Tamneina
Tiaki te Kakai ae Ti Tangiria
E maeka te tia korokaraki i Utah, USA.
N tabetai ti a tataro ma ti a tataro ni karokoa a maraki bubuaniwaera ibukin kainnanoan te kakai, ma imwiina te Atua e anganiira te kakai ti kainnanoia.
Inanon tabeua te namakaina N na bon angabeeba man te kaoreti ao, au kantaninga, N na karekea moan natiu. Kainnabau te mwaane e ingainga n aron moan karekean natira.
Teuana te ririki, aua namwakaina, tebwi ma uoua au tutuo ni bikoukou a aki raoiroi, nimaua aki raoiroin au tutuo iaon au kai ni kariki, uoua namwakaina ni kananokawaki ni bwaai n aorakii, ao ngaa raninmata, akea natira ao a kimototo ara kantaninga ibukin manga wakinana riki. Ngke e uki ana mataroa te taokita ti weteaki nakon te taokita ibukin te kanoaboo, ti totokoia. E kakua manga wakinana riki, ti kainnanoa te motirawa. Imwaain ae N nang katuka te tareboon, e taku te neeti, “Tareboniira ngkana iai te kakai.”
Kakai a bon, tamaroa, a aki kakoauaki. A roko ni bubura ao n uarereke. A roko ni karako ngkana ti kantaningaia ao ngkana ti rang ni kainnanoia. Ao n tabetai ti a tataro ma ti a tataro ni karokoa a maraki bubuaniwaera ibukin te kainnanoan te kakai, ma imwiina te Atua e anganiira te kakai are ti kainnanoia.
Ibukin te tai ae maan ti tataro ma te korakai ibukin karekean natira, ma e taraa n ae e aki kaekaaki ara tataro. N te kabane e riki nakoira bwa ti bon tataroakina te bwai ae bure. Te Atua e atai kakabwaia ake ti kainnanoi ao n ningai ae ti kainnanoi iai. E noora te banna ae bubura. Ti nooria ngkai naba. Ngaia ti bitaki. Ti katoka ara tataro ibukin te bwai ae ti tangiria ao n oneamwiina n atonga “ko rabwa.”
Tamara are i Karawa, ko rabwa Ngkoe ibukin kakabwaiakira n tatabemaniira nako.
Ko rabwa Ngkoe ibukin tabeakinaia utu ao raoraora.
Ko rabwa Ngkoe ibukiia ataei n katobibiira ake ti kona n kukurei mangaiia ni karokoa ti karekei oin natira.
Ko rabwa Ngkoe ibukiia taokita ao tiaienti are a buoka ni kunei bwaai ake a mwakuri ao ake a aki mwakuri inanon rabwatara.
Ao (ngkai matoan te bwai ae e na taekinaki) ko rabwa Ngkoe ibukin te kataaki aei.
Ti na kakaitau ibukin te bwai e urui nanora e bon kangaanga, ma ti ataia bwa Tamara are i Karawa e tangiriira. Ngaia inanon te kakataaki aei ti bon kakabwaiaaki. Ti aki kona ni kunea te kakabwaia ngkana ti katuaanako te kataaki. N onean mwiina, ti rinea te kukurei—ao ngkana ti karaoia, te kakabwaia e na rangin oota:
Ti onimakiniia tabeman n tatabemaniia nako, n tibwaa ara namakin riki, n tangiriia tabeman riki.
Ti onimakina riki te Uea ao n tataro riki.
Ti rikirake ni kaan ma te Tia Kamaiu, n namakina riki kaanna irarikira, n Tangiria riki.
Ti namakin ana tangira te utu ao raoraora ake a tataro ibukira.
Ao n te tai are ti kinai ni kabane kakabwaia akanne, ti bon tokanikai ma itiakin, karewerewen te rau ae e kona n riki.
Bwa ti aki karekea ara utu n te tai anne tiaki nanona bwa akea taben nanon i te Atua iai. Ti bon kainnanoa onimakinan Ana tai, ao ti kainnanoa Ana rau ni kawakina te onimakinaki anne bwa e na maiu. Ti kainnanoa Ana rau n karauii nanora aika uruaki ao anganiira te onimaki n n teimatoa ni waaki nako.
Te rau bon te kakai ae ti kainnanoia—tiaki te kakai are ti a kaman bubuti ibukina, ma teuana are ti a rang kaman kainnanoia.