Aoaoina Mai ma le Aoao Atu o le Talalelei

O le aoaoina, ola ai, ma le aoao atu o le talalelei e taua tele i lo tatou tuputupu ae faaletagata lava ia ma o ni vaega e manaomia mo a tatou tapuaiga i le aso Sapati. O se vaega o taumafaiga faifai pea ina ia fesoasoani i tagata ia tuputupu ae ao latou fausia le faatuatua i le Tama Faalelagi ma Iesu Keriso ma faaleleia atili ia tapuaiga i le Sapati, ua faalauiloa mai ai e le Au Peresitene Sili ma le Korama a Aposetolo e Toasefululua i le taimi o fonotaga faaleautaitai o le konafesi aoao se taumafaiga fou e faaleleia atili le aoao atu ma le aoaoina o le talalelei. Ua valaaulia tagata o le ekalesia ia:

1. Faaaoga ia mataupu faavae i le Aoao Atu i le Ala a le Faaola. O lenei tusi lesona fou e taulai atu i mataupu faavae faigofie ae mamana lea na faaaogaina e le Faiaoga Sili. O le sini mo faiaoga uma, e pei ona ta’ua i le tusi lesona, o le “aoao atu o aoaoga faavae manino o le talalelei, e ala i le Agaga, ina ia mafai ai ona fesoasoani i fanau a le Atua e fausia lo latou faatuatua i le Faaola ma avea atili e pei o Ia.”

E ui o le tusi lesona ua faamoemoe mo i latou e i ai se valaauga e aoao atu ai, soo se tasi lava o le a iloa le aoga i le aoaoina e aoao atu i le ala na aoao ai le Faaola. E mafai e matua ona faamanuiaina mai le faaaogaina o mataupu faavae o loo i totonu o le tamaitusi pe a aoao atu i le fale.

2. Auai i fonotaga a aufono a faiaoga. O fonotaga a aufono a faiaoga e le tutusa ma kosi o le faaleleia o faiaoga na i ai muamua. I le avea ai ma aufono, o nei sauniga o le a maua ai avanoa mo faiaoga e talanoaina faatasi ma aoao mai le tasi ma le isi mataupu faavae o le Aoao Atu i le Ala a le Faaola. O nei sauniga, ina ia faia e faatasi i le masina i le taimi o le poloka o sauniga i le Aso Sa, o le a faalauiloa atu i le lalolagi atoa i le 2016.

3. Ia avea ma tagata filiga o loo aoaoina le talalelei. Ua uunaia tagata o le ekalesia ma faiaoga e avea ma tagata filiga o loo aoaoina le talalelei i le fale. O le aoaoina ma le ola ai i le talalelei i le aluga o le vaiaso e saunia ai tagata e auai i lesona i Aso Sa, lea e mafai ona fatuina ni aafiaga anoa mo le aoaoina mo tagata uma.

I le avea ai ma fanau a le Tama Faalelagi, ua ia i tatou uma le malosiaga e avea ai faapei o Ia. Soo se tasi e naunau e aoao ma ola i le talalelei e mafai ona avea atili e faapei o o tatou matua faalelagi ma toe foi atu e mau faatasi ma i laua. O le tapuai atu i le lotu ma i le fale e fesoasoani ia i tatou e atiina ae lena ituaiga o faatuatua i le Tama Faalelagi ma Iesu Keriso.