Reirein te Euangkerio
Moaningabongin te Tabati Ane e Ootamwaaka Anne
Man te marooro n te maungatabu ni kabuta n Okitobwa 2006.
N te bong anne, te Uea ae e a uti e urua ana kabaebae te mate. E waerake man te ruanimate ao ni kaoti inanon te mimitong ao te tokanikai ngkai te Tia Kamaiu ibukiia aomata ni kabane.
Ti ataia bwa tera te Mangauti—bon manga ikotakin te tamnei ao te rabwata n teina ae kororaoi. …
Ko kona n iangoa anne? Kam kona n iangoia bwa e na aekakira aron te maiu n aki toki ma rabwatara n aron moan tein maiura? A na akea te aoraki, a na akea te maraki, a na akea te rawawata man te aoraki are e riki n angin te tai are e taoniira nako n te maiu ae mamate?
Te Mangauti bon mwakoron te onimaki ae moan te kakawaki n aroia Kiritian. …
… Ngke e uti te Tia Kamaiu man te mate, … iai te bwai ae E karaoia ae akea temanna ae kona ni karaoia. E urua ana kabaebae te mate, tiaki tii Ibukina ma ibukiia naake a bane ni maiu—akana a raoiroi ao akana aki raoiroi. …
… E katauraoa te bwaintangira anne nakoia aomata ni kabane. Ao ma te mwakuri ae tikiraoi anne, E kakerikaaa nanoia koraki ake a karawawataaki, katoki rawawatan tamneia ake a a bua aia utu aika tangiraki irouia.
I iangoia bwa aekakira te rootongitong n te Kanimabong anne ngke e tabekakirake Kristo iaon te kaibangaki. …
… E mwaeiei te aonaaba ao e rikirake n rootongitong. …
Mwaane akana a buakaka akanne ake a ukoukora maiuna a kimwarerirei. …
N te bong anne e raeuaki rokin te tembora.
Maria te I-Maketara ao Maria, tinan Iesu, a kaai n tokanikai man te nanorawawata. … Te mwaane ae te kabanea n tamaroa are a rangin tangiria ao ni karinea e tine n aki maiu iaon te kaibangaki. …
… A nanokawaki Abotoro. Iesu, aia Tia Kamaiu—te mwaane are e nakonako iaon te ran ao ni kautiia maate—boni Ngaia n ana nanoanga ibukiia mwaane aika buakaka. …
Bon te Kanimabong ae kaonaki ma te bwarannano, e kakorakora te rawawata. …
I iangoia bwa boong ni kabane ni moa man rongorongon te aonaaba, te Kanimabong anne ngke e tauraki te Tia Kamaiu bon te kabanea n rootongitong.
[Ma] te koraki ake a bwarannano a aki teimatoa ibukina bwa n te Tabati, te Uea ae e a uti e urua ana kabaebae te mate. E waerake man te ruanimate ao ni kaoti inanon te mimitong ao te tokanikai ngkai te Tia Kamaiu ibukiia aomata ni kabane.
Ao n te tai ae tawe ao maata ake a kaonaki ma rannimata a bwatakataka. Riia a wirikiriki n tataro ma te karaurau ibukin te rawawata ao te nanokawaki a kaona ngkai te eea ma taeka n nebonebo, ibukin Iesu te Kristo, Natin te Atua ae maiu, e tei imataia bwa te moan ni uaa n te Mangauti, te bwai ni kakoaua bwa te mate bon moan bwaai aika boou ao ni kamiimi.
Ngaira n tatabemaniira nako iai oin ara Kanimabong—boong akanne ngkana e a taraa ni maerikiriki te aonaaba ma mwakorokoron uruakin te aonaaba e wene n rarae irarikira kanga ai aron mwakoro ni maange. …
M a I kakoaua nakoimi n aran Temanna are e tokanikai iaon te mate—e na kaoti te Tabati. Inanon nuun nanokawakira, e na kaoti te Tabati.
… E aki kakawaki marakira, e na kaoti te Tabati. N te maiu aei ke te maiu are imwiina, e na kaoti te Tabati.
I kakoaua nakoim bwa te Mangauti tiaki te karaki ae oteaki. Ti karekei ara koaua aika onoti irouia koraki ake a Nooria. Te ngaa n aomata n te Aonaaba are ngkoa ao ae Boou a kaota aia koaua iroun te Tia Kamaiu ae e a tia n uti. A namakin ikoakin baina, waena, ao rarikina. …
Imwiin te Mangauti, a manga moan kaboouaki ana reirei. A mwananga ni kabuta te aonaaba… n ninikoria n taetaekina Iesu te Kristo, natin te Atua ae maiu ae e a tia n uti.
Angiina ibuakoia … a mate bwa a tiringaki ibukin aia koaua, te koaua ibukin Kristo ae e a tia n uti iaon riaia ngkai a mate.
Te maungauti e biti maiuia koraki ake a noora koauana. E na bitiira naba?
Ti na bane ni kautaki man te ruanimate. …
“Ibukin maiun ao ana karea ni kamaiu ae akea tokina te Tia Kamaiua te aonaaba, ti na manga katiteuanaaki ma naake ti tangiriia.
… N te bong anne ti na kimwareirei bwa te Mesia e tokanikai iaon bwaai ni kabane bwa ti aonga ni maiu n aki totoki.
Ibukin otenanti aika tabu ake ti karekei inanon tembora aika tabu, mwanangara man te maiu ae mamate aei e aki kona ni kananaua ni kamaenakoa ara reitaki are e a tia ni bootaki ni kakooaki raoi ma roobu ni kabaebae aika akea tokiia.
Bon au koaua ae matoatoa bwa te mate tiaki tokin te maiu. …
Ti bia oota ao ni maiu inanon te kakaitau ibukin bwaintangira aika akea booia aika roko nakoira ngkai naati mwaane ao aine iroun te Tama are i Karawa ao ibukin te bong ane ootamwaaka anne ngkana ti a kautaki ma te tokanikai man te ruanimate.
… E aki kakawaki rootongitongira ara Kanimabong, e na kaoti te Tabati.