Kakabwaia ake a Riki man te Teimatoa ni Waaki Nako
Ni maiu bwa kaain te Ekaretia ae kakaonimaki e uoti kakabwaia aika kamiimi. Ma tiaki nanona bwa te maiu e na aki bebete imarenantai. Taian kariiri, raao aika aki koaua, kakaewenako n te utu, ko na wareki. Bwaai aika a mwati a na kataia ni kararoako man kawain berita aika tabu.
Anne bukina te Botoniango n te Miutuo n te ririki aei, “waaki nako man teimatoa iroun Kristo” (2 Nibwaai 31:20), iai inanona te rongorongo ae mwaakaroiroi. Ngkana ko waaki nako man teimatoa inanon Kristo, n tei ni matoa iaon am berita aika tabu, te Atua e kona ni karaoi bwaai aika kamiimi ibukim ao nakoim. Ao E kona ni buokiko n namakina te kaantaninga, te raunnano, ao te rau n te tai ae ti te arona.
Bon te bwai ae rang ataia te Burabeti ae Iotebwa Timiti. Ai bon tibwa 14 ana ririki ngke e rinanon te Moan Mii ni Burabeti. Ngke e katorobubua n tataro n te Buakonikai ae Tabu, e ruonaki n te mwaaka ae kamiimi ae aki noonoraki mai maina are e kataia ni kakamaakua ao n urua arona. Man kakorakoraan mwaakana ni wetea te Atua e bon kamaiuaki ao e reke kawarana mairoun te Tama ao te Nati.
Imwiina, ngke e tibwa ana namakin aei Iotebwa, e bwainingareaki irouia raoraona ao taan kairiiri n te aba (taraa Joseph Smith—History 1:15–17, 21–26). E aki toki te bwainikirinaki anne ao n tokina e anaa maiuna 24 te ririki imwiina.
Ma Iotebwa Timiti e waaki nako ma te kaantaninga, ao e kukurei ni mwakuri ibukin te Uea. Ngkai e teimatoa ni waaki nako inanon Kristo ao ni kamwakura ana onimaki ni karaoan ae eti, te Atua e kakabwaia ao e boutokaia. Ao E na karaoa naba aio ibukim.
Ngaia are waaki nako. Motinnanoia n maiuakina te euangkerio. Kateimatoa am taratara iaon te Tia Kamaiu. Karekea “te kaantaninga ae tamaroa man kororaoi, ao tangiran te Atua ma aomata ni kabane.” “[Kakukurei] ngkami n ana taeka Kristo.” Mwakuri iaan ana kaetieti te nakoanibonga. Ukoukoria bwa tera are e tangiria te Atua bwa ko na riki iai.
Ngkai ko waaki nako, ni kawakinan ao ni karaoan berita aika tabu ni kawain te maiu are akea tokina, ti kakoaua nakoim bwa ko na kunea te kukurei.