Elder Gary B. Sabin

E tolu laau Kerisimasi o loo tutu matilatila mo le manatuaga o Elder Gary B. Sabin.

O le laau muamua o se laau Kerisimasi matagofie o lona talavou. Ina ua a’e Gary i le laau e taumafai e aapa atu i se lole tootoo, sa pau ifo i lalo le laau atoa i le eleele.

O le lona lua o se lala evergreen na ia mauaina ao avea ma se faifeautalai o loo auauna atu i Peleseuma ma Netalani mai le 1973 i le 1975. Sa ave e Elder Sabin ma lana soa le lala i le la fale mautotogi ma faatu i luga faataamilo i kata o le Kerisimasi sa la mauaina mai le fale.

O le lona tolu o se laau sa faia i moli o le Kerisimasi na faataupe i le tulaga o le IV i talaane o le moega a le falemai a lona afafine. O se tasi o le fanau e toatolu a Sabin e maua i le cystic fibrosis, sa faia se taotoga a lona afafine e sui ai ona mama i le mavae ai o le tausaga e tasi talu ona maliu lona tuagane mai le mai lava e tasi.

“Ua ma aoaoina ni mea se tele mai i a maua fanau nai lo mea ua latou aoaoina mai ia i maua,” o le tala lea a Elder Sabin.

I le avea ai ma se Pulega Aoao o le a ia manatuaina laau Kerisimasi ma lesona sa ia aoaoina mai ia i latou. E faamamafa mai e laau taitasi ni vaega o lana malaga—mai se tama talavou o loo manao i se lole tootoo i se faifeautalai o loo aoao atu le ata o le faaolataga i se tama o loo faalagolago i le fuafuaga ma le alofa o le Faaola e lagolago ai lona aiga e ala i tofotofoga faaletino.

Sa soifua mai Gary Byron Sabin i Provo, Iuta, ISA, i le aso 7 o Aperila, 1954, ia Marvin E. ma Sylvia W. Sabin. Sa ia faaipoipo atu ia Valerie Purdy ia Aokuso 1976. O i laua o i ni matua o se fanau e toalima; o le tamaitiiti lona ono na maliu i lona fanau mai.

Ina ua uma ona faauu mai le Iunivesite o Polika Iaga i Provo, sa maua e Elder Sabin se faailoga o le matuaofaiva i mea tau pulega mai le Iunivesite o Stanford.

Sa auauna atu Elder Sabin i le tele o valaauga a le Ekalesia, e aofia ai le avea ma se epikopo, peresitene o se siteki, ma se Fitugafulu Eria. Sa faigaluega o ia o se tagata na faavaeina, taitaifono, ma le Pule Faatonusili o le tele o kamupani, e aofia ai le Excel Realty Trust, Price Legacy, Excel Realty Holdings, ma le Excel Trust.

I le 1993, sa faatulagaina ai e Elder ma Sister Sabin le Sabin Children’s Foundation, o se faalapotopotoga e tuuto atu i le taulimaina o manaoga faafomai a tamaiti.