Elder Evan A. Schmutz

Ua faafetai Elder Evan Antone Schmutz mo aafiaga faafaaaliga ua tuuina atu ia te ia e le Alii. Ua faalolotoina lona liua i le talalelei e ala i suesuega masani o tusitusiga paia, auaunaga i le malo, ma le usiusitai i ana tautinoga i le Atua.

Sa soifua mai i le aso 6 o Iuni, 1954, i St. George, Iuta, ISA, ia Richard ma Miriam Schmutz, sa vave ona aoao Elder Schmutz e uiga i le mana o le tatalo. I le avea ai ma se Tama Sikauti laiti sa ia faatauina atu ni pepa ulufale e US $17 i se gaoioiga a le sikauti [jamboree] ae na le mafai ona maua le tupe i le taimi e tatau ai ona ave i totonu. Sa uunaia o ia e lona tina ia tatalo, ma sa faaali mai ia te ia e le Alii le mea tonu lava lea sa i ai le tupe. O se faamaoniga malosi o le alofa o le Atua mo ia ma sa malamalama ia te ia.

I le 18 tausaga, na maliu ai le tuafafine matua o Elder Schmutz i se faalavelave tau taavale. Na i ai se aafiaga maoae ia te ia, ma aumaia ai ni aafiaga faaleagaga taua.

Mulimuli ane sa valaauina o ia i se misiona ma lipoti atu mo le aoaoina. Sa ia tatalo mo se molimau patino e uiga i le talalelei. A o matauina nisi o faiaoga o aoao atu e uiga i le Uluai Faaaliga, na ia fai mai ai, “Sa ou maua se molimau matua malosi lava na tau le mafai ai ona ou nofo i le potu.”

Ina ua uma ona auauna atu i le Misiona a Karolaina Matu Greensboro, sa taulai atu Elder Schmutz e faaauau pea ona suesue i tusitusiga paia i aso uma mo lona olaga atoa. “Ua ou maua le olioli tele, aoaoina faaletagata lava ia, ma le malamalama e ala i suesuega i taeao po mo se taimi umi tele.”

Sa faaipoipo atu Elder Schmutz ia Cindy Lee Sims i le aso 3 o Fepuari, 1978, i le Malumalu o Provo Iuta. Na mauaina e Elder Schmutz se faailoga i le gagana Peretania ma se faailoga maualuga faaloia mai le Iunivesite o Polika Iaga. Sa ia galue faapolofesa mo le tele o ofisa faaloia mai le 1984 i le 2016.

A o taulimaina manaoga o le fanau e toalima, sa galue Elder Schmutz o se fautua maualuga, epikopo, uso o se au peresitene o le siteki, peresitene o le Misiona a Filipaina Cebu (2011–14), peresitene o le paranesi o le nofoaga autu mo le aoaoina o faifeautalai, ma se uso o le Korama Lona Lima o Fitugafulu.