Elder Takashi Wada

Sa usa ka bugnaw nga adlaw sa Nobyembre, ang pangutana gikan sa usa ka Amerikano nga misyonaryo nga nangayo og direksyon ngadto sa lokal nga post office nakapakurat ni Takashi Wada.

Gipasidan-an sa iyang amahan ang 15 anyos nga likayan ang mga Mormon, nga nakig-istorya sa mga tawo diha sa kadalanan sa Nagano, Japan, nga mga tres minutos lang gikan sa ilang panimalay. Apan nakadayeg si Takashi sa Hinapon sa Amerikanong elder.

Paglabay sa pipila ka adlaw, laing misyonaryo ang mipahunong ni Takashi. Bag-o pa lang siya sa Japan. Sa putol-putol nga Hinapon, naningkamot siya sa pagpaambit sa istorya ni Joseph Smith.

Wala makasabut si Takashi sa tanan, “apan gibati nako nga kinahanglan kong maminaw,” mihinumdom siya.

Gitudloan siya sa mga misyonaryo sa mga lakang sa pag-ampo ug sa mga leksyon. Mitambong siya sa mga miting sa Simbahan ug natandog sa mga pagpamatuod sa lokal nga mga miyembro. Mibati nga napugngan sa mga gilauman sa iyang pamilya nga Buddhist, si Takashi kanunay nga misulti sa mga misyonaryo, “Dili ko makaapil sa Simbahan, apan gusto kong makakat-on pa.”

Paglabay sa duha ka tuig, sa wala pa mobiya si Takashi aron moeskwela sa Estados Unidos sa edad nga 17, ang iyang mga ginikanan miuyon, ug nagpamiyembro siya sa Simbahan.

Si Elder Wada, kinsa natawo sa Pebrero 5, 1965, ngadto nilang Kenzo ug Kazuko Wada, nakadawat og bachelor of arts degree sa linguistics niadtong 1990 ug master’s degree sa business administration niadtong 1996, parehong gikan sa Brigham Young University.

Miserbisyo siya og misyon sa Utah Salt Lake City North Mission ug naminyo kang Naomi Ueno niadtong Hunyo 18, 1994, sa Tokyo Japan Temple. Ang magtiayon adunay duha ka anak nga lalaki.

Ang pagpanarbaho ni Elder Wada naglakip og daghang mga posisyon sa multinational nga mga corporation sa Estados Unidos ug sa Japan, ingon man sa posisyon nga director for temporal affairs sa Simbahan sa North America West, North America Northwest , ug Asia North nga mga Area.

Si Elder Wada usa ka kanhi bishop, high councilor, ug magtutudlo sa seminary. Miserbisyo siya isip presidente sa Japan Tokyo South Mission gikan sa 2013 hangtud sa 2016. Gipaluyohan siya isip General Authority Seventy niadtong Marso 31, 2018.