Elder W. Mark Bassett

O taumafanafana uma lava ao laitiiti, e malaga faatasi ai W. Mark Bassett ma lona aiga mai lo latou fale i le eria o Sacramento, Kalefonia, ISA, e asiasi i lona tinamatua i Alapama, ISA. I le taimi o la latou malaga atu iina, e taumafai lava le aiga e faia ni asiasiga i ni nofoaga anamua o le Ekalesia.

Pe o le asiasi atu i lotoa logologoa o Navu, Ilinoi, po o le savali e ala atu i le Vao Paia i Palamaira, Niu Ioka, e manatuaina e Elder Bassett ni lagona malolosi sana mauaina—ao tamaitiiti lava—ao ia asiasi atu i na nofoaga paia.

“Sa matou lagonaina se mea iina,” o lana tala lea. “O le ala lena sa fatuina ai la’u molimau, e ala i aafiaga laitiiti.”

O lena molimau na mauaina ao laitiiti na avea ma se puna o le malosi mo Elder Bassett i lona soifuaga atoa.

Na soifua mai i le aso 14 o Aokuso, 1966, ia Edwina Acker ma William Lynn Bassett, i Carmichael, Kalefonia, o Elder Bassett o le lona lua o le fanau e toalima. O le auauna atu i le Ekalesia ma le ola ai i le talalelei o ni faamuamua taua lea i lona aiga.

Ina ua uma ona auauna atu i le Misiona a Kuatemala Aai o Kuatemala mai le 1985 i le 1987, sa siitia atu Elder Bassett i Provo, Iuta, e auai i le Iunivesite o Polika Iaga. Na ia faaipoipo ia Angela Brasher i le Malumalu o Sate Leki i le aso 20 o Tesema, 1989. O i laua o ni matua o se fanau e toalima ma fanau a fanau e toalua.

I le 1991, na maua ai e Elder Bassett se faailoga i le tausitusi mai le BYU ma mulimuli ane toe siitia atu faatasi ma lona aiga i le eria o Sacramento e galulue i le kamupani siiatoa e faatauofo atu ai taavale. Sa ia galue o se taitai faamaopoopo i le Brasher Sacramento Auto Auction ma avea ai ma taitai sinia o mea tau tupe ma o se tasi o paaga e anaina le West Coast Auto Auctions, Inc., lea na ia faafoeina ai le faatauofo atu o taavale i le itu i sisifo atoa o le Iunaite Setete.

Na auauna atu Elder Bassett i le tele o tofiga i le Ekalesia, e aofia ai le avea ma se peresitene o Alii Talavou a se uarota, epikopo, fuatua maualuga, peresitene o se siteki, peresitene o le Misiona a Arisona Mesa mai le 2007 i le 2010, ma se Fitugafulu Eria.