150 Malumalu o loo Faaaogaina
I le taimi o le sauniga i le taeao o le Aso Sa o le konafesi, sa fofogaina mai ai e Peresitene Thomas S. Monson ia fuafuaga e fausia ni malumalu faaopoopo se fa: Belém, Pasila; Quito; Ekuatoa; Lima, Peru; ma Harare, Zimbabwe.
Talu mai le konafesi aoao ua mavae, ua tutupu mea nei e aofia ai malumalu:
Faapaiaga ma le Toe Faapaiaga
Faatasi ai ma le faapaiaga o le Malumalu o Provo City Center i Provo, Iuta, ISA, ua atoa nei le 150 malumalu a le Ekalesia ua faaaogaina i le lalolagi atoa. Sa faapaiaina le malumalu i le aso 20 o Mati, 2016, i nai aso ao lumanai le faamanatuina o le 180 tausaga o le faapaiaga i le aso 27 o Mati, 1836, o le Malumalu o Katelani, o le uluai malumalu o le Toefuataiga.
E tolu isi malumalu sa faapaiaina pe na toe faapaiaina: o le Malumalu o Montreal Quebec ia Novema 2015, o le Malumalu o Tijuana Mekisiko ia Tesema 2015, ma le Malumalu o Suva Fiti ia Fepuari 2016.
Ua faatulagaina foi taimi ma aso o faapaiaga mo le Malumalu o Sapporo Iapani, i le aso 21 Aokuso, 2016; Malumalu o Filatelefia Penisilevania, 18 Setema, 2016; Malumalu o Fort Collins Colorado, 16 Oketopa, 2016; Malumalu o Star Valley Wyoming, 30 Oketopa, 2016; ma le Malumalu o Hartford, 20 Novema, 2016.
O le Malumalu o Freiberg Siamani ua toe faafouina o le a faapaiaina i le aso 4 o Setema, 2016.
Fausiaina ma le Toe Faafouina
O loo faaauau pea le fausiaina o le Malumalu o Concepción Chile, Malumalu o Pale Farani, Malumalu o Roma Italia, ma malumalu nei i le Iunaite Setete: Cedar City Utah, Meridian Idaho ma Tucson Arisona. O aso e faamaeaina ai e amata mai le 2016 e oo atu i le 2018. O loo faatalitali le fausiaina atoa o le Malumalu o Fortaleza Pasila. O Malumalu o Frankfurt Siamani, Jordan River Iuta, ma Idaho Falls Idaho o loo faagaoioia nei ia le toe faafouga.
Suatiaina o le eleele
Sa faia se sauniga o le suatiaina o le eleele mo le Malumalu o Lisbon Potukale ia Tesema 2015 ma le Malumalu o Barranquilla Kolomupia ma le Malumalu o Kinshasha Ripapelika Temokarasi o Congo ia Fepuari 2016. O le suatiaina o le eleele mo le Malumalu Durban Aferika i Saute sa faia i le aso 9 o Aperila, 2016.
Fuafuaina ma Sauniuniga
Ua fofogaina nei malumalu ae o loo i ai pea i laasaga o le fuafuaina ma le sauniuniga: Abidjan Ivory Coast (Côte d’Ivoire), Arequipa Peru, Bangkok Taialani, Port-au-Prince Haiti, Rio de Janeiro Pasila, Urdaneta Filipaina, ma Winnipeg Manitoba.