Elder Valeri V. Cordón

Mai lona tina, o le sa auai i le Ekalesia i le 16 o ona tausaga, sa maua ai e Elder Valeri Vladimir Cordón Orellana se faavae i le talalelei lea sa faamanuiaina ai o ia ina ua ia siitia atu i le 95 maila (150 km) le mamao ese mai lona nuu moni o Zacapa, Kuatemala, ina ia auai i le aoga maualuga i le Aai o Kuatemala ma aoga ai i le faasaienisi i le komepiuta.

“O le mea aupito sili ona taua na ou maua mai lo’u tina e faapea ia matua faaaloalo i mea paia uma o le Ekalesia,” o le tala lea a Elder Cordón, o le alo o Ovidio ma Ema Orellana Cordón.

Sa soifua mai Elder Cordón i le aso 19 o Fepuari, 1969, i le Aai o Kuatemala, ma sa faaaluina lona laitiiti i Zacapa. Sa malaga lona tama i Sikako, Ilinoi, i le Iunaite Setete e faigaluega. A o i ai iina, sa faatosinaina o ia e tagata o le Ekalesia ma maua ai le savali o le talalelei mai faifeautalai. Sa faamauina le aiga i le Malumalu o Mesa Arisona i le 1972, ina ua tolu tausaga o Valeri.

Fai mai Elder Cordón sa tuputupu ae lona fiafia i le talalelei ao ia faalogo i lona tina o usuina sooa ia viiga o le Ekalesia ma pese e pei o le “O Au o se Atalii o le Atua” ma le “Faamoemoe Latou te Valaau Au i se Misiona.” Sa auauna atu Elder Cordón i le Misiona a El Salvador mai le 1987 i le 1989.

Na ia faaipoipo atu ia Glenda Zelmira Zea Diaz i le aso 25 o Mati, 1995, i le Malumalu o le Aai o Kuatemala i Kuatemala. Sa faamoemoe Sister Cordón e auauna atu i sana foi misiona, ae na suia ana fuafuaga ina ua ia feiloai ia Valeri. Mulimuli ane, sa ia iloaina o ia o le alii talavou lea sa faamemelo i ai lana vaai i le taimi sa ia vaai ai i lona ata i se mekasini a le Ekalesia i tausaga na muamua atu. E toatolu o laua alo.

Sa maua e Elder Cordón se faailoga o le tagata malaga mai le Iunivesite o Mariano Galvez i Kuatemala i le 2010 ma se faailoga o le matuaofaiva i pulega faapisinisi mai le Inisitituti o Tekinolosi a Masatusa i le 2012. Sa ia galue ai o se faatonu o le polokalama o faamatalaga i le kamupani o vailaau faafomai ma talu mai le 2012 i Pepsico Meaai Mekisiko, Amerika Tutotonu ma Keripiane.

I le taimi o lona valaauga, sa auauna atu Elder Cordón i le Korama lona Fa o Fitugafulu i le Eria a Amerika Tutotonu. Sa ia auauna atu i le au peresitene o le Misiona a Costa Rica San José i Sasae mai le 1998 i le 2000.