Becky Craven
Ikaduhang Magtatambag, Kinatibuk-ang Kapangulohan sa Young Women
Dunay panultihon nga kanunayng ipaambit ni Sister Becky Craven isip usa ka misyonaryo: “Kon makaila ka kon si kinsa ikaw, lahi ang imong linihukan.”
“Ug mao kana sa tanang aspeto—gikan sa imong sininaan, sa imong sinultihan, sa imong pagpresentar sa imong kaugalingon, ug sa mga kalihokan nga imong apilan,” miingon si Sister Craven, kinsa nagserbisyo kauban sa iyang bana, nga si Ronald L. Craven, dihang nangulo siya sa North Carolina Charlotte Mission sugod 2012 hangtud 2015.
Gipaluyohan si Sister Craven isip Ikaduhang Magtatambag sa Kinatibuk-ang Kapangulohan sa Young Women niadtong Marso 31, 2018. “Kon ang batan-ong mga babaye magsugod sa pagkakita sa ilang kaugalingon diha sa plano sa Dios, makakita sila og panan-awon sa ilang kaugalingon,” miingon siya. “Kinahanglan nga aduna kay panan-awon. Kon ikaw walay panan-awon, dili ka mahibalo asa ka moadto ug dili ka mahibalo unsay buhaton aron moabut didto.”
Si Rebecca Lynn Craven natawo niadtong Oktubre 26, 1959, sa Chardon, Ohio, USA, kang Corless Walter Mitchell ug Linda Louise Kazsuk Mitchell. Mapasigarbuhong motawag sa iyang kaugalingon nga “anak sa sundalo,” nagtubo siya sa Texas, USA, diin mipasakop sa Simbahan ang iyang pamilya; didto sa Germany, diin niining panahona ang iyang pamilya na-seal sa Templo sa Swiss; sa England; sa Utah, USA, diin didto siya nabunyagan atol sa unang pag-tour sa iyang papa sa Vietnam; ug sa U.S. sa mga estado sa Maryland, Kentucky, Missouri ug Kansas.
Naminyo niadtong Agosto 5, 1980 sa Salt Lake Temple, ang mga Cravens ginikanan sa lima ka anak.
Sa wala pa mapaluyuhi sa bag-o niyang calling, nagserbisyo siya isip counselor sa presidency sa ward Relief Society ug isip ordinance worker sa Bountiful Utah Temple. Nakaserbisyo usab siya isip Young Women president sa ward, board member sa Relief Society, stake missionary, ug Webelos leader.
Nakaangkon si Sister Craven og bachelor’s degree sa interior design gikan sa Brigham Young University, diin nakaserbisyo siya sa athletic advisory committee. Nakaserbisyo usab siya isip sakop sa executive board sa CHOICE Humanitarian, usa ka internasyonal nga charitable nga organisasyon nga nakabase sa Utah.
Malingaw siya sa pag-hiking, sa mga water sport, snowshoeing, pagbiyahe, pag-painting, pag-quilt [paghimo’g mga habol], ug mga dula ug mga kalihokan uban sa iyang pamilya.