Elder Matthew L. Carpenter

Nahinumduman ni Elder Matthew L. Carpenter ang unang higayon nga mibati siya sa Espiritu Santo. Bata pa siya niadto, mga pito ang pangidaron, anaa sa junior Primary. May kahayag nga misulod sa kwarto, ug may gibati siyang kainit nga wala niya mahibaloi kaniadto.

“Akong gibati ang emosyon sa akong kasingkasing—dili tungod kay miinit ako,” miingon siya. “Nahibalo ko nga ang Dios tinuod, gibati ko kini.”

Dihang nag-onse anyos siya, mitambong siya og sesyon sa kinatibuk-ang komperensya sa Salt Lake Tabernacle kuyog sa iyang papa. Unang higayon kadto nga siya anaa sa sama nga lawak sa propeta, si Presidente Joseph Fielding Smith.

“Dihang nakakita ko niya,” miingon siya, “ang Espiritu misaksi kanako nga siya ang propeta.”

Kining yano nga espiritwal nga mga kumpirmasyon sa linghod nga pangidaron nakatabang niya nga makasalig siya sa Espiritu isip usa ka giya nga impluwensya sa tibuok niyang kinabuhi.

“Ang akong pagpamatuod dili kay gipakitaan lang og anghel,” miingon ang General Authority Seventy, kinsa gipaluyohan niadtong Marso 31, 2018, “apan milambo kini ug mitubo paglabay sa panahon.”

Natawo si Matthew Leslie Carpenter sa Salt Lake City, Utah, USA, niadtong Oktubre 21, 1959, kang Leone Erekson ug Robert Allred Carpenter. Kinamanghuran siya sa magtiayon nga may walo ka anak, ug nagtubo siya sa panimalay nga may lima ka magulang nga igsoong babaye.

Sa katapusan niyang bulan sa high school, nahimamat niya si Michelle “Shelly” Brown. Nagsugod sila nga mag-date apan gihunong ang ilang paghinalaray sa gugma samtang nagserbisyo siya sa Swiss Geneva Mission sukad 1979 hangtud 1981. Sa iyang pag-uli, nagminyo ang magtiayon sa Salt Lake Temple niadtong Hulyo 9, 1982. Mga ginikanan sila sa lima ka anak.

Nakaangkon si Elder Carpenter og bachelor’s degree sa finance gikan sa Brigham Young University ug degree sa master of business administration gikan sa Harvard Business School. Bag-ohay lang siya ang managing direktor sa Foundation Specialty Financing Fund.

Nakaserbisyo si Elder Carpenter isip bishop, counselor sa bishopric, presidente sa Young Men sa stake, high councilor, stake president, ug Area Seventy.