Manga Namakinan te Mweengaraoi

I aki tauraoi ni kaekaa ana tareboon tariu. “E a tibwa mate Tinara,” e taku. “E bwaka ao e boo atuna.”

I rangin n tounako. E a mate tinara, ao I a tibwa taetae ma ngaia n te tairiki are imwaaina. I teimatoa n titirakinai bwa bukin tera e riki aei. I aki kona n ataia bwa bukin tera e na kitanai. I un! E bane au tai n iangoa uniu inanon tabeua te wiiki.

N tokina, I baireia bwa antai ae e na bukinaki. Bon ana kairua te Atua. E waekoa ni uotia nako mairou. E aki noori bwaai aika mwaiti man kakawaki tinau, ao n au iango bon mairoun te Atua. Tiaki ngai kaain te Ekaretia n te tai anne, ma ngai te Kiritian ae matoatoa. E ngae ngke I rangin katuua au iango iroun te Atua ibukin te korakora, I tannako mai Irouna ao ni katinanikua ni maiu.

I rangin mitina tinau. Ngke I a ikawai, mweengau ma au karo bon te tabo ae mano. I aki tabe bwa I mena ia ke tera ae I karaoia, n tainako I taetae ma tinau ke ni kabanea au tai ma ngaia, I namakinna ae I mena ni mweengau. Ngkai n “te mweenga” e a bua te namakin ae I tangiria.

E waaki nako te ririki, ao e kaan ni bane ni bua au onimaki. I kataia ni kaotaai bwa bukin tera e na mate tinau, ma akea te bwai ae karaua nanou. Ngkanne, ibukin tao teuana te wiiki, iango aikai aki toki n roroko n au iango: I kainnanoia ni ukoukora te atatai mai ieta. I tuanga te bwai aei raoraou ae kaain te Ekaretia. E titiraki ngkana I tangiria n reirei riki taekan ana aro.

E aki reke n au iango n te tai anne, ma e buokai te Tamnei ni karekea te kantaninga teuana riki te tai. Reiakinan te euangkerio n ae bati riki, ao e na rikirake riki namakinan reken te tabo ae mano. Te namakin ni mena n “te mweenga” e a oki.

I bwabetitoaki ni Meei 2013. I rangin ni kakaitau bwa e a oki au onimaki. I aki manga tannako mairoun te Atua. N onean mwiina, I mwaneia. Bon iai naba te nanokawaki ni waekoan buan tinau, ma ibukin au onimaki iroun te Atua, I ataia bwa n te bong teuana N na mena “n te mweenga” ma tinau ao au utu n akea tokina.