Lisa L. Harkness

Si Lisa L. Harkness kanunay nga adunay gugma sa pagkat-on ug sa kalibutan nga naglibut kaniya, usa ka butang nga iyang nakuha gikan sa iyang mga ginikanan. Nagtuon siya og political science ug gani nakakat-on unsaon sa pagdumala og mga reptile [magkamang nga mga mananap] samtang nagtrabaho sa Monte L. Bean Life Science Museum atol sa iyang panahon sa Brigham Young University—lakip sa mga bitin.

“Motuo ka o dili, aduna silay mga personalidad,” miingon siya. “Adunay usa nga nakaila nako matag higayon nga kuptan nako siya.” Si Howard, ang pula og ikog nga boa constrictor, mokamang pataas sa iyang (Sister Harkness) abaga, molikus sa iyang liog, ug mopahulay sa ulo niini diha sa iyang ulo samtang magtudlo siya sa mga grupo nga moanha sa museyo.

Karon, makapunit ug makaila gihapon siya sa lain-laing mga bitin—basta dili lang kini mositsit kaniya.

Si Sister Harkness natawo sa Los Angeles, California, USA, ngadto nilang Ronald ug LaRae Long niadtong Enero 13, 1965. Ang kinamagulangan sa lima ka anak, siya ug ang iyang pamilya “kanunay nga ganahan og mga panimpalad, maanaa sa gawas, ug mosusi sa kalibutan.” Miingon siya nga tungod kay kanunay siyang makapangutana sa iyang mga ginikanan, “hingpit akong nagtuo ug misalig nga makadangup ko sa Langitnong Amahan ug makakuha og mga tubag.”

Human makaserbisyo og Kinatsila og sinultihan nga misyon sa Louisiana Baton Rouge Mission, si Sister Harkness migradwar gikan sa BYU nga dunay bachelor of science degree sa political science ug secondary teaching. Naminyo siya kang David S. Harkness niadtong Abril 22, 1988, sa Salt Lake Temple. Aduna silay lima ka anak ug duha ka apo.

Si Sister Harkness—kinsa gitawag isip Unang Magtatambag sa Kinatibuk-ang Kapangulohan sa Primary niadtong Marso 31, 2018—nakaserbisyo usab isip general board member sa Primary, presidente sa Young Women sa stake, presidente sa Relief Society sa ward, magtatambag sa kapangulohan sa Young Women sa ward, Mia Maid adviser, camp director sa Young Women, director sa family history sa stake, consultant sa family history sa ward, ug magtutudlo sa Doktrina sa Ebanghelyo.

Nakaboluntaryo usab siya sa iyang lokal nga parent-teacher association, diha sa konseho sa komunidad, sa Utah Symphony, ug sa Timpanogos Storytelling Festival, ingon man usab sa iyang lokal nga pangagamhanan sa nagkalainlaing mga katungdanan.