Aio te Tabo
Simeon Nnah
Aba, Nigeria
Kamataata n te tamnei iroun Allen Garns
Tamau, te Kiritian ae matoatoa, e reireinai bwa N na karekea te onimaki iroun Iesu Kristo. Te onimaki anne e buokai ni kamaiuai n ana buaka Nigeria ae teniua ririkina 1960 ngke I mena n te taanga ni buaka. Imwiina, I moanna ni mangaongao ao ni katoka te nako n taromauri.
Ngke I roko n te United States n 1981 bwa N na reirei, I namakinna bwa I kainnanoa te Atua ni maiu. Inanon uoua te ririki I kaei aaro aika kakaokoro i Boston, Massachusetts, ma akea mai ibuakoia ae e anaa nanou. I aki namakina te Tamnei, ngaia ae I aki manga tarataranako riki.
E aki maan imwiin kainabau, Mabel, e raonai mai Nigeria n 1984, I moanna ni karekea te nano ae korakora ni manga oki nakon te Atua ao ni kaina te aro. Raoraou ae roko mai Nigeria e aki ataia ae I kakaea te aro, ma e tuangai taekan te aro ae e a tia n ongo ae iai ana boki ae arana ana Boki Moomon.
Imwiin anne, I reitinako ni ukoukorii aaro. I kunea te aro ae arana ana Ekaretia Iesu Kristo Ibukiia Aika Itiaki ni Boong Aika Kaitira. Te taeka aika itiaki e katika matau. I aki ataia ae iai te aro ma kaaina aika a atongaki bwa aika itiaki. N te Tabati anne I iangoia bwa N na kataia.
Ni bootakin te toa are I kaea, kaain te taromauri a anenei anene aika rau, ibonga a kakabwaia te kariki ao te ran, ao karaoan te taromauri e barongaaki raoi ma te nanorinano. Imwiina, ngke I nakonako nakon te kawai n rin ao n iangoa taekan te mwakuri, I ongo arau.
“Simeon,” e taku bwanaan te Tamnei, “aio te tabo.”
N te tai anne, a kawarai uoman mitinare. A kabwarabwaraiia ao ana Boki Moomon. I taraia ao n taku, “I aki ataa taekan ana Boki Moomon, ma I ataa te Baibara. I a tauraoi.”
A moanna n reireinai taekan te baire ni kamaiu. E kee iaan te namwakaina imwiina, I bwabetitoaki. Kainabau e kaina te Ekaretia teutana te tai imwiina. Tabeua te ririki mwiina, ti kabaeaki n te Washington D.C. Tembora ma natira ake niman.
Inanon te tembora, a mwaiti bwaai aika a kaotaki nakoiu, ma te taeka ae I ongo n au moanibong n te ekaretia e a tia ni kamatoaki nakoiu rinanon te kaotioti ao inanon te tembora. “Aio te tabo.” Mwiin te rongorongo anne mairoun te Tamnei ae Raoiroi e a tia ni bita maiu ao maiun kainabau ao natiu n aki toki.