Elder S. Mark Palmer

I le 1992, sa avea le taimi ma se oloa taua ma faatapulaaina mo Elder S. Mark Palmer ma lona faletua, o Jacqueline.

Sa galue Elder Palmer o se fautua maualuga a le siteki i lea taimi. Sa ia galue malosi foi e fausia lona tulaga faalegaluega. Sa tau faalolo foi le taimi o Sister Palmer. Sa tausia e le au Palmer se fanau e toaono i le la fale i Austin, Texas, ISA—e aofia ai se pepe tama e ono masina le matua.

Ina ua valaauliaina i laua e le peresitene o le siteki e galulue o ni tagata faigaluega i le Malumalu o Dallas Texas, na la leiloa pe faapefea ona toe taulimaina se isi tiute. Ae sa la taliaina le valaauga—ona la tatalo lea ma ole atu i le Alii mo se fesoasoani.

O le faia o se malaga i le pasi faalemasina e auauna atu i le aso atoa i le malumalu na manaomia ai le osigataulaga ma le fuafuaina faaeteete. “Ae sa matua faamanuiaina ai o matou olaga,” o le tala lea a Elder Palmer.

O le auauna atu i le malumalu, sa ia faaopoopo mai, na saunia ai o ia faaleagaga mo valaauga faaleperisitua i le lumanai. Na faia ai foi o ia ia avea ma se tane ma se tama sili ona lelei—ma sa ia maua ai le paleni i lona olaga pisi.

“O le alu i le malumalu e masani ona fesoasoani e toe seti ai au mea e faamuamua ma faamanatu mai ai ia feagaiga na e osia,” o lana tala lea.

Sa soifua mai Stanley Mark Palmer i le aso 11 o Fepuari, 1956, i Te Puke, Niu Sila, ia Kenneth ma Jill Palmer. Sa auai lona aiga i le Ekalesia a o laitiiti o ia. Sa ia auauna atu faamisiona i le Misiona a Niu Sila Ueligitone.

Ina ua mavae le mauaina o se faailoga mai le Iunivesite o Aukilani, sa lesitala o ia i le polokalama o le matuaofaiva o pulega faapisinisi i le Iunivesite o Polika Iaga. A o nofo ai i Provo, Iuta, ISA, sa ia feiloai ai i se faifeautalai ua maea lana misiona e suafa ia Jacqueline Wood i se tafaoga faamasani e le mailoa. Sa la faaipoipo i le aso 18 o Tesema, 1981, i le Malumalu o Sate Leki. E toaono alo ma fanau a fanau e toaiva a le au Palmers.

O Elder Palmer o le tagata na faavaeina ma le peresitene o le SMP Ventures, o se kamupani tau atiae o fanua ma fale. Sa ia auauna atu o se epikopo, peresitene o se siteki, peresitene o le Misiona a Uosigitone Spokane (2009–12), peresitene le tumau o le Misiona a Ausetalia Sini i Saute (2014), ma se Fitugafulu Eria.