O Le Avea o le Konafesi ma Vaega o o Tatou Olaga

Itulau 86: Sa saunoa Peresitene Thomas S. Monson e uiga i se vaaiga mai le Alice’s Adventures in Wonderland e faaali atu ai le taua o faaiuga. Na ia fautuaina i tatou e filifili le mea sa’o, e tusa lava pe o le ala faigata atu. O se aiga, ia talanoa e uiga i faaiuga faigata o feagai ma outou. O lea le mea e mafai ona e faia e fesoasoani ai i le tasi ma le isi ia filifili le mea sa’o? Mo se gaoioiga, tusi se talita o le FMT i luga o se pepa o i ai se savali ma tusi ai i luga ou manatu. Ona tautau lea i se mea ia vaaia soo e lou aiga.

Itulau 101: Na faamatalaina e Peresitene Dieter F. Uchtdorf, Fesoasoani Lua i le Au Peresitene Sili, se aai i Siamani na faaleagaina i taua ae na mulimuli ane toe fausia ma toe faatuina ma le matagofie. Na aoao mai Peresitene Uchtdorf e faapea pe a tatou lagonaina le nutimomoia,o le Faaola ma le Tama Faalelagi e mafai ona toe fausia i tatou. O a ni faataitaiga ua vaaia e lou aiga o se mea ua gausia a ua toe matagofie ma toe malosi? Mafaufau e faasoa atu lau molimau i lau fanau e uiga i le Togiola a Iesu Keriso.

Itulau e 53: Ua fautuaina i tatou e Elder Mervyn B. Arnold o le Fitugafulu e “o e laveai” e ala i le aapa atu i a tatou uo ua le toe toaaga mai po o i latou e le auai i le ekalesia. Faatasi ai o se aiga, mafaufau i ni auala e mafai ona outou aapa atu ai ia i latou ua leva e lei toe auai mai i le lotu po o i latou e le auai i le ekalesia. O le a se mea e mafai ona e faia e faasoa atu ai le talalelei i isi? Mafaufau i se auala malie e fatu ai se fuafuaga faafaifeautalai faaleaiga ma ni sini faigofie ma talafeagai.

Itulau e 13: Na valaauliaina i tatou e Sister Linda K. Burton, peresitene aoao o le Aualofa, e mafaufau ma le agaga tatalo i auala e mafai ona tatou fesoasoani ai i tagata sulufai i o tatou nuu ma alalafaga. Faatasi ai o se aiga, asiasi i le IWasaStranger.lds.org ma matamata i le vitio ua faaautuina “Sa Fai A’u ma Tagata Ese: Ia Outou Fealofani.” O a nisi mea e mafai ona faia e lou aiga e auauna atu ai i tuaoi e manaomia le fesoasoani?

Itulau 86: Na saunoa mai Peresitene Thomas S. Monson, “O nai mea iti e tutupu e i ai so latou aafiaga tele i le talafaasolopito, ma e faapena foi i olaga o tagata. Sa ia saunoa mai foi, “O le auala tatou te mulimuli ai i lenei olaga e tau atu i lo tatou taunuuga i le olaga a sau.” Mafaufau e uiga i filifiliga taua e oo mai i lou olaga. Vaai faalemafaufau atu po o fea e ono taitai atu i ai oe e na filifiliga, ma tusi se lisi o manatu ma musumusuga e oo mai ia te oe.

Itulau e 46: Na saunoa mai Elder Ronald A. Rasband o le Korama a Aposetolo e Toasefululua faapea, “O le Toefuataiga o le talalelei na amataina i se talavou, o Iosefa Samita, i le faia o se fesili.” Na saunoa mai Elder Rasband o fesili o se faailoga lea o se manao ia aoao, faaopoopo atu ai le upumoni i a tatou molimau, ma “fetaomi atu i luma ma le tumau ia Keriso” (2 Nifae 31:20). Aumai au fesili i le Atua i le tatalo, suesue i tusitusiga paia ma saunoaga mai konafesi aoao, ma matamata ma faalogologo ma le totoa mo ni tali.

Itulau 10: Pe na i ai ea se taimi na e lagonaina ai le fefe po o le tuuatoatasi? Na faasoa mai e Sister Neill F. Marriott, fesoasoani lua i le au peresitene aoao o Tamaitai Talavou, se mea na tupu ao lumanai lana faaipoipoga. Sa mamao ese mai lona aiga ma o le a ia nofo i se tagata o le aiga o lona toalua i le lumanai na te le’i feiloai muamua i ai. Ina ua ia taunuu atu i le fale o le tagata o le aiga, fai mai Sister Marriott, “ Na tatala mai le faitotoa … ma sa aapa mai Aunt Carol, e aunoa ma se upu, ma opoina atu a’u.” Na liusuavai lona fefe i lena taimi. “Alofa o le faia o se avanoa i lou olaga mo se isi tagata,” o lana tala lea. E i ai se tasi e mafai ona e faia i ai se avanoa?

Itulau 70: Na aoao mai Brother Stephen W. Owen, peresitene aoao o Alii Talavou, o i tatou uma o ni taitai ma ni soo. Sa ia faasoaina mai se aafiaga sa ia mauaina i le feiloai ai ma se vaega o alii talavou o e na lagolagoina ma faamalosiau atu i isi i la latou korama. Sa ia fai mai, “O le avea ma taitai o se faaaliga o le avea ma soo—o se vaega lava o le fesoasoani i isi ia o mai ia Keriso.” Filifili se tasi e mafai ona e fesoasoani e sau ia Keriso i lenei vaiaso.

Itulau 101: E te manao e taofia lou faatuatua mai le mouese atu? Na aoao mai Peresitene Dieter F. Uchtdorf, Fesoasoani Lua i le Au Peresitene Sili, o le usiusitai o le tali lea! “O le usiusitai o le toto ola lea o le faatuatua,” na ia saunoa ai. “E ala i le usiusitai tatou te mauaina ai le malamalama i o tatou loto.” Mafaufau i se taimi na e usitai ai i le afioga a le Alii e ui lava ina sa faigata. Na faapefea ona faamalosia e lou usiusitai lou faatuatua ma fesoasoani e te iloa ai mea ua fausia ai oe ?

Itulau e 23, 59, ma le 105: O Sister Mary R. Durham, lea na faamalolo talu ai nei o se fesoasoani lua i le au peresitene aoao o le Peraimeri, na faatatau i le Agaga Paia o se “puna paia o le malosi.” Faitau i lana saunoaga ma saunoaga a Elder David A. Bednar ma Robert D. Hales o le Korama a Aposetolo e Toasefululua. Ia matauina le tele o matafaioi o loo faia e le Agaga Paia ma auala e mafai ona Ia faamanuiaina ai oe. Fai se sini e suia ai se mea i lou olaga ina ia mafai ona e agavaa atili ai mo Lana faatosinaga.

Itulau 26 ma le 124: Faaalu se taimi e te fesili ifo ai ia te oe lava ia ia fesili ia na fesili mai ai Elder Donald L. Hallstrom o le Au Peresitene o Fitugafulu: “A oo mai faigata i o tatou olaga, o le a se tatou tali vave atu? O le le mautonu ea, masalosalo po o le aluese mai ai faaleagaga? O se mea faateia i lo tatou faatuatua? O tatou tuuaia ea le Atua po o isi mo o tatou tulaga? Pe o le tatou muai tali atu ia manatua po o ai i tatou … o i tatou o fanau o se Atua alofa?” Na saunoa mai Elder Jeffrey R. Holland o le Korama a Aposetolo e Toasefululua, “O le upumoni muamua ma le sili o le faavavau atoa, e alofa le Atua ia i tatou ma Lona finagalo atoa, manatu, mafaufau, ma le malosi atoa.” E mafai faapefea e le faamalosia o lau molimau o le alofa o le Atua mo oe, ona fesoasoani e te onosaia mea faigata?

Itulau 86: Na saunoa mai Peresitene Thomas S. Monson a tatou mafaufau ia tatou faaiuga i aso taitasi, “afai tatou te filifilia Keriso, o le a tatou faia le filifiliga sa’o.” O a faiga faalelotu i aso uma e mafai ona e atiae pe faamalosia i lou olaga ma totonu o lou aiga ina ia tumau pea Keriso i le ogatotonu o au filifiliga?

Itulau 81 ma le 93: Na faamalosiau mai Peresitene Henry B. Eyring, Fesoasoani Muamua i le Au Peresitene Sili, ma Elder D. Todd Christofferson o le Korama a Aposetolo e Toasefululua, i tamā ina ia faia ni suiga talafeagai e taitai atu ai o latou aiga i le malo selesitila. I le avea ai ma se tamā, o le a se mea e mafai ona e faia, e tusa ma le saunoaga a Elder Christofferson, ina ia “faataitaia ai foliga o se tagata ua tuuto atu i le Atua i le ola ai i aso taitasi”?

Itulau 77: E ala i le taliaina o le alofa moni, e oo lava i aiga ua matua luitauina e mafai ona faamanuiaina, o le saunoaga lea a Peresitene Dieter F. Uchtdorf, Fesoasoani Lua i le Au Peresitene Sili. “Po o a lava ni faafitauli o loo feagai ma lou aiga, po o le a lava le mea e tatau ona e faia e foia ai,” sa ia faaopoopo mai, “o le amataga ma le faaiuga o le vaifofo o le alofa mama.” I lou aiga, mafaufau i le apoapoaiga faatusitusiga paia ina ia “tatalo atu i le Tama … ina ia faatumuina outou i lenei alofa” (Moronae 7:48).

Itulau e 63: Na saunoa mai Elder M. Russell Ballard o le Korama a Aposetolo faapea o fonotaga faaleaiga masani “o le a faafetaia’ia le aafiaga o tekinolosi faaonapo nei ia e tele lava ina faalavelave ia i tatou mai le faaaluina o taimi lelei faatasi ma le tasi ma le isi ma o loo faapea foi ona faamoemoe e aumaia mea leaga i totonu o o tatou aiga.” Mafaufau e faatulaga i lou aiga o ituaiga o aufono faaleaiga e fa lea na fautuaina mai e Elder Ballard o le a “fesoasoani ia i tatou ia faamanuiaina atili ma fiafia i a tatou mafutaga faapelepele.”