n tain te mabubu. ‘Iai te oota ae tau are ko … kona n nora ae tau ni mwananga tabeua te mwaneka inanon te uananginang’ (inanon “Mwakorokoron te Oota: Kaotioti n Tamanei” [witeo], LDS.org). Te kanikina aei, ngke bebete, e rotai n ae korakora ibukina bwa I a tiba ataia ae te kaotioti e aki toki n roko ngkana I anaa au tai n kinaa.”
Ngkana ti taua ara tai ni kamatebwaia taian kanikina, kaikonaki, ao waare, ara atataii n tuua a konaa n reitinako n rikirake. Kawai n angareirei aikai e na buokiira riki ngkana ti kariaia te Tamnei n kaotai bwaai aika boou n aron kakawaakina nakoira.
Tuun Nakoanibonga ao Kingin Nakoanibonga
Te nakoanibonga bon atuun te maroro ae e bon rangi n kakawaki ibukiia ni kabane. Bon mwaakan te Atua ao e kona ni kakabwaiaira ni kabane. Ngaira n tatabemaniira iai tibwangara ae e kakawaki n ana mwakuri te nakoanibonga.
Tabeman aomata aki oota n te beku, nakoa, ao rongorongon ngkoa te nakoanibonga. Te kamwaninga e kona ni kaunga karaoana n reiakinan iango aikai.
E bon nakon te bwai ae ko tangiria n reiakinna, ko kona ni kamanenai tabeua titiraki aikai ao kaoiia am ataei n ukoukora te reke inanon booki aika tabu ao n aia reirei burabeti n taai aikai.
-
Tera taian nakoa n te mwakuri n te Nakoanibonga ae te Aaron? n te Nakoanibonga ae te Merekitereka?
-
Tera kingin te nakoanibonga? Antai aika taui? Aera ngkai a kakawaki kiing?
-
Tera te kaokoro imwarenan ana mwakuri te nakoanibonga, kariaiakaki, ao mwaaka?
-
E kanga te nakoanibonga ni kakabwaiaia mwaane ao aine?
Kaeka a kona n reke inanon booki n ibuobuoki n aron Reirein te Euangkerio (2009) ao Koauan te Onimaki: Bwaai n Ibuobuoki n te Euangkerio (2004) ao inanon booki aika tabu n aron Doctrine ao Covenants 13, 20, ao 107.
Te reke nakon te kabanea n titiraki “E na kanga te nakoanibonga ni kakabwaiaia mwaane ao aine?” e kona ni kuneaki inanon booki aika tabu ma e rang kakawaki riki iangoakina bwa e kanga te reirei n rotiira ae boni ngaira.