Ang Bahaging para sa Atin

2017

Setyembre 2017

Ang Bahaging para sa Atin

Ang mga Pagpapala ng Seminary

Noong ikalawang taon ko sa seminary, tatlo lamang ang estudyante sa klase namin, pero may guro kaming kahanga-hanga na masayang nagbahagi sa amin ng ebanghelyo. Natutunan namin sa isa naming klase kung gaano karaming tao ang nag-akalang magkakawatak-watak ang Simbahan kasunod ng pagkamatay ni Joseph Smith at ng kanyang kapatid na si Hyrum. Pero naalala ng iba pang naunang mga miyembro ng Simbahan na ito ay Simbahan ng Diyos, hindi Simbahan ng tao. Itinuro sa amin ng aming guro na hindi mabibigo ang Simbahan dahil sa ito ang Simbahan ni Jesucristo.

Walang duda na nabago ang buhay namin ng araling iyon. Nang hapong iyon, nagpasiya kami na paglilingkuran namin ang Panginoon nang buong puso, kaluluwa, pag-iisip, at lakas. Naghanda kaming maglingkod sa full-time mission. Patuloy akong dumalo sa seminary.

Nang sumunod na dalawang taon, masasabi ko kung paano pinagpala ang buhay ko ng pagdalo sa seminary, pati na rin kung paano pinalakas ng aking paghahanda sa paglilingkod sa Panginoon ang aking patotoo at hangaring maglingkod.

Napatunayan ko sa pagdalo sa seminary kung gaano ako ka-espesyal sa Ama sa Langit. Nakatulong ito sa akin na ipamuhay ang ebanghelyo, at higit sa lahat ito ay nakatulong sa akin na maunawaan na ang ebanghelyo ay hindi isang bagay na ipinamumuhay lamang natin tuwing araw ng Linggo. Pinagtibay ng seminary ang hangarin kong magmisyon. Walang pag-aalinlangan sa aking isipan na patuloy ang mga pagpapala ng seminary sa buhay ko. Walang nagsabi na magiging madali ito, pero sakaling magdesisyon tayo na dumalo ng seminary, pagpapalain tayo ng Panginoon at bibigyan tayo ng lakas na kailangan upang maisakatuparan ang mga hangarin ng ating puso.

Begona C., Guayaquil, Ecuador