Mga Miting sa Ikaduha ug Ikatulong Dominggo
Sa ikaduha ug ikatulo nga mga Dominggo sa matag bulan, ang mga elders quorum ug mga Relief Society magkat-on gikan sa mga pagtulun-an sa mga lider sa Simbahan gikan sa pinakabag-o nga kinatibuk-ang komperensya. Kinahanglang hatagan og gibug-aton ang mga mensahe gikan sa mga sakop sa Unang Kapangulohan ug sa Korum sa Napulog Duha ka mga Apostoles. Hinoon, base sa lokal nga mga panginahanglan ug inspirasyon gikan sa Espiritu, ang bisan unsa nga mensahe gikan sa pinakabag-o nga komperensya mahimong hisgutan.
Sa kasagaran, ang kapangulohan sa elders quorum o Relief Society mopili og usa ka mensahe sa komperensya nga maoy tun-an base sa mga panginahanglan sa mga miyembro, apan ang bishop o presidente sa stake mahimong mohatag og ideya. Ang mga lider mahimong mopili og mensahe nga may kalabutan sa hilisgutan nga nahisgutan sa bag-o lang nga miting sa council sa unang Dominggo, o mahimo silang mopili og mensahe mahitungod sa lahi nga hilisgutan, base sa inspirasyon sa Espiritu.
Ang mga lider ug mga magtutudlo kinahanglang mangita og mga paagi sa pag-awhag sa mga miyembro nga mobasa sa pinili nga mga mensahe sa wala pa ang klase ug motambong nga andam nga mopaambit og mga kamatuoran sa ebanghelyo ug mga ideya kon unsaon kini sa pagsunod. Ang gisugyot nga mga kalihokan sa pagkat-on nga anaa sa ubos, nga gibase sa mga baruganan sa Pagtudlo sumala sa Pamaagi sa Manluluwas, makatabang sa mga miyembro nga makat-on gikan sa mga mensahe sa kinatibuk-ang komperensya.
M. Russell Ballard, “Bililhong mga Gasa gikan sa Dios,” 9–11
Ang mensahe ni Presidente Ballard naghisgut sa lain-laing mga hilisgutan—lakip sa mga propeta, pagtuo diha kang Kristo, ang sakrament, ug pagserbisyo—ug ang mga miyembro sa inyong korum o Relief Society mahimong makakita og lain-laing mga hilisgutan nga makahuluganon kaayo. Dapita ang mga miyembro sa pagpaambit og usa ka butang gikan niini nga mensahe nga nakadasig kanila. Unsa nga mga pagdapit o gisaad nga mga panalangin ang atong makita diha sa mensahe ni Presidente Ballard? Ikonsiderar ang pagdapit sa mga miyembro sa pagpamalandong sulod sa pipila ka minuto kon unsay ilang gibati nga angay nga buhaton isip resulta niini nga diskusyon.
Gary E. Stevenson, “Ang Kasingkasing sa usa ka Propeta,” 17–20
Aron sa pagtabang sa mga miyembro nga “makasabut sa gibug-aton” sa pagtawag og usa ka bag-o nga propeta, mahimo ninyong dapiton ang mga miyembro sa pagsiksik sa mensahe ni Elder Stevenson, nga mangita og mga kamatuoran ug mga ideya nga makatabang kanila nga makasabut sa kaimportante ug kasagrado niining balaan nga proseso. Ikonsiderar ang pagdapit sa mga miyembro sa pagpaambit sa unsay ilang gibati atol sa maligdong nga katiguman diin si Presidente Nelson gipaluyohan isip Presidente sa Simbahan. Mahimo usab kamong modrowing og kasingkasing diha sa pisara ug hangyoon ang mga miyembro sa pagsulat diha niini og mga pulong o hugpong sa mga pulong nga naghulagway sa kasingkasing ug kinaiya ni Presidente Nelson. Unsay iyang gitudlo nga nakapanalangin kanato?
Neil L. Andersen, “Ang Propeta sa Dios,” 24–27
Ang paghisgut sa mensahe ni Elder Andersen makalig-on sa pagtuo sa mga miyembro diha sa buhi nga mga propeta. Mahimo usab ninyo silang dapiton sa pagsiksik sa iyang mensahe alang sa usa ka butang nga makatabang kanila nga makasabut nganong ang Dios adunay mga propeta dinhi sa yuta ug nganong mosunod kita kanila. Sa unsang paagi kita napanalanginan tungod kay aduna kitay propeta? Ang mga miyembro mahimong mopaambit kon sa unsang paagi sila nakaangkon og pagpamatuod nga si Presidente Russell M. Nelson mao ang propeta sa Ginoo ug Presidente sa Ang Simbahan ni Jesukristo sa mga Santos sa Ulahing mga Adlaw.
David A. Bednar, “Maaghup ug Mapaubsanon sa Kasingkasing,” 30–33
Aron madasig ang diskusyon kabahin sa mensahe ni Elder Bednar, mahimo ninyong isulat sa pisara ang Ang kaaghup mao ang … ug Ang kaaghup dili mao ang … Ang mga miyembro mahimo dayong magsiksik sa mensahe ni Elder Bednar ug isulat sa pisara ang mga pulong nga ilang makit-an nga mokompleto niini nga mga pamahayag. Unsa ang atong makat-unan gikan niini nga mensahe nga makadasig kanato nga mahimong mas maaghup? Unsa nga mga ehemplo sa kaaghup ang atong mahunahunaan? Unsaon nato sa paggamit ang tambag ni Elder Bednar nga mahimong mas maaghup?
Bonnie L. Oscarson, “Young Women nga anaa sa Buhat,” 36–38
Ang mga pangutana maoy usa ka paagi sa pagdapit og pagpamalandong. Ikonsiderar ang pagsulat sa pisara og pipila ka mga pangutana nga gitubag sa mensahe ni Sister Oscarson, sama sa Unsaon nato sa pagpaapil sa batan-ong mga babaye diha sa buhat sa Ginoo? Dapita ang mga miyembro sa pagsiksik sa iyang mensahe alang sa mga tubag niini nga mga pangutana ug hisgutan unsay ilang nakat-unan. Unsa nga mga panalangin ang moabut kon ang batan-ong mga babaye moapil sa pagpangalagad? Tingali ang mga miyembro sa klase mahimong mopaambit og mga kasinatian nila nga nangalagad uban sa batan-ong mga babaye. Base sa atong diskusyon, unsay atong gibati nga angayng buhaton?
Dale G. Renlund, “Buhat sa Family History ug sa Templo: Pagsilyo ug Pagkaayo,” 46–49
Si Elder Renlund namulong mahitungod sa panan-awon ni Ezequiel sa usa ka templo nga adunay migula nga tubig gikan niini (tan-awa sa Ezequiel 47:8–9). Tingali usa ka sakop sa korum o Relief Society makadrowing og hulagway niini nga panan-awon diha sa pisara. Sa unsang paagi ang mga panalangin sa buhat sa templo ug family history sama sa tubig diha sa panan-awon ni Ezequiel? Mahimo ninyong dapiton ang mga sakop sa klase sa pagpaambit sa mga panalangin sa buhat sa templo ug family history nga ilang nasinati. Unsay atong mabuhat aron ang family history ug buhat sa templo mahimong mas kanunay nga parte sa atong kinabuhi?
D. Todd Christofferson, “Ang Korum sa mga Elders [Elders Quorum],” 55–58
Diha sa elders quorum, mahimo ninyong dapiton ang mga sakop sa korum sa pagbasa sa seksyon sa mensahe ni Elder Christofferson nga giulohan og “Ang Katuyoan Niining mga Kausaban.” Unsay atong mahimo aron masiguro nga atong makab-ot kini nga mga katuyoan? Sa Relief Society, mahimo kamong mohangyo og usa ka tawo sa pag-summarize sa mga kausaban sa mga korum sa Melchizedek Priesthood nga gihulagway ni Elder Christofferson. Ang mga sister mahimo dayong moila sa mga baruganan nga gipasabut niini nga mga kausaban nga magamit diha sa buhat sa inyong Relief Society. Sa elders quorum o Relief Society, ang mga miyembro mahimong maghisgot sa unsay ilang nakat-unan gikan sa istorya ni Brother Goates ug sa unsang paagi kini magamit sa ilang mga buhat.
Ronald A. Rasband, “Tan-awa! Ang Harianon nga Kasundalohan,” 58–61
Tingali ang pagkanta, pagpaminaw, o pagbasa og dungan sa mga pulong sa “Behold! A Royal Army” (Hymns, nu. 251) makadasig sa diskusyon mahitungod sa mensahe ni Elder Rasband. Sa unsang paagi ang mga korum sa priesthood ug Relief Society sama sa harianon nga kasundalohan? Ang mga miyembro mahimo usab nga mangita ug maghisgot sa “daghan nga mga panalangin” nga gihisgutan ni Elder Rasband nga moabut gikan sa pag-usab sa mga korum sa priesthood. Unsa ang uban nga mga panalangin nga atong nadawat—o gilauman natong madawat—gikan sa pag-implementar niini nga mga kausaban? Sa unsang paagi ang mga Relief Society mas hingpit usab nga makadawat og mga panalangin sama sa “panaglahi sa mga gasa” ug “paggiya”?
Henry B. Eyring, “Dinasig nga Pagpangalagad,” 61–64
Si Presidente Eyring naghisgut kabahin sa duha ka pakigpulong sa sakrament miting mahitungod sa pagpangalagad nga nakapadani kaniya. Tingali mahimo ninyong hangyoon ang katunga sa mga miyembro sa korum o Relief Society sa pagribyu sa mga pulong sa 14 anyos nga batang lalaki ug ang laing katunga sa pagribyu sa istorya mahitungod sa home teacher. Samtang magbasa sila, ang mga miyembro mahimong maghunahuna sa ilang ikatambag sa batan-ong lalaki o batan-ong babaye kinsa bag-o lang gi-assign sa pagpangalagad ngadto sa usa ka tawo. Sa unsang paagi nga “mas magmadasigon kita ug magmanggiloy-on sa atong serbisyo … sa pagpangalagad”?
Dallin H. Oaks, “Ang mga Gahum sa Priesthood,” 65–68
Aron sa pagsugod og diskusyon, mahimo ninyong isulat ang mga ulohan sa upat ka mga seksyon sa mensahe ni Presidente Oaks diha sa pisara. Dayon dapita ang matag miyembro sa pagbasa og hilum sa usa ka seksyon ug dayon sa pagsulat diha sa pisara og usa ka sentence nga nag-summarize sa kinatibuk-ang mensahe niana nga seksyon. Ang mga miyembro mahimo dayong mopaambit sa unsay ilang gibati nga angay nga buhaton tungod sa ilang nabasa. Sa unsang paagi molambo ang atong pagserbisyo isip mga naghupot sa priesthood o mga sister sa Relief Society samtang atong gamiton ang mga pagtulun-an sa mensahe ni Presidente Oaks?
Russell M. Nelson, “Ang Pagpangalagad uban sa Gahum ug Katungod sa Dios,” 68–75
Si Presidente Nelson nagdapit sa mga naghupot sa priesthood sa “pagbarug” ug paggamit sa priesthood aron sa pagpanalangin sa mga anak sa Langitnong Amahan. Dapita ang mga sakop sa inyong korum o Relief Society sa pagpangita sa mga ehemplo nga iyang gihatag ug sa paghisgot kon sa unsang paagi kini makatabang kanato nga makasabut kon sa unsang paagi ang priesthood mahimong gamiton sa pagpanalangin sa ilang mga pamilya ug sa uban. Unsa nga mga kasinatian ang mahimo natong mapaambit sa dihang napanalanginan kita pinaagi sa gahum sa priesthood? Sa unsang paagi kita makatabang sa uban o sa atong kaugalingon nga makaangkon og pagtuo sa paggamit sa priesthood sa Dios aron sa “pagpangalagad diha sa Iyang ngalan”?
Reyna I. Aburto, “Magkahiusa,” 78–80
Ang mensahe ni Sister Aburto naghatag og oportunidad alang sa inyong korum o Relief Society sa pagtimbang-timbang kon unsa kamo kamaayo nga nagkahiusa sa pagtrabaho sa paghimo sa buhat sa Ginoo. Aron matabangan ang mga miyembro sa pagbuhat niini, mahimo kamong mopakita og mga hulagway sa monarch nga mga alibangbang, sa pagbisita sa Manluluwas ngadto sa mga Nephite (tan-awa sa Libro sa mga Hulagway sa Ebanghelyo, 82, 83, 84), ug ang humanitarian nga buhat sa Simbahan (tan-awa sa LDS.org). Ang mga miyembro mahimong mosiksik sa mensahe ug modiskobre kon giunsa paggamit ni Sister Aburto kini nga mga ehemplo sa pagtudlo mahitungod sa mga katuyoan ug mga panalangin sa pagtrabaho nga magkahiusa. Unsa ang atong mahimo aron magtrabaho nga “magkahiusa”?
Henry B. Eyring, “Ang Iyang Espiritu Magauban Kaninyo,” 86–89
Aron mapalambo ang atong tinguha ug abilidad sa pagdawat sa Espiritu Santo, si Presidente Eyring mipaambit og pipila ka personal nga mga kasinatian ug mihatag og piho nga direksyon. Human moribyu sa iyang mga kasinatian, unsa nga susama nga mga panumduman ang mahimong mapaambit sa mga sakop sa inyong korum o Relief Society sa dihang ang Espiritu Santo mitandog sa ilang kasingkasing o mipanghimatuod sa kamatuoran? Tingali ang mga miyembro mahimong mosulat diha sa pisara sa giya nga gipaambit ni Presidente Eyring nga makatabang sa “pag-abli sa atong mga kasingkasing aron madawat ang pag-alagad sa Espiritu.” Sa unsang paagi ang pagsunod sa iyang direksyon makatabang kanato sa atong kaugalingong kinabuhi ug sa atong mga pamilya? sa atong korum o Relief Society?
Dallin H. Oaks, “Gagmay ug Yano nga mga Butang,” 89–92
Ang mensahe ni Presidente Oaks naglangkob og mga pasumbingay nga nagtudlo kon sa unsang paagi ang gagmay ug yano nga mga butang adunay kusganon nga epekto alang sa maayo o dautan. Kini nga mga pasumbingay naglakip sa mga gamut sa kahoy, usa ka grupo sa mga magbubugsay, mga hilo sa pisi, ug nagtulo nga tubig. Ang mga miyembro mahimong mobasa niini nga mga pasumbingay ug maghisgot kon unsay gitudlo niini mahitungod sa gahum sa makanunayon nga pagbuhat sa gagmay ug yano nga mga butang. Unsa man ang gagmay ug yano nga mga butang nga makadala sa impluwensya sa Espiritu Santo sa atong kinabuhi? Dapita ang mga miyembro sa pagpamalandong kon unsay ilang gibati nga buhaton sa pagsunod sa tambag ni Presidente Oaks.
Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” 93–96
Sa iyang mensahe, si Presidente Nelson mihangyo kanato sa pagpalambo sa atong “espirituhanong kapasidad sa pagdawat og pagpadayag.” Aron matabangan ang mga miyembro sa pagsunod sa iyang direksyon, mahimo kamong mosulat og mga pangutana sama sa mosunod diha sa pisara: Nganong nagkinahanglan man kita og pagpadayag? Sa unsang paagi nato mapalambo ang atong kapasidad sa pagdawat og pagpadayag—sa tagsa-tagsa ug samtang magtinambagay kita sa usag usa? Unsa nga mga panalangin ang gisaad ni Presidente Nelson kon magtinguha kita og pagpadayag? I-grupo-grupo ang mga miyembro, ug dapita ang matag grupo sa pagpangita ug pagpaambit og mga tubag sa usa sa mga pangutana.
Gerrit W. Gong, “Si Kristo ang Ginoo Nabanhaw Karon,” 97–98
Unsa ang mahimong makat-unan sa mga miyembro sa inyong korum o Relief Society gikan sa mensahe ni Elder Gong mahitungod sa atong mga pakigsaad ug sa Pag-ula ni Jesukristo? Mahimo ninyong dapiton ang mga miyembro sa pagsiksik sa mensahe, nga mangita sa mga panalangin nga ang Pag-ula sa Manluluwas ug ang atong mga pakigsaad—naghiusa sa pagtrabaho—gitanyag kanato. Dayon ikonsiderar ang pagpangutana og sama sa mosunod mahitungod sa unsay ilang nakit-an: Sa unsang paagi ang atong mga pakigsaad ug ang Pag-ula naghiusa sa pagtrabaho aron “makapaarang ug makapaligdong” kanato? Unsa ang gitabang niini kanato nga atong huptan ug isalikway?
Ulisses Soares, “Ang mga Propeta Mamulong pinaagi sa Gahum sa Balaang Espiritu,” 98–99
Ang mensahe ni Elder Soares makadasig kanato sa paglihok diha sa hugot nga pagtuo kon mobati kita og kakulang sa pagbuhat sa kabubut-on sa Ginoo. Sa unsang paagi si Elder Soares nakadawat og kahupayan ug kasiguroan sa dihang nadawat niya ang iyang bag-ong calling isip usa ka Apostol? Unsa ang iyang nakat-unan gikan sa iyang kasinatian nga gitawag isip presidente sa misyon? Unsa ang atong makat-unan gikan sa iyang mga kasinatian? Hatagi ang mga miyembro og panahon sa pagpaambit og mga kasinatian sa dihang mibati sila nga dili sigurado mahitungod sa usa ka butang nga gusto sa Ginoo nga ilang buhaton. Unsa man ang ilang gibuhat aron makakaplag og pagtuo sa pagpadayon?
Jeffrey R. Holland, “Magpaduol ug Maglig-on Kanila,” 101–3
Samtang ang mga miyembro sa inyong korum o Relief Society nakakat-on mahitungod sa mga kausaban sa “konsepto sa pagpangalagad sa priesthood ug Relief Society”, unsa nga mga pangutana ang anaa kanila? Ang mensahe ni Elder Holland makahatag og mga tubag. Ang mga miyembro mahimong mangita sa mga baruganan sa ebanghelyo nga gitudlo ni Elder Holland nga mao ang pundasyon niini nga mga kausaban. Unsa nga mga pagdapit ang atong makita sa iyang mensahe? Unsa nga mga panalangin ang gisaad? Sa unsang paagi kining bag-o nga mga paagi sa pagpangalagad makatabang kanato nga mahimong “tinuod nga mga disipulo ni Kristo”?
Jean B. Bingham, “Pagpangalagad sama sa Gibuhat sa Manluluwas,” 104–7
Sa iyang mensahe, si Sister Bingham nagdapit kanato sa pagpangutana sa atong kaugalingon og mga pangutana nga makagiya sa atong mga paningkamot sa pagpangalagad. Ang mga miyembro mahimong maghisgot kon sa unsang paagi kini nga mga pangutana makagiya sa ilang mga paningkamot ug dayon mangita og mga tubag sa pangutana ni Sister Bingham, “Busa sama sa unsa man ang [pagpangalagad]?” Mahimo kamong mogahin og oras sa pagribyu sa pipila sa mga ehemplo nga gipaambit ni Sister Bingham sa mga indibidwal nga nangalagad ug dapita ang mga miyembro sa pagpaambit og ilang kaugalingon nga mga ehemplo. Unsay atong makita sa mensahe ni Sister Bingham nga nakadugang sa atong pagsabut sa ngano ug sa unsang paagi kita mangalagad?
Dieter F. Uchtdorf, “Tan-awa, ania ra ang Tawo!,” 107–10
Unsaon nato pagtabang og tawo nga makasabut nga ang maulaong sakripisyo ug Pagkabanhaw ni Jesukristo mao ang labing importanting mga panghitabo sa kasaysayan sa kalibutan? Dapita ang mga miyembro sa pagpamalandong niini nga pangutana samtang magbasa sila og mga parte sa mensahe ni Elder Uchtdorf. Unsay ilang nakaplagan nga makatabang sa pagpasabut kon ngano nga kini nga mga panghitabo importante kaayo kanila? Human niini nga diskusyon, ang mga sakop sa klase mahimong maghisgot kon unsay ipasabut kanila sa “tan-awa, ania ra ang tawo.” Sa unsang paagi kita nakat-on sa “[pagtan-aw sa] tawo”?
Quentin L. Cook, “Pagpangandam sa Pagsugat sa Dios,” 114–17
Mahimo ninyong sugdan ang inyong diskusyon sa mensahe ni Elder Cook pinaagi sa pagdapit og usa ka miyembro sa pag-summarize sa pagpahiuli sa mga yawe sa priesthood diha sa Templo sa Kirtland. Sumala sa mensahe ni Elder Cook, unsa ang mga responsibilidad nga aduna ang Simbahan nga may kalabutan niini nga mga yawe? Sa unsang paagi kini nga mga responsibilidad napakita sa Simbahan karon? Isulat ang mga pulong nga pagkamatarung, panaghiusa, ug kaangayan diha sa pisara, ug hangyoa ang mga miyembro sa pagpaambit og mga panabut nga ilang naangkon mahitungod sa matag usa niini nga mga baruganan gikan sa mensahe ni Elder Cook. Sa unsang paagi kini nga mga baruganan makatabang kanato sa pagtuman sa sagradong mga responsibilidad sa Simbahan?