Tera, Bukin tera, ao E kanga: Rongorongon Kabwarabwaraakin Kaokan Bwaai
N reireia te euangkerio, ko na riai ni kona ni kabwarabwara bwa tera kitanan te koaua, koron boong, ao Kaokan Bwaai. Te tiata aei e kona n ibuobuoki.
Iangoia bwa iai mwanangam ae abwabwaki nakon te bike ma ana utu raoraom. Ko rangin unga, ma ko a moanna ni miti oin am utu. Ngkanne e a tekiti tamam ni kanakoa ana rongorongo nakoim n nooria bwa a uara bwaai ni kabane—bon te bwai are ko kainnanoia n namakina tangiram ao uringakim.
Te maiu iaon te aba e uarereke n aron anne. Te Atua e aki kanako tekiti nakoira, ma ti raroa nako man mweengara i karawa, ngaia are teuana te kawai n reita Ana tangira te Tama are i Karawa ibukira bon man karokoaia ana burabeti.
Koron Boong
Kamataata n te tamnei iroun Ben Simonsen
Burabeti a kairiiri are e aranaki bwa koron boong, waakin te tai ngke (1) iai temanna ana aomata te Atua te tia kariiri n te nakoanibonga ae e anganaki te kariaia iaon te aba ao (2) te tia kairiiri aei, te burabeti, reiakina taekan te babaire ni kamaiu ae kaineti n roko mairoun te Atua. Te burabeti ngkanne e reirei, ke n anga, te euangkerio nakoia aomata.
Ibukin booki aika tabu, ti atai taekan koron boong aika mwaiti. Tabeua aika kakawaki bon mairoun Atam, Enoka, Noa, Aberaam, Mote, Iesu Kristo, ao Iotebwa Timiti. Te Uea e moanna man koron boong rinanoia burabeti aikai n tatabemaniia nako.
Kitanan te Koaua
Kitanan te koaua bon titebo ma te buakaka. Ngkana te aomata ke kurubu n aomata a rairaki nako man koauan ana euangkerio Iesu Kristo, e kaitaraia burabeti, ao ni moanna ni bure, a kitana te koaua.
E Kanga n Riki Kitanan te Koaua
Te Atua e wetea te burabeti, are e reireia ana euangkerio ae koaua Iesu Kristo.
Aomata ake a ira ana reirei te burabeti a kakabwaiaaki.
Tabeman aomata a riki ni kainikatonga ao ni kaitara te burabeti.
N taainako te Uea e kamwaawaia ana burabeti mairouia aomata ake a kaitarai ana reirei te euangkerio.
Ngkana e eti te tai, te Atua e wetea te burabeti ae boou ni manga kaoka te koaua, te nakoanibonga, ao te Ekaretia.
Kaokan Bwaai
Kaokanbwaai bon te mwakuri ni kaokakin te bwai nakon tein arona mai imwaaina. Tiaki te bwai ae onikaki, are e bita te bwai ae maiu ni karika te bwai ae boou. N aron te katoto, ngkana ko tangiria ni manga kabooua te auti ae e a mane, ko na manga moan kateia nakon tein tamneina are mai imwaaina. Ko na bae n tangiria ni kaira te tabo ni kanaiai, ma ngkanne ko na bae ni bita te auti, n aki kabooua.
Ana euangkerio Iesu Kristo e kainnanoa manga kaboouana ibukina e a tia ni bua n tain Kitanan te Koaua ae Moan te Korakora. Aomata a maiu inanon tienture n akea te Ekaretia. Ngaia are te Uea e a manga kaoka Ana Ekaretia ao ana euangkerio rinanon Iotebwa Timiti, n aron aia taetae ni burabeti burabeti ake ngkoa (taraa Itaia 2:1–3; 29:13–14; Makuri 3:19–21; Te Kaotioti 14:6–7; 2 Nibwaai 3:3–15).
Ana euangkerio ae koaua Iesu Kristo e bon mena ikai n taainako—ngaia are ko na reitinako n onimaki ibukina bwa e mena iai? E ngae ngke e rikirake ni buakaka te aonaaba, Iesu Kristo e na teimatoa ni karokoa te toki.
Iai am rinerine ae ko na karaoia—te aekaki n rinerine are a na karaoi aomata ni kabane n te maiu n rabwata man moan waakin te tai: ko na iriira te burabeti? Ngkana ko karaoia, ko na kakabwaiaki ao ni karekea te Tamnei are e na kairiiko.
Atam
Atam bon te bwaeoniia ae koaua: boni ngaia te moan aomata iaon te aba ao te moan burabeti! E reireiniia ana utu taekan te euangkerio, ma ngke a moan karikaki bwaai, a mwaiti aika “a tia n ukoukori oin aia reirei n te ro” ao ni kaitara te koaua (Mote 6:28).
Enoka
Ko a tia n ongo taekan te kaawa ae bwanin ae e tabekakirake nako karawa? Eng, te kaawa ae Tion—e kateaki iroun Enoka—e rangin kororaoi are botanaomata a nako ni maeka ma te Atua (taraa Mote 7:23).
Nooa
Ko ataa rongorongon ana aake Nooa. Tii waniman aomata—ana utu Nooa—a maiu n tain te Ieka ibukina a ongo n ana kauring Nooa (taraa Karikani Bai 7; Mote 8). Ma ko a ataia bwa e karekea te nakoanibonga ngke 10 ana ririki ni maiu (taraa D&C 107:52) ao bwa “aintoa … a ukoukora Nooa bwa a na anaa maiuna”? (Mote 8:18).
Aberaam
E a kuri ni kareanaki Aberaam irouia ibonga ni kewe aika a buakaka, ma e kamaiua te anera (taraa Aberaam 1). Iai irouna tabeua kaotioti aika kakukurei, n raonaki ma te mii ibukin te maiu are imwaain te maiu aei. Membwa n te Ekaretia bon kanoana, ao te berita ae tabu ibukin Aberaam e aranaki n arana. (Taraa Aberaam 2–5.)
Mote
Mote e kairiia tibun Iteraera ni kaotinakoia mai Aikubita ao ni buokiia ni kainaomataiia. E “teimatoa n ukoukora katabuaia ana aomata bwa aonga n noora ubun te Atua; ma a kamatoa nanoia ao a aki kona n tei n aki rotaki imatana” (R&B 84:23–24). Ni koauana, ibukin kitanan te koaua irouia a tiotionako inanon te rereua ibukin 40 te bong!
Iesu Kristo
E aki tii reirei te euangkerio Iesu Kristo ao ni karaoi taian kakai, ma E katea naba Ana Ekaretia iaon te aba. E mate ibukin ara bure ao n tauraki n te kaibangaki bwa ti aonga ni kona n tokanikai iaon te mate n tamnei ao te mate n rabwata. Boni ngaia atuun Ana Ekaretia, ao Ngaia ao te Tama are i Karawa boni ngaiia moan rikin te kariaiakaki ibukin te nakoanibonga.
Kitanan te Koaua ae Moan te Korakora
Imwiin Mangautin te Tia Kamaiu, Ana Abotoro ao tabeman taan kairiiri n te Ekaretia a kataia ni kabuta te euangkerio, ma aomata a aki butimwaea aia reirei ao a tiringiia angiina Abotoro. Ibukin buakakaia aomata, bwaninin te euangkerio e a bua mai iaon te aba. E rabuna aonaaba te roo (taraa Itaia 60:2).
-
N ae e riaon riki 1,000 te ririki, aki kona aomata n rin nakon otenanti ni kamaiu, kakabwaia man te tembora, ke ana kairiiri te burabeti.
-
Koaua aika onoti a bua man te Baibara.
-
Iango aika kewe a reiakina oin rikin te Atua ae koaua.
-
Tabeua otenanti ni kamaiu a bitaki ke n reiakina ae bure (taraa Itaia 24:5).
-
N tokin kitanan te koaua aei e a karika are a tei iai aro aika mwaiti.
Manga Oneaki
N tain Kitanan te Koaua ae Moan te Korakora, tabeman aomata ake a taua te aro i Eurobe a ataia bwa ana euangkerio Iesu Kristo e aki reiakinaki n ae eti. Taan oniki koaua tiaki burabeti, ma a karaoa aia kabane ni konaa n reiakina te koaua ngkai a ota iai. A buoka ni katauraoa e Baibara nakoia aomata aika mwaiti. Angiina a tei ibukin inaomataia aro ao a kauka te kawai ibukin Kaokan te euangkerio.
Iotebwa Timiti
Ngaia are bwaninin te euangkerio e bua n aki toki? E aki! Te Uea e a manga moan kaoki koaua aika kakawaki nakon Iotebwa Timiti. Taan uarongorongo mai i karawa a kaoki ni kabane kiingin te nakoanibonga aika kakawaki nakoina (taraa R&B 27:8–13; 110; 128:18–21), ni karaoa aei ni “kororaoin bongina” (R&B 138:48). E ataaki naba n arana ae boong aika kaitira ibukina bwa bon te kabanea ni bong imwaain Kauoakin Iesu Kristo.
Kaokan Bwaai
Ketinna bwa tera? Ko karekei kakabwaia man Kaokan Bwaai. Eng, ngkoe!
-
Ana Ekaretia Iesu Kristo e kaokaki ma te burabeti ao abotoro bwa a na kairia.
-
Ana Boki Moomon, Reirei ao Berita aika Tabu, Bwaeao aika Bati Booona, ao tabeua kaotioti aika ngkai a kaoki koaua aika onoti ake a kaman tia ni bua (taraa 2 Nibwaai 27).
-
Iotebwa Timiti e karekea te Nakoanibonga ae te Aaron mairoun Ioane te Tia Bwabetito (taraa R&B 13) ao te Nakoanibonga ae te Merekitereka mairouia Abotoro aika Betero, Iakobo, ao Ioane (taraae R&B 128:20).
-
Kaain te nakoanibonga aika iai kariaiakaia a karaoi otenanti ibukin te kamaiuaki n ae riai.
-
Ao ti ataia bwa e na aki manga bua te koaua rinanon kitanan te koaua (taraa Taniera 2:44).