Elder Mathias Held

Si Elder Mathias Held ug ang iyang asawa, si Irene, tukma nga matawag nga mga ehemplo sa pangtibuok kalibutan nga Simbahan. Silang duha mga taga-Colombia nga adunay German nga kaliwat. Ang mga trabaho ug pag-eskwela mikuha kanila gikan sa ilang South American nga yutang natawhan ngadto sa Canada, Germany, Guatemala, Brazil, ug, sa katapusan, balik sa Colombia. Sa matag nasud, mi-adjust sila sa bag-ong mga pinulongan ug kultura.

“Apan ang Simbahan pareha ra gayud gihapon bisan asa kita moadto,” miingon si Elder Held, kinsa gipaluyohan isip General Authority Seventy niadtong Marso 31, 2018.

Kana nga espiritwal nga “pagkapareha” mihatag og lig-ong pundasyon sa magtiayon samtang nagpadako sila sa tulo ka mga anak ug milambo diha sa ebanghelyo.

Ang mga Held klasmeyt sa dihang mga bata pa sa usa ka eskwelahan nga German og pinulongan sa ilang yutang natawhan sa Bogotá, Colombia. Na-seal sila niadtong Hunyo 13, 1989, sa Frankfurt Germany Temple, human si Mathias nakaangkon og degree sa mechanical engineering sa Bogotá ug master’s degree sa business administration sa Canada.

Ang mga oportunidad sa panarbaho wala madugay midala sa batan-ong magtiayon ngadto sa Hanover, Germany, diin si Sister Held nakadawat og kusganong pagbati nga adunay mahitabong kausaban sa ilang kinabuhi.

“Gisultihan nako si Mathias nga gibati nako nga makadawat kami og mensahe gikan sa langit,” miingon siya. Kana nga langitnong mensahe miabut usa ka ulanon nga hapon sa 1987 uban sa pagpanuktok diha sa atubangang pultahan. Nagbarug sa gawas mao ang Mormon nga mga misyonaryo nga namulong og German nga adunay Amerikano nga tonada.

Sa misunod nga 10 ka bulan, ang mga Held nagtuon uban sa mga misyonaryo ug nakahimo og mga higala diha sa lokal nga kongregasyon sa LDS. Human sa daghang pag-ampo, nakadawat sila og espiritwal nga kompirmasyon sa kamatuoran sa ebanghelyo ug nabunyagan niadtong 1988.

Si Elder Held mitrabaho og sobra sa 25 ka tuig diha sa tighimo og sakyanan nga Daimler-Benz, diin ang iyang pangdumala nga katungdanan midala kaniya libut sa tibuok kalibutan. Ang mga Held misalig sa Ginoo sa matag dapit nga ilang napuy-an.

“Dili igsapayan kon unsa nga mga pagsulay ang inyong nasinati,” miingon siya. “Kon makigsulti kamo sa langit, ma-okey ra mo.”

Natawo niadtong Hunyo 5, 1960, ngadto nilang Miguel ug Elisabeth Held, si Elder Held nakaserbisyo isip magtatambag sa kapangulohan sa stake, magtatambag sa bishopric, ug Area Seventy sa South America Northwest Area.