Elder Carl B. Cook

Si Elder Carl B. Cook nagtuo nga ang pribilehiyo sa pagserbisyo maoy usa sa talagsaong mga panalangin sa pagka miyembro sa Ang Simbahan ni Jesukristo sa mga Santos sa Ulahing mga Adlaw. Apan, miangkon siya, nga ang pagdawat ug pagpalambo sa mga calling nagkinahanglan og hugot nga pagtuo.

Si Elder Cook, nga gipaluyohan isip sakop sa Kapangulohan sa Seventy niadtong Marso 31, 2018, mipahisama sa mga miyembro sa Simbahan—kinsa nanagserbisyo sa mga branch ug mga ward, mga korum, ug mga auxiliary—ngadto sa usa ka “compound gear” sa usa ka awto, nga makamugna og dugang kusog.

Ang compound gear, uban sa four-wheel drive, “magtugot kanimo sa pagkambyu ngadto sa ubos nga gear, momugna og dugang kusog, ug dayon modagan,” miingon siya diha sa kinatibuk-ang komperensya sa Oktubre 2016. “Sama sa gihiusa nga mga gear nga makahatag og dugang kusog diha sa compound gear, kita adunay dugang gahum kon magkahiusa. Kon magkahiusa kita sa pagpangalagad sa usag usa, makahimo kita og mas daghan kay sa kon kita-kita ra. Makapadasig kini nga magbuhat ug maghiusa samtang mangalagad ug motabang kita sa buhat sa Ginoo.”

Si Elder Cook gipaluyohan isip usa ka General Authority Seventy niadtong Abril 2, 2011. Sa wala pa ang iyang bag-ong assignment, si Elder Cook miserbisyo sa punoang buhatan sa Simbahan, diin mitabang siya sa pagdumala sa North America West Area, taliwala sa uban pang mga responsibilidad. Kanhi, nagserbisyo siya isip Presidente sa Africa Southeast Area.

Si Elder Cook miawhag sa mga Santos sa Ulahing mga Adlaw sa paghinumdom nga ang mga calling sa Simbahan naggikan sa Dios pinaagi sa Iyang mga gitudlo nga mga sulugoon.

“Ang mga panalangin moabut samtang kita mopadayon sa atong mga calling ug mga responsibilidad ug molahutay gamit ang atong hugot nga pagtuo.”

Si Elder Cook nakahuman og kurso sa bachelor of Arts sa Weber State College sa Utah ug usa ka masters degree sa business administration gikan sa Utah State University. Sa wala pa matawag ngadto sa Seventy, nagtrabaho siya sa komersyal nga real estate development.

Ang mga calling ni Elder Cook naglakip sa pagserbisyo isip usa ka full-time nga misyonaryo didto sa Hamburg, Germany, ug isip usa ka bishop, presidente sa stake, Area Seventy, ug presidente sa New Zealand Auckland Mission.

Natawo siya sa Ogden, Utah, USA, niadtong Oktubre 15, 1957. Naminyo siya ni Lynette Hansen niadtong Disyembre 1979. Mga ginikanan sila sa lima ka anak.