Elder Peter F.Meurs

A o talavou, sa nonofo Peter Meurs ma lona aiga i autafa o se tuaoi o le sa i ai sana faleoloa e “lipea ai soo se mea lava” mo masini o le faatoaga. Sa faaaluina e Peter le tele o taimi i le faleoloa e faifai ai masini faifaatoaga ma fausia ai ni tamai uilaafi ma tamai taavale tutuu. Sa aoaoina mulimuli ane e Peter le faaenisinia taavale i le Iunivesite o Monash i Meleponi, Ausetalia.

A o faia ana aoaoga i le 18 tausaga, sa ia faailoa atu i le iunivesite na te manaomia se malologa mo le lua tausaga e auauna atu ai i se misiona mo le Ekalesia. Na tau atu ia te ia e mafai ona ia toloa mo nao le tasi le tausaga; o le umi o le toloina o lona uiga o le a lusi ai lona nofoaga i lana polokalama. Sa tonu ia te ia e le auauna atu.

Ae peitai, i se taimi puupuu mulimuli ane, sa ia faalogo ai ia Peresitene Spencer W. Kimball (1895-1985) o folafola atu i le taimi o le konafesi aoao e tatau i alii talavou agavaa uma ona auauna atu i se misiona (tagai i le “Planning for a Full and Abundant Life,” Ensign, Me 1974, 87).

“Sa pei na fetalai mai o ia ia te au. Na alu sao atu lava ia te au,“o le tala lea a Elder Meurs. Sa ia filifili lava i le iuga e auauna atu. E tasi le vaiaso a o le’i alu, na ia maua ai se tusi mai le iunivesite e faatagaina ai o ia e tolopo [lana aoga] mo le lua tausaga.

Na toe foi Peter i lana aoga ina ua maea lana misiona, ae sa avea lana auaunaga faafaifeautalai, na ia fai mai ai, “ma aoaoga sili na ou mauaina.” Sa aoao atu e le talalelei ia te ia o le “fesoasoani i tagata ina ia manuia o le mataupu faavae faaletaitai aupito sili ona taua.”

Ina ua maea lona faailoga o le tagata malaga i enisinia taavale, sa galue Elder Meurs o se enisinia mo galuega faatino mo Esso Ausetalia ma o se tasi na faavaeina le WorleyParsons Limited. Sa ia galue talu ai nei o se faatonusili o atinaega o le Vaega o Uamea Fortescue.

Ina ua mae’a lana misiona, sa ia faaipoipo atu i se tamaitai na te tauaina o lana uo mamae, o Maxine Evelyn Thatcher, i le aso 2 o Ianuari, 1979, i le Malumalu o Hamilitone Niu Sila. E toalima o laua alo ma fanau a fanau e toaiva.

O Elder Meurs—na soifua mai i le aso 21 o Tesema, 1956, i Warrnambool, Victoria, Ausetalia, ia Frederik ma Lois Jones Meurs—sa auauna atu i le tele o valaauga, e aofia ai le avea ai ma peresitene o le korama a toeaina, ta okeni a le uarota, peresitene o Alii Talavou a le uarota ma siteki, faatonu o le va i fafo, peresitene o se paranesi ma se itu, epikopo, peresitene o se siteki, ma se Fitugafulu Eria.