Paghatag og Gibug-aton sa Pagpangalagad

Ang home teaching ug visiting teaching hunungon na, si Presidente Russell M. Nelson mipahibalo atol sa sesyon sa Dominggo sa hapon sa kinatibuk-ang komperensya. Ang “Pagpangalagad,” usa ka “bag-o, mas balaan nga paagi” ngadto sa Kristohanong pag-alima alang sa uban, makahatag og hinan-ay nga paningkamot sa pagtabang nga makab-ot ang espirituwal ug temporal nga mga panginahanglan sa miyembro.

Si Sister Jean B. Bingham, ang Kinatibuk-ang Presidente sa Relief Society, ug si Elder Jeffrey R. Holland sa Korum sa Napulog Duha ka mga Apostoles namulong usab mahitungod kon sa unsang paagi nga kining bag-ong paagi mas matutukan ang mga paningkamot sa mga korum sa Melchizedek Priesthood ug sa mga Relief Society diha sa pagpangalagad sama sa gibuhat sa Manluluwas (tan-awa sa mga pahina 101 ug 104).

Ang mga Laurel ug mga Mia Maid mahimo na karon nga makaserbisyo isip mga tigpangalad nga mga kompanyon sa mga sister sa Relief Society. Diha sa interbyu kada tulo ka bulan, ang tigpangalagad nga mga brother ug mga sister makigtambag uban sa mga lider mahitungod sa mga panginahanglan ug kalig-on niadtong gi-assign kanila. Ang gidaghanon sa mga interbyu sa mga lider atol sa kada tulo ka bulan mao lang ang himoon nga pormal nga report. Ang mga pagbisita importante kon mahimo, apan ang pagpangalagad wala naglakip og piho nga paagi sa pakigkita sa matag bulan.

Ang mga kabatan-onan makahimo sa pagpakigbahin sa ilang talagsaon nga mga gasa ug makatubo sa espiritwal nga paagi samtang sila kauban sa mga hamtong diha sa buhat sa kaluwasan,” miingon si Sister Bingham. Ang pagpaapil sa kabatan-onan makadugang sa gidaghanon sa mga miyembro sa pag-atiman sa uban ug makatabang sa mga kabatan-onan nga “mas maandam sa pagtuman sa ilang mga katungdanan isip mga lider sa Simbahan ug sa komunidad ug isip magtatampo nga kauban diha sa ilang mga pamilya.”

“Kami sa ulohang buhatan sa Simbahan wala magkinahanglang mahibalo kon giunsa o asa o kanus-a kamo mohimo og pagkontak sa inyong mga tawo,” miingon si Elder Holland; “nagkinahanglan lang kaming makahibalo ug magpakabana nga kamo nagbuhat ba niini ug nagpanalangin kanila sa tanang paagi kutob sa inyong mahimo.”

Sumala sa sulat gikan sa Unang Kapangulohan, ang mga kausaban sa pagpangalagad posibling mataud-tauran pa apan kinahanglan nga mapahimutang dayon kutob sa mahimo. Ministering.lds.org nakahatag og dugang nga mga detalye, lakip sa mga tubag sa mga pangutana nga kanunayng gipangutana. Mga instruksyon sa video ug mga ubang mga kapanguhaan madugang ngadto sa website sa mosunod nga mga semana.

Sugod sa Hunyo, ang Liahona maglakip sa binulan nga feature nga gitawag og “Mga Baruganan sa Pagpangalagad” sa pagtabang sa mga miyembro nga makasabut kon unsaon nga mas mahisama kang Kristo kon sila mangalagad sa usag usa.