Ana Tabo ni Karao Kau Abuelo
E maeka te tia korokaraki i Utah, USA.
“Kam ataia, ti riai n riki n aekan te kau aei,” E taku tibuna.
“‘I kabwarabure e aki bebete n tainako taekinana” (Aia Boki n Anene Ataei, 98).
E kauka te mataroa Miguel nakon ana tabo ni karao kau abuero (tibutoruna). E aroka boin te kau are e mwakuri ma ngaia Abuelo. Bon teuana te boi ae mamaten nanona.
“Mauri, Abuelo!”
E katorobubua Abuelo ao n anaa abwakain rangan ana katitamwa iaon te mwakoro ni beeba. E aki tararake. E aki rangin n raoiroi ana kakauongp Abuelo.
E tekateka Miguel n te taibora ni mwakuri. E tekateka irarikin bwarikoriko ni kau ake a tia ni koreaki. E iangoia bwa tera ae na karaoia Abuelo ma ngaia n tatabeua, ni kabongana ana aama ao te kainikatena.
Bwainimwakuri a kauringa Miguel n te bwai teuana ae tangiria. E aki toki Abuelo n anganna te kanre n te tai are e ibuobuoki iai Miguel ni kaitiaki.
Ma e a baki ngkai Miguel! E ataia e aki kaantaningaki bwa e anai bwaai n aki tuatua, ma e taraa n ae e na tabetabe Abuelo n te tai aei. “Tao N na aki tataninga,” e iango Miguel.
Miguel e rinnako iaan te kaunta ibukin te bwatoro ni kanre. E onrake ni kanre ae mamaten nanona—e karewe ao ni katenatena ma te bwauta ae te tiri! Ngke e kaukia, e namakina te aki rau Miguel. Ma e taraa n rangin ni kangkang te kanre. E kawaekoa ao ni katukua inanon wiina.
N te tai ae waekoa e nako te katitamwa. Abuelo e anaa te mwakoro ni kau ao e kamara inanon te ran. Anne e na buokia ni kamaraua te kau ao ni kabebetea te mwakuri iai.
Miguel e kang nikiran te kanre ni kabaitiia n aron are kona. Ngkanne e nakonako nakon Abuelo.
“Mauri!” E kaeka Abuelo ma te moangare. “I kukurei bwa ko roko ni kawarai.”
Miguele e inga ma Abuelo. N ana iango e na aki kona Abuelo n tuangnga ae a tia ni kana mwakoron te kanre. E kataia Miguel ni kaotia ae aki raraoma.
“E taraa n ae ko rangin n tabetabe n te bong aei,” e taku Miguel, ni kotei kaau ake a karinanaki raoi. “Ko tangira te ibuobuoki?”
“Eng! Ko kona n anganai te karai arei?”
E ana te mwakoro ni karai Miguel. E katikia nako imarenan baina. E a matoatoa riki nakon taraakina.
“Wow, ko rangin n aintoa.”
E ngare Abuelo. “E riai n riki bwa, kabonganana ae matoatoa are ana katikui aia kau rinanona.” Abuelo e katika te karai rinanon te kunikai. Ngkanne e karekea tarakin ubuna are n tabetai e atongnga Mamá bwa tarakin “Abuelo te Wanawana”.
“Ko ataia, ti kainnanoia n riki n aekan te kau aei,” Abuelo e kaeka ni katoutoua atuna.
Miguel kaniia n taraa te kunikai. “Um. Ti karaoia?”
“Eng, ngaia anne. Ti riai n teimatoa ni korakora. N te kawai anne e na aki kona ana kairoro Tatan ni kabwakaira.”
E waekoa n uringnga te kanre ae uraura Miguel. E ataia ae na aki tuanga Abuelo taekana.
Abuelo e anaa te kau ae a rangin ni maan man te bao. “Ko nora te bwangabwanga ae bubura aei?”
E kona Miguel ni karina baina rinaon te bwangabwanga. “Eng.”
“Aio te bwangabwanga ngkoa ae uarereke are e na kaman tia ni karaoaki. Ma a tataninga, ao ngkai e nang kaangaanga riki karaoana. Katei aika buakaka ao rinerine aika buakaka ti tebo ma te bwangabwanga anne. E tamaroa riki moantaain karaoakina.”
E katoutoua riki atuna Abuelo, ao Abuelo te wanawana e rairaki ni ngare. A teimatoa n taetae ngke e mwakuri Abuelo. N tainako, Miguel e teimatoa n iangoa te kanre te kai are uaraura.
Ngke e tia Abuelo, Miguel e buokia ni kaitiaki. Ngkanne Abuelo e anaa ana bwatoro ni kanre.
N tokina Miguel e aki kona ni manga anaia. “I anaa teuana mai ibuakon am kanre!” e waekoa n taekinna.
Abuelo e katuka inano te bwatoro. “Tera ae ko taekinna?”
Miguel e tuangnga anakin te kanre n aki kakaeti. “I rangi ni kabwarabure. Abuelo! N na bon aki manga karaoia, I berita!”
Abuelo e rabwata Miguel n ae korakora. Miguel e namakina te nakoraoi riki.
“Ko rabwa ibukin am kokoaua. Anne te bwai ae rangin ni kakawaki nakoiu nakon bwaai riki tabeua.”
Ni kawaira n oki nakon mwengara, e namakinna Miguel kanga ana kau ae boou Abuelo. E karekea te korakora, ao n tauraoi ibukin te maiu!