Tataroakinna

Tamnei

Illustration depicting a bishop extending a calling to a woman.

Kamataata n te Korotamnei iroun Katie Payne

I tuanga te bitiobi ae e bure ana aomata.

“I aki tangiriia natiia aomata tabeman, I tuai man reireiniia ataei, ao I aki kona n anene,” I taku.

“Titita Taylor,” e kaeka, “a bane n tau aomata iroun te Uea ake E weteiia. Ko na korakora.”

E tuangai N na iangoa te wewete ao ni kaongoa n te Taabati are e na roko ngkana I kariaia.

“I kataia ni karikirakea te onoua te ririki, te teniua te ririki, ao te teei ae e a tibwa bungiaki,” I taku. “I aki konaa moaia au ataei rinanon te ngaina, ao ko a tangiriai ni katukai ma 40 riki ao n tuangai n reiakiniia te katangitang?”

E kaeka, “Tataroakinna.”

N te bwakantaai anne I kataia n tuanga kainnabau, Mark, bukin tera te wewete bon tiaki te iango ae raoiroi. N na kanga ni mwakuri n te Moanrinan ngkana I aki tau naba n riki bwa te tina nakoia oin natiu n aron are bon I tangiria? I burebureaki n te maaku inanon namwakaina bwa I bon kabwaka n aron te tina.

E baiti n nako te wiiki, ma au iango e nakon ana kabanea n taeka te bitiobi. Tokina, ni moaningabongin te Taabati n au ruu ni matu, I katororobua iaon bubuaniwaeu n tataro. Ranin matau a waanako iaon ubuu, ma te rau are e a kaona nanou. N te tai ae waekoa I ataia e bon riai kaekaante wewete. Ni kabanea nanou nakon te Uea, raraoma ni kabane a bua mai nanou.

Ngke I rin n ruun te Moanrinan imwiin te bootaki n toa, te beretitenti n te Moanrinan e kabwarabwaraai, ao ataei a anenea te kuna ni butimwaai. Taraakin mataia ma te kantaninga ao noorakin moangaren natiu te mwaane ae onoua ana ririki, I a rau n riki bwa te tia kaira te anene n te Moanrinan n au kabanea ni konaa.

Mai ikanne I kabanea au tai ae mwaiti n reiakinii kuuna ao katauraoan reirei. I katangii kunan te Moanrinan ni mweengau, n te kaa, ao n nakonakou. I kakaei kawai n reirei aika kaokoro ao ni kabanea aoa ni katoa wiiki ni karaoi boutita ao karikirakean takakaro.

N aron katauraoan te reirei ibukin tain te anene teuana te bwakantaai iaon te taibora n amwarake, I anenea te anene inanou “Mwakan Koroboki aika Tabu.” Natiu are onoua ana ririki e tekateka irarikin te kaaunta e kana te tianiwiti, ao natiu ae teniua ana ririki e korokorea te beeba irarikiu. Ngke I anenea te koorati inanou, n te tai ae waekoa ngaiia ni kauoman a anene n takarua:

Bwa ngaia I ataia bwa te wewete bon kaekaan au tataro. I a kaman butia te Uea ni kaotia nakoiu bwa N na kanga n riki bwa te tina ae tamaroa, ao E anganai weteau are N na reiakinanaki arou ngkai I reireiniia au ataei te katangtang.

I rangi ni kakaitau ibukin ana kairi ao ana taeka aika tangira au bitiobi: “Tataroakinna.”