Toomaga mo Tagata Sulufai: “Sa Fai A’u ma Tagata Ese”

Faatasi ai ma le faamaoniga a le Au Peresitene Sili, ua valaauliaina e le au peresitene aoao o le Aualofa, Tamaitai Talavou, ma le Peraimeri ia tamaitai o vaitausaga uma ina ia tuuina atu le auaunaga i tagata sulufai i o latou alalafaga ma nuu i le lotoifale e ala atu i se taumafaiga laveai ua faaautuina “Sa Fai A’u ma Tagata Ese”” (tagai i le Levitiko 19:34; Mataio 25:35).

“E toatele o loo aofia i totonu o i tatou e mafai ona faamanuiaina e ala i faauoga, faufautua, ma isi auaunaga ma le alofa faaKeriso,” o le tala lea a Sister Linda K. Burton, peresitene aoao o le Aualofa. “O le tuuina atu o sea ituaiga o auaunaga o se vaega taua lea o le talalelei.

“Ua toe faamanatu maia ia te au se mau o loo fai mai e le tatau ona ‘galo le alofa i tagata ese; aua o lea ua talia ai e isi o agelu ma le le iloa ’ [Eperu 13:2],” na fai mai ai Sister Burton. “Matou te fautuaina ia tamaitai ina ia saili ma le agaga tatalo ni avanoa e auauna atu ai ma mafaufau e saili ni auala e lagolagoina ai nuu i le lotoifale ma faalapotopotoga faalemalo. Atonu e te maua ni manatu aoga i le IWasAStranger.lds.org, ma e mafai ona e faasoa atu ni aafiaga i le auina atu o se i-meli i le IWasAStranger@ldschurch.org. ”

Na auina atu se tusi mai le Au Peresitene Sili e uiga i le “Sa Fai A’u ma Tagata Ese” i aufono a siteki, uarota, ma paranesi i le faaiuga o Mati. Na auina faatasi atu le tusi ma taiala mo taitai. “E mafai ona auai tamaitai i lenei taumafaiga pe a faatagaina e le taimi ma tulaga,” na fautuaina mai i le tusi, “ia mautinoa e leai se tasi o faamoemoe e ‘momoe e televave atu nai lo le malosi ua ia te ia’ ma ua ‘faia mea uma i le faatulagaga tatau ai’ (Mosaea 4:27).” Sa uunaia foi i le tusi a le Au Peresitene Sili i le aso 27 o Oketopa, 2015, ia tagata uma o le ekalesia ina ia tuuina atu se auaunaga faaKeriso ia i latou e manaomia le fesoasoani.

O se tusi mai peresitene aoao o le Aualofa, Tamaitai Talavou, ma le Peraimeri sa tuuina atu ai nisi o faamatalaga e uiga i le “Sa Fai A’u ma Tagata Ese” lea e lei leva foi ona tufatufaina atu i sauniga o na faalapotopotoga.