Ko Ataia E Koaua ana Boki Moomon!
Henry (Hank) Brown, Utah, USA
Kamataata n te tamnei iroun Allen Garns
N te bong teuana ngke I mwakuri n te titooa ae bubura n te tabo ni mwakuri i Oakland, California, USA, e kawarai raoraou ao e kaoai bwa N na kaitairiki ma ngaia. E taku neiei bwa e na kaoiia uoman mitinare mwaane man te Moomon ake a na raoniira.
Imwiin te katairiki a katea aia kairababa ni koroboki ao ni moanna n titirakinai tabeua titiraki. I a moanna n aki rau. I tii tangiria ni kakaungo nakoia ao n nako.
N tokin te kabwarabwara, ma e ngae n anne, temanna te mitinare mai Utah e keerake ma ana kaintekateka ni kaaniai, e tarai matau, e anganai ana Boki Moomon, ao e kaota ana koaua. E taku bwa e ataia ae koaua te Ekaretia ao I kona naba n ataia man warekan te boki. Ngkanne e taetae man Moronaai 10:4 ao n taku bwa ngkana I butia te Atua ma te nano ae koaua ma nanou raoi, E na kaota koauan te boki nakoiu man mwaakan te Tamnei ae Raoiroi.
Ni wiiki ake imwiina I wareki tabeua mwakoro, ao ti a manga kaitibo naba n ana auti raoraou. Imwiin ara kateniua ni marooro, te mitinare are e roko mai Utah e a bane ana tai ni mitinare ao e a okira mweengana.
I reitinako ni wareware ao n tataro ni katoa tairiki, ni bubuti ngkana e koaua te boki. Imwiin au tataro te tairiki teuana, I a nakon au kainiwene ao ni wareki riki tabeua mwakoro. N te tai ae waekoa I ongo te bwanaa n atong aua taeka aika bebete: “Ko ataia ae koaua!”
I bon tuai man ongo bwanaan te Tamnei n taetae nakoiu mai imwaaina. Ma I ataia bwa e kinaai te Atua ao e tangirai. I a bon rootaki are I aki kona n taua raninmatau. I ataia I riai ni kaaina ana Ekaretia Iesu Kristo ae koaua. I oota naba bwa ai maiara naba te mitinare n ataei mai Utah ni kona n taekinna bwa e koaua te Ekaretia.
I kaaina te Ekaretia ao ni mare imwiina ma te ataeinaine ae botonaine n te Tembora i Oakland California. Iai waniman natira ao ti maeka i California inanon te maan ae 33 te ririki imwaain mwaingira nako Utah.
Tabeua te ririki n nako ao e katauraoia natira te aine ae te bina ni karaoa ana mwakuri ni mitinare, e titiraki ngkana I kona ni kataia n reitaki ma te mitinare are e a tia n reireinai.
“E korakora iangoana inanon ririki aika bati,” I kaeka, “ma I aki ataia bwa N na kanga n reitaki ma ngaia.”
Imwiin te maan ae 10 te miniti e kawarai ao e taku, “Aio nambwan ana tareboon.”
Ngke I a tareboonia, e abwabwaki au marooro ma ngaia. E titiraki ibukin au aetureti n imeeri bwa e aonga n “imeeri ni kakaongoai baika a riki inanon maiuna.” N ana emeeri n te bong are imwiina, e tuangai bwa e a man n aki kaaina te Ekaretia inanon 40 te ririki ao ni kantaningaia bwa N na nanokawaki iai.
“E aera bwa N na nanokawaki?” I a manga waekoa n imeeri rikaaki nakoina. “Ko bita maiu!”
Ti teimatoa n imeeri i bon imarenara ao ni kariaia bwa ti na manga kaitibo. N te tai ae waeko ao I a buti nakon mweengana, n te tabo ike e kaoai iai ao ni kabwarabwaraai nakon buuna. Ngke ti maroroakina aron maiura, I titirakinna ngkana iai irouna ana Boki Moomon. E tamwarake nako eeta ao n oki ma te boki. I anaa te boki, n tarai matana, ni manga kaoka te boki nakoina, ao n taku: “I ataia bwa e koaua te boki aei! Ngkana ko wareka Moronaai 10:4 ao n tataroakinna, ko kona naba ni karekea kakoauaana ao koauana.”
Tabeua namwakaina imwiina, e wareware, e tataro, ao n raira nanona. N te tai ae aki maan natina te mwaane ae 18-ana ririki e a manga moan bwabetitoia, ao I karekea te kakabwaia ni kamatoakina.
I ataia bwa natiu te aine e bon kairaki iroun te Tamnei n tabeka ana titiraki, ao I ataia bwa te Tama are i Karawa e a tia n katauraoira ngaira aika uoman n ikotakira inanon 45 te ririki. I a tia n reiakina mwaakan ana Boki Moomon. I a tia naba n reiakinna n aki bwarannano iaon temanna are e tiotionako man te Ekaretia.