Mga Korum Giusab

Ang grupo sa mga high priest ug korum sa mga elder sa ward (o branch) karon tipunon na ngadto sa usa ka korum sa mga elder, gipahibalo ni Presidente Russell M. Nelson atol sa sesyon sa priesthood sa kinatibuk-ang komperensya. Ang stake presidency padayon nga moserbisyo isip presidency sa korum sa mga high priest sa stake, apan ang korum maglakip lamang sa mga high priest nga kasamtangang nagserbisyo sa stake presidency, sa mga bishopric, sa high council, ug isip functioning nga patriyarka.

Ang korum sa mga elder pangulohan sa usa ka presidency nga langkuban sa mga elder ug high priest. Ang presidente sa korum sa mga elder moreport ngadto sa stake president ug regular nga makigkita sa bishop. Ang mga katungdanan [office] sa priesthood magpabiling mao ra gihapon. Ang kasamtangan nga presidency sa korum sa mga elder sa ward (o branch) ug mga lider sa grupo sa mga high priest i-release, ug ang stake president motawag og bag-ong presidency sa korum sa mga elder.