Elder K. Brett Nattress

O Elder K. Brett Nattress ma lona faletua o, Shauna Lee Adamson Nattress, na faamatalaina i laua lava o ni “tagata e le atoatoa o loo vaavaai mo ni taimi o le atoatoa.”

Ua la maua le tele o taimi faapena i le gasologa o o laua olaga—e fesootai uma lava i se auala i le Faaola ma le Togiola, o le tala lea a Elder Nattress.

Fai mai Elder Nattress sa fanauina o ia e ni matua lelei, o David ma Judy Sorensen Nattress, ma e manatuaina lona tina o faitauina le Tusi a Mamona i le aiga i aso uma.

I se tasi taimi sa i ai o ia i le fale i se malologa mai le kolisi. Sa ia taulai atu i suega faaiu o i luma atu ma sa lei lelei ona faalogona, e ui na te lei lagonaina se mai faaletino.

“Afai o lelei ou faalogona ae e le o sao ou lagona,” sa fai atu ai lona tina ia te ia, “e tatau ona e alu e auauna atu i se tagata.”

Na togi e Brett se suo e sua ai le kiona i tua o le pikiapu a le aiga ma alu e taamilo e suo ia auala a fafine ua oti a latou tane a le uarota. Sa lelei atili ai ona lagona.

“Sa ou soona taulai atu i au suega faaiu, sa galo ai ia te au le faamoemoega moni o le olaga o le auauna atu i isi,” o lana tala lea.

Na soifua mai Elder Nattress i le aso 4 o Mati, 1965, i Pocatello, Idaho, ISA. Sa siitia atu le aiga i Liae, Iuta, ISA, lea sa latou ola ae ai ma ona tei e toalima i se tamai faatoaga a le aiga.

Sa ia feiloai i lona toalua i le lumanai a o avea uma i laua ma tagata e tausaga faaiu i ni aoga maualuluga e tuaoi. Ina ua uma ona ia toe foi mai mai le auauna atu i le Misiona a Kalefonia Sacramento mai le 1984 i le 1986, sa la faaipoipo i le Malumalu o Sate Leki i le aso 24 o Aperila, 1987. E toafitu o laua alo.

Sa ia auai i le Iunivesite o Polika Iaga i Provo, Iuta, ma faauu mai le Iunivesite o Iuta i le 1990 ma le faailoga i togafitiga faaletino. Faatasi ai ma lona uso o David, sa la faavaeina le Advanced Health Care Corp. i le 2000.

Sa auauna atu Elder Nattress i le tele o valaauga o le Ekalesia, e aofia ai le avea ma se peresitene o Alii Talavou a se uarota, epikopo, peresitene o Alii Talavou a se siteki, peresitene o se siteki, ma se Fitugafulu Eria. I le taimi o lona valaauga, sa ia pulefaamalumalu ai i le Misiona faatoa faatuina o Arisona Gilbert.